Serikali ya JK imepoteza mwelekeo-Lipumba

Na Benedict Kaguo, Tandahimba

MWENYEKITI wa Taifa wa Chama Cha Wananchi CUF, Profesa Ibrahim Lipumba amesema Serikali ya Rais Jakaya imepoteza mwelekeo hadi inayosababisha migongano
baina baina ya viongozi kwa viongozi akitolea mfano suala la Waziri wa Ujenzi John Magufuli kuumbuliwa na rais mbele ya mkutano wa hadhara.

Badala yake alisema ingekuwa vema kwa rais kumuita katika Baraza la Mawaziri ili kumweleza udhaifu wake kuliko kumshambulia mbele ya umma wa Watanzania na kuifedhehesha serikali mbele ya wananchi.

Akihutubia wakazi wa Mji wa Tandahimba Mkoani Mtwara katika mwendelezo wa mikutano ya operesheni Zinduka juzi jioni, Profesa Lipumba alisema kitendo hicho kimeonesha udhaifu mkubwa wa uongozi uliooneshwa na Rais Kikwete.

“Ndugu zangu Serikali ya CCM inasambaratika, na hili suala la Waziri Magufuli kukanywa na Rais Kikwete kwenye mkutano wa hadhara ni kielelezo cha rais kushindwa kuongoza nchi, hii ni fedheha kubwa kwa serikali,” alisema Profesa Lipumba.

Alisema hali hiyo wananchi wanapaswa kuiona kuwa ni ishara ya serikali ya CCM kushindwa kuongoza nchi, ndio sababu kumekuwepo na matukio mengi ya migongano kati ya viongozi wa juu wa serikalini.

“Watu wanaoweza kukaa kwenye Baraza la Mawaziri wakazungumza lakini watu wanaumbuana hadharani, sasa Waziri Magufuli anakanywa mbele ya umma ni wazi uwezo wake katika maamuzi utakuwa umetetereka,” alisema Profesa Lipumba.

Alisema jambo la msingi badala ya viongozi hao kulumbana hadharani wangekuwa ndani ya Baraza la Maziri na kutoa mawazo mazuri juu ya utekelezaji wa suala hilo la bomoabomoa kwani huwezi kumbomolea mtu nyumba wakati hakuna bajeti ya kujenga barabara.