Tanzania ina la kujifunza Uganda

Na Agnes Mwaijega

MTANDAO wa Asasi za Kiraia za kuangalia Chaguzi Tanzania (TACCEO) unaoratibiwa na Kituo Cha Haki za Binadamu (LHRC) umesema Tanzania inatakiwa
kujifunza kutokana na utaratibu uliotumika katika Uchaguzi uliofanyika nchini Uganda ili kuweza kuboresha chaguzi zake.

Akizungumza Dar es Salaam jana Mwenyekiti wa Mtandao huo, Bi. Martina Kabisama alisema pamoja na kwamba uchaguzi huo ulikuwa na upungufu wa aina mbalimbali wao kama waangalizi wangependa mambo yote mazuri Tanzania iyachukue na kuyafanyia kazi.

 "Tumejifunza kitu kutokana na uchaguzi uliofanyika nchini Uganda na tungependa nchi yeu kujifunza jinsi ya kuratibu na kuendesha chaguzi ndani ya nchi," alisema.

Alisema kutokana na mchakato mzima wa uchaguzi wamegundua kuwa kuna umuhimu wa kutoa elimu kwa wapiga kura, mfumo wa watendaji wa Tume ya Uchaguzi unakuwepo katika ngazi ya taifa hadi kata na mafunzo kwa wataalamu mbalimbali wa kusimamia na kuratibu uchaguzi kufanyika haraka.

Bi. Kabisama alisema katika uchaguzi huo matumizi ya makubwa ya rasilimali za umma yalioneshwa kwa kiwango kikubwa na rais aliyeko madarakani.

 "Kwa mfano fedha ziligaiwa kwa wananchi ili kuwashawishi wapiga kura, ujumbe mfupi kwa njia ya simu kwa kila mwananchi ulikuwa katika lugha mbili ambazo ni Kiganda na Kiingereza ili kurahisisha mawasiliano," alisema.

Pia alisema matumizi ya Teknohama katika uangalizi wa uchaguzi huo yalisaidia kuonesha mchakato mzima wa uchaguzi jinsi ulivyoenda na kufanya ushiriki mpana wa wananchi katika zoezi zima la uchaguzi ambapo taarifa za matukio yaliyokuwa siyo ya kawaida yaliripotiwa kwa wakati.

Aliongeza kuwa Katiba ya Uganda imepanua wigo wa demokrasia na ushiriki wa wananchi katika masuala mbalimbali.

Aliyataja mambo hayo ambayo ni pamoja na mgombea binafsi, viti vya wanawake kushindana katika majimbo, katiba kuruhusu mtu yeyote ambaye hajaridhika na matokeo ya rais kupinga pamoja na katiba hiyo kutamka wazi kwamba rais mteule lazima akubaliwe na walio wengi.