Kikwete kuongoza harambee Yanga

Na Elizabeth Mayemba

RAIS Jakaya Kikwete, anatarajiwa kuwa mgeni rasmi katika harambee ya kuchangia ujenzi wa uwanja na jengo la mtaa wa Mafia la Klabu ya Yanga, inayotarajia kufanyika
Julai 7 mwaka huu Dar es Salaam.

Jumla ya fedha zinazohitajika kwa klabu hiyo ili kukamilisha ujenzi huo kwa upande wa uwanja ni sh. bilioni tano na jengo la Mafia litagharimu sh. bilioni mbili.

Akizungumza Dar es Salaam jana Msemaji wa klabu hiyo, Louis Sendeu alisema walimtumia Rais barua ya kumuomba awe mgeni rasmi tangu wiki tatu zilizopita, hivyo wanasubiri majibu ili waendelee na taratibu nyingine.

"Tumemwandikia barua mheshimiwa Rais wiki tatu zilizopita, hivyo tunatarajia atakubali ombi letu ili aweze kushiriki katika harambee hiyo," alisema Sendeu.

Alisema siku hiyo ya harambee wameandaa chakula cha jioni, ambapo kutakuwa na tukio la uchangiaji wa fedha kwa klabu hiyo kwa lengo la kufanikisha ujenzi wa uwanja na jengo lao.

Sendeu alisema wameona ni vyema wakamshirikisha Rais kwa kuwa ni mtu anayependa maendeleo ya soka nchini na amekuwa mstari wa mbele katika kuhamasisha michezo.

Alisema pia watazialika kampuni, mashirika, wafanyabiashara maarufu nchini pamoja na wanachama ambao watakuwa tayari kuchangia, ili kufanikisha ujenzi huo.

Kamati ya Ujenzi ya klabu hiyo, inaongozwa na Mwenyekiti wake, Mbaraka Igangula.