CHADEMA wamvaa Makinda nyumbani

*Wataka katiba mpya imzuie spika kuwa mbunge

Na Tumaini Makene

CHAMA cha Demokrasia na Maendeleo (CHADEMA) kimetaka mabadiliko ya katiba yaguse pia uendeshaji wa bunge, kikitaka spika wa bunge asiwe
mbunge wa jimbo lolote la uchaguzi na ikitokea hivyo basi ajiuzulu nafasi hiyo ya ubunge ili wananchi wake wapate uwakilishi ulio sahihi.

Hatua hiyo imedaiwa itamsaidia spika na yeye afanye kazi zake kwa uhuru bila kupendelea chama chochote bungeni, kikisema mabadiliko hayo yaanze sasa wakati huu Spika Anne Makinda, kwa madai kuwa ameonesha dhahiri uwezo mdogo na kupendelea chama tawala, ambacho yeye ni kada mkongwe.

Kauli hiyo na nyingine zilitolewa katika Mkutano wa hadhara wa chama hicho , uliohutubiwa na viongozi mbalimbali wa chama hicho katika Viwanja vya National Housing mjini Njombe jana.

Katika mkutano huo, Mwenyekiti wa Chadema, Bw. Freeman Mbowe na Naibu katibu Mkuu, Bw. Zitto Kabwe kwa nyakati tofauti walizungumzia umuhimu wa spika wa bunge kutokuwa mbunge wa chama chochote cha siasa, ambapo mwenyekiti huyo wa chama alisema kuwa aliwahi kuingia matatani juu ya suala hilo hata kushtakiwa katika Kamati ya Kudumu ya Bunge ya Haki na Madaraka ya Bunge, akipigania uhuru wa cheo cha spika.

Bw. Kabwe alisema kuwa ni wakati mwafaka sasa, Tanzania ikaiga mfumo wa Kenya, ambako spika hapaswi kuwa mbunge na iwapo mmoja wa wabunge akifanikiwa kushinda nafasi hiyo basi hutakiwa kujiuzulu ubunge, ili awapatie wananchi wake haki ya kupata mwakilishi mwingine wa kuzungumzia kero zao na yeye abaki huru kuendesha bunge kwa misingi ya haki bila upendeleo.

Kuhusu amani ya nchi, Bw. Mbowe alisema kuwa chama hicho kinathamini na kiko tayari kuilinda amani ya nchi kwa nguvu zote, ilimradi serikali iliyoko madarakani iendelee kutumia amani na utulivu uliopo, kutengeneza fursa kwa ajili ya ustawi wa wananchi maskini nchini.

Bw. Mbowe alisema "tunaipenda sana amani ya nchi, tunawaenda Watanzania wote na ndiyo maana tunawashirikisha katika elimu ya namna nchi yao inavyopaswa kuendeshwa...lakini kitu ambacho hatukubali ni maneno hayo ya amani na utulivu kutumika kuwatia hofu Watanzania huku watu wachache wakiendelea kunufaika na utajiri wa nchi huku wananchi wao wakizidi kudidimia.

"Tunataka amani na utulivu wa dhati unaotokana na kila mtu kupata haki ya fursa ya kujiendeleza, kupata elimu bora, afya bora na kipato, tunahitaji kuona ustawi na maendeleo ya wananchi na nchi yetu si watu wachache kunufaika...amani na utulivu utumike kupunguza umaskini na ukali wa maisha ya Mtanzania sio kumtisha na kumtia hofu," alisema Bw. Mbowe.

Kwa upande wake Katibu Mkuu wa CHADEMA, Dkt. Willibrod Slaa alizidi kumtaka Rais Jakaya Kikwete kuwajibika kwa wananchi kwa kuhakikisha wanapata maisha bora, akidai kuwa kiongozi huyo ni dhaifu katika uongozi, hivyo asitake kuhamishia udhaifu wa uongozi wake kwa mawaziri kuwa ndiyo wenye matatizo.

"Anataka kujiweka mbali na matatizo ya wananchi wake, sisi tunasema Kikwete huu ni mzigo wako, wananchi wakikosa elimu bora si kosa la waziri, wakikosa afya bora si tatizo la waziri...wewe ni rais mtendaji chukua hatua na maamuzi.

"Rais Kikwete aache usanii, nimemwangalia kwenye tv wakati akifunga semina elekezi anazidi kuwalalamikia mawaziri wake...Kikwete tumeshamtajia ufisadi wote, tunatakaa achukue hatua kuanzia kwenye Tangold, Kagoda ambayo inazidi kumpatia kigugumizi, Meremeta na ufisadi mwingine ambayo tulishamtajia na majina ya wahusika kila kitu wafikishwe mahakamani, serikali lazima iwatumikie wananchi wake, aache usanii," alisema Dkt. Slaa.

Akihutubia mkutano wa Mbinga Mjini juzi katika mkutano wa hadhara katika mfulululizo wa mikutano ya Operesheni Sangara ya CHADEMA katika Nyanda za Juu Kusini, Naibu Katibu Mkuu wa chama hicho, Bw. Kabwe Zitto alisema "kuiondoa CCM madarakani si dhambi wala si uhaini, lazima tukiondoe kwa kura mwaka 2015 na CHADEMA iko tayari na imeiva kuchukua dola kuongoza nchi hii huo ndiyo wajibu wetu kama chama cha siasa.

"Mmesikia leo hata katika vyombo vya habari wameanza propaganda eti tunataka kupindua nchi, CHADEMA haina nia hiyo, wanataka kutafuta sababu ya kuzuia harakati na mchakato huu wa kuwakomboa Watanzania kwa kuwapatia elimu...tutaiondoa CCM kwa kura mwaka 2015...kama CCM wataondoka kabla ya hapo watakuwa wamejitakia wao wenyewe kuondolewa na Watanzania kwa sababu wameshindwa kushughulikia umaskini na ukali wa maisha unaowamaliza sasa Watanzania...wameshindwa kushughulikia elimu, afya na kuweka mazingira ya kila mwananchi kunufaika na utajiri wa nchi hii," alisema Bw. Kabwe.

Kwa upande wake Kada wa CHADEMA, Bw. Fred Mpendazoe amezidi kuwaandamana 'wenzake' aliokuwa nao CCM, akisema kuwa serikali ya chama hicho iliyoko madarakani kwa sasa, haiwezi kusimama pamoja kwani baadhi ya viongozi wake walishafikia hatua ya kukiasi chama hicho kwa sababu ya kutofautiana itikadi na misimamo, katika kuongoza nchi kuwatumikia wananchi.

Bw. Mpendazoe ambaye aliwahi kuwa Mbunge wa CCM Jimbo la Kishapu, mkoani Shinyanga, alisema kuwa baadhi ya viongozi walioko serikalini waliwahi kukiasi chama kinachoongoza serikali sasa na wakaamua kuunda chama kingine kiitwacho Chama Cha Jamii (CCJ) kwa ajili ya kupinga chama chao.