Polisi auawa akikamata bangi

*Apigwa mawe, mapanga na wananchi
*Saba wauawa, watatu familia moja

Na Moses Mabula, Tabora

ASKARI Polisi mwenye namba E 9530, PC Joseph wa Kituo cha Kidogo cha Polisi cha Puge, Wilaya ya Nzega ameuawa kwa
kupigwa mawe na kukatwa mapanga na wananchi wakati akiwa katika kazi ya kukamata watu wanaolima bangi katika Kijiji cha Mwakashanshara Tarafa ya Puge .

Pia wananchi hao walimjeruhi askari mwingine mwenye namba G 246 ambaye jina lake halikupatikana mara moja.

Akithibitisha tukio hilo, Kamanda wa Polisi Mkoa wa Tabora, Bw. Liberatus Barlaw alisema tukio hilo limetokea saa nne asubuhi katika kata hiyo.

Bw. Barlaw alisema kwa sasa hana zaidi la kuzungumuza kuhusu  tukio hilo hadi hapo taarifa kamili ya jeshi hilo itakapokamilika na kutolewa kwa vyombo vya habari.

Kwa mujibu wa vyanzo vya habari kutoka katika kata hiyo, chanzo askari huyo aliuawa wakati wakifanya operesheni maalumu ya kukamata bangi na wanaolima zao hilo.

Vyanzo hivyo kwa nyakati tofauti vililiambia Majira kuwa  askari hao walikuwa watano katika oparesheni hiyo.Moja ya vyanzo hivyo vilisema kuwa wananchi hao waliwakamata askari wawili na kuwapiga lakini wengine walifanikiwa kukimbia.

Chanzo hicho kilisema kuwa askari hao hawakuwa na silaha za kutosha katika oparesheni hiyo hali iliyofanya wananchi hao kuwadhibiti kirahisi na kusababisha kifo na mmoja wao na  kumjeruhi na mwingine ambaye amelazwa katika Hospitali ya Misheni ya Ndala iliyopo katika tarafa hiyo.

Inadaiwa kuwa wananchi katika taarafa hiyo wamekuwa na uhusiano mbaya na askari wa kituo hicho kutokana na kile kinachodaiwa polisi kuwanyanyasa raia kwa kuwakamata mara kwa mara bila sababu ya msingi.

Wakizungumza na Majira baadhi ya askari polisi wilayani hapa kwa nyakati tofauti walisema vitendo hivyo vya kuuawa kwa askari vimekuwa vinatokea mara kwa mara hasa wananchi wakiwa na kinyongo na baadhi ya askari.

Moja ya askari ambaye hakutaka jina lake litajwe gazetini alisema kuwa sasa kila mwezi matukio hayo yamekuwa yakitokea katika Kanda ya Magharibi jambo linalowafanya wahofie usalama wa maisha yao.

Alisema kuwa kuna haja sasa kwa serikali kutoa elimu kwa wananchi  hasa katika kanda hiyo ambao wamekuwa wakitumia zaidi Kikosi cha Sungusungu kuwauwa raia bila kuwapeleka katika na vyombo vya kisheria.

Wakati huo huo Juddy Ngonyani kutoka Sumbawanga anaripoti kuwa watu watatu wa familia moja wakazi wa Kijiji cha Miombo kilichopo katika Kata ya Namanyere wilayani Nkasi mkoani Rukwa wameuawa na miili yao kuchomwa moto baada ya kushambuliwa na kundi la wananchi kijiji hicho kwa kile kilichodaiwa walihusika katika kifo cha  mtoto miaka minne katika kijiji hicho.

Kamanda wa Polisi Mkoa wa Rukwa, Bw. Isunto Manatge aliwaambia waaandishi wa habari kuwa tukio hilo lilitokea juzi usiku baada ya kundi la wananchi hao kuvamia nyumba ya Luciano Chole (62) na  kuwashambulia wanafamilia hao kwa zana mbalimbali za jadi na kusababisha mauti yao.

Kamanda Mantage aliwataja wanafamilia waliouawa kuwa ni Luciano Chole (62) na mkewe, Adelina Mulele (54) na mtoto wao Jailos Silvanus (29).

Akifafanua juu ya tukio hilo Kamanda Mantage alisema kuwa uchunguzi wa awali umebaini kuwa siku tatu kabla ya tukio hilo  mtoto mwenye umri wa miaka minne aliyefahamika kwa jina la  Geminus Kwimba alitoweka nyumbani kwao katika mazingira ya kutatanisha na siku iliyofuata mwili wa mtoto huyo ulikutwa  umetupwa kwenye dimbi la maji.

Alisema baada ya tukio hilo wakazi wa kijiji hicho walihisi kuwa mtoto huyo ameuawa na Jailos Silvanus hivyo kuvamia familia hiyo.

Kamanda Mantage alisema kuwa usiku wa kuamkia juzi kundi la wananchi hao lilivamia nyumba ya wanafamilia hao na kumshambulia  Jailos ambapo wazazi wake waliamua kuingilia kati kwa lengo la kumuokoa lakini nao walishambuliwa hadi kufa na miili yao kuchomwa moto.

Hata hivyo mara baada ya kufanya unyama huo watu hao walikimbia na bado wanatafutwa na jeshi hilo.

Katika tukio jingine Kamanda Mantage alisema kuwa jeshi hilo linawashikilia watu wawili kwa tuhuma za kuhusika na mauaji ya Bi. Anna Kasubi (80) mkazi wa Kitongoji cha Kitupa kilichopo katika Kijiji cha Majimoto Kata ya Mamba Tarafa ya Mpimbwe wilayani Mpanda.

Aliwataja watuhumiwa hao kuwa ni Mashala Mashige(28) pamoja na  mkewe aitwae Luca Kasamya(25) ambao ni majirani wa marehemu huyo.Kamanda Mantage alisema kuwa chanzo cha mauaji hayo bado hakijajulikana ingawa kinasadikika kuwa kinatokana na imani za kishirikina.