Jumuiya CCM zatakiwa pia 'kujivua magamba'

Na Gladness Mboma

MWENYEKITI wa Taifa CCM, Jakaya Kikwete pamoja na sekretarieti mpya chini ya Katibu Mkuu, Bw. Wilson Mukama wameombwa wayafikishe mageuzi katika ngazi zote
za chama na jumuiya zake ili kuwaondoa viongozi wote wazembe, wasio waadilifu na wafuasi wa mafisadi.

Mbali na ombi hilo pia wameombwa katika chaguzi zitakazokuja kiandae utaratibu utakaowazuia mafisadi na washirika wao wote kugombea na kupata nyadhifa ndani ya chama, na kuwa makini nao kwa kuwa hivi sasa wana hasira na chama.

Hayo yalisemwa jana na Shirikisho la Umoja wa Vijana wa Chama cha Mapinduzi (CCM) kupitia Vyuo Vikuu Mkoa wa Dar es Salaam,  wakati likimpongeza Rais Kikwete kwa 'ujasiri na hatua madhubuti' alizochukua katika kufanya mabadiliko ya kiuongozi ndani ya CCM.

"Kama chama kitakubaliana na ombi letu la kuandaa utaratibu utakaozuia mafisadi na washirika wao wote kugombea na kupata nyadhifa ndani ya chama, hilo litarudisha imani kwa wafuasi na wanachama wa CCM, hali itakayokifanya chama kibaki kuwa kimbilio la wanyonge, wakulima na wafanyakazi," alisema Katibu wa Shirikisho hilo, Bw. Abubakar Asenga.

Alisema kuwa wanaunga mkono hatua zilizoanzishwa na chama za kupambana wazi na vitendo vya kifisadi na kwamba wale wote ambao wanatuhumiwa kwa kashfa nzito za ufisadi mkubwa na ubadhirifu wa mali za umma waachie nyadhifa zote ndani ya chama katika muda wa siku 90 walizopewa.

Bw. Asenga alisema watuhumiwa hao wasipofanya hivyo, wao (vijana) wataunga mkono hatua za chama kuwang'oa, na kusisitiza kwamba CCM siyo kichaka cha kuhifadhi watu wasio waadilifu wala mafisadi, na akawashauri waachane na siasa wakafanye biashara.

Katibu huyo alisema kuwa wanaunga mkono mageuzi makubwa yaliyofanywa kiuongozi, pili dhamira ya kufanya mchakato wa marekebisho ya kimfumo ndani ya chama.

"Shirikisho linatoa pongezi za dhati kwa sekretarieti mpya chini ya Katibu Mkuu, Bw. Mukama, uteuzi wao ni faraja kubwa kwa chama, hasa kwa kuwa umezingatia hali halisi ya siasa za sasa na uwakilishi wa vijana ambao ndio wadau wakubwa," alisema.

Bw. Asenga aliwapongeza pia wote waliochukua hatua za kujiuzulu nafasi zao, ili kupisha mageuzi makubwa ndani ya chama licha ya kwamba ni maamuzi machungu, lakini yanayofaa kupongezwa na kuigwa.

Shirikisho hilo limewataka vijana nchini kupeleka maoni na mawazo yao katika matawi na kuacha kutumia utaratibu wa kuropoka hovyo.

Alisema kuwa mafisadi watakuwa wanawatumia vijana ili UVCCM ionekane haijatulia na kuwataka kukaa chonjo na kundi hilo ambalo kwa sasa lina hasira na chama.

Wakati huo huo, Spika wa Bunge wa Chuo Kikuu cha Dar es Salaam, Bw. Godluck Mangomango ambaye alidai alikuwa mwanachama wa CHADEMA amejiunga na shirikisho hilo kwa madai ya mabadiliko yaliyofanywa na Rais Kikwete.

Akizungumza na Waandishi wa Habari Dar es Salaam jana, Bw. Mangomango alisema kuwa baadhi ya vijana waliokuwa wamejiondoa CCM na kujiunga na CHADEMA, sasa wameamua kurejea CCM baada ya kuwepo kwa mabadiliko.