Ngoma CCM, CHADEMA Arusha bado mbichi

*Mbunge kutoka Tanga ashiriki tena uchaguzi
*CHADEMA waususia, wasema hawashiriki uhuni

Na Glory Mhiliwa, Arusha
MBUNGE wa Viti Maalumu mkoa wa Tanga kupitia CCM, Bi. Mary Chatanda jana alizidi kuleta mvutano wa
kisiasa baada ya kushiriki kwenye uchaguzi Jumuia ya Serikali za Mitaa Tanzania (ALAT) mkoa wa Arusha na kusababisha wajumbe wa CHADEMA kuususia.

Hii ni mara pili kwa mbunge huyo kupitia Mkoa wa Tanga kuzua tafrani kama hiyo baada ya kushiriki uchaguzi wa meya na naibu wake katika Manipaa ya Arusha, hatua iliyopingwa na madiwani wa CHADEMA, huku CCM wakisisitiza kuwa ni halali kufanya hivyo.

Kutokana na kitendo cha Bi. Chatanda ambaye pia ni  Katibu wa CCM Mkoa wa Arusha, wajumbe wa CHADEMA waliondoka katika mkutano huo wakisema wasingewe kushiriki kuchakachua sheria kwa kuchagua wajumbe wa ALAT, huku akimshirikishwa mjumbe haramu.

Hata hivyo, vigogo wa CCM ambao ni wabunge mkoani Arusha na wajumbe wa kikao hicho, Bw. Edward Lowassa (Monduli), Lekule Laizer (Longido), Bw. Goodluck Ole Medeye (Arumeru Magharibi), Bw. Jeremiah Sumari (Arumeru Mashariki) pamoja na Meya anayelalamikiwa wa Manispaa ya Arusha, Bw. Gaudence Lyimo hawakuhudhuria.

Kikao hicho kiliendeshwa na mwenyekiti wa muda, Bw. Ismail Katamboi, ambaye ni diwani wa Kata ya Kisongo, ambaye alisema kukuwapo kwa wajumbe sita wa CHADEMA siyo sababu ya kuwazuia kuendelea na uchaguzi huo.

Akizungumza na waandishi wa habari nje ya ukumbi, Mbunge wa Arusha Mjini, Bw. Godbles Lema alisema, "Sisi tumetoka ndani ya kikao hiki kwa sababu ya huyu Bi. Mary Chatanda ambaye ni mbunge wa Tanga, iweje leo apige kura za kuchagua wawakilishi wa mkoa Arusha,"  alisema Lema.

Alisema kuwa kinachofanyika sasa kwa Mkoa wa Arusha ni uhuni na siyo demokrasia, hivyo bora wawaachie wenye chama tawala wafanye kila wanachotaka, ila wao hawako
tayari kushiriki kuchakachua sheria kwa kuchagua wajumbe, huku wakimshirikisha mjumbe haramu.

Kikao hicho kilitakiwa kuchagua, mwakilishi ALAT Taifa, Mwenyekiti na makamu wake mkoa, katibu na Mweka hazina.

Pamoja na Bw. Lema wajumbe wengine wa CHADEMA waliosusa uchaguzi huo ni Bi. Cecilia Paleso, Diwani Viti Maalum- Karatu, Lazaro Maasai, Mwenyekiti Halmashauri ya Karatu, Joyce Mukya, Mbunge Viti maalumu Arusha, Winner Kitembe, Diwani wa Karatu na Mchungaji Israel Natse ambaye ni Mbunge Karatu.

Kikao hicho kilitakiwa kuwa na wajumbe halali 40, lakini baada ya wajumbe sita wa CHADEMA kutoka na wengine ambao hawakuhudhuria, walibaki 28 wa CCM ambao waliendelea, na kumchagua Bw. Godfrey Majola, mwenyekiti wa Halmashauri ya Meru kuwa Mwenyekiti wa ALAT mkoa.

Msuguano huo umeendelea kutoka mkoani Arusha wakati vumbi lililotimka kutokana na polisi kuzima maandamano wa CHADEMA kupinga uchaguzi wa meya likiwa halitatua.

Katika tukio hilo, watu watatu waliripotiwa kuuawa na polisi kwa risasi na wengine zaidi ya 30 kujeruhiwa, na chama hicho kimendaa mazishi ya 'kitaifa' yatakayofanyika katika viwanja vya NMC kesho.

Katika hatua nyingine, Anneth Kagenda anaripoti kuwa Baraza la Wazee wa CCM Mkoa wa Dar es Salaam, limewataka viongozi wa dini kukaa kimya na kutojiingiza kwenye siasa kwa kutoa msimamo kuhusu suala hilo la Arusha kwa madai kuwa kufanya hivyo kunaweza kuleta maafa makubwa nchini.

Hayo yalisemwa jijini Dar es Salaam jana, na Katibu Mtendaji wa Baraza hilo, Bw. Mohamed Mtulia wakati akitoa tamko la kukemea vurugu za Mkoani Arusha zilizotokea Januari 5, 2011.

Alisema kuwa wamesikitishwa na kauli hizo ambazo zinaashiria matakwa ya kidini katika masuala ya kisiasa, kwa kuwa jambo hilo likiachiwa litaitumbukiza nchi katika machafuko ya kidini.

"Sisi wazee tunawaomba maaskofu na viongozi wengine wote wa kidini kuiacha siasa kwa wanasiasa, kwani kitendo cha maaskofu wa Arusha kukataa kumtambua Meya wa Jiji hilo ambaye pia amekataliwa na Chama cha Demokrasia na Maendeleo (CHADEMA) kinaleta wasiwasi wa kujitokeza viongozi wengine wa kidini na kujipa mamlaka ya kutowatambua viongozi wasiowakubali kama walivyofanya maaskofu hao," alisema Katibu Mtulia.

Alisema kuwa wanaamini kwamba Dkt. Willibrod Slaa aligombea urais katika uchaguzi uliopita wa mwaka 2010 na kama angekuwa 'chaguo la Mungu' basi angekuwa Rais na Amiri Jeshi Mkuu wa nchi, na bila shaka asingeridhia Mwenyekiti au Katibu wa chama chochote cha siasa apinge kwa maneno na vitendo, amri halali za mamlaka za kisheria zilizoundwa kwa mujibu wa katiba na sheria za nchi.

"Pamoja na kusikitishwa na nguvu iliyotumika ni wajibu wetu kuitafakari nguvu hiyo na je, ilikuwa lazima itumike au haikuwa lazima, hivi kikundi cha raia kinachoelekea kituo cha polisi kwa ajili ya kuwatoa watuhumiwa kwa nguvu kimedhamilia nini, na je, jamii inafahamu nguvu waliyonayo raia hao na wanaowaunga mkono?" alihoji Bw. Mtulia.

Aidha alisema kuwa  wazee hao wanaamini kuwa endapo uvamizi wa kituo cha polisi ambacho kinawahifadhi watuhumiwa, pamoja na silaha na nyaraka muhimu ungefanikiwa na silaha zikaangukia mikononi mwa raia wa kawaida wasio na nia njema, kungekuwa na uwezekano mkubwa wa kutumika vibaya na kuleta madhara makubwa.

"Ni dhahiri kuwa waliokusudia kuvamia kituo hicho wangefanikiwa na kupora silaha ili zisaidie kuwatoa watuhumiwa, hali ingekuwa mbaya sana na pia kama angalizo la Mkuu wa Jeshi la Polisi (IGP) lingefuatwa, yaliyotokea yasingetokea," alisema.

Kwa upande wake Mwenyekiti wa Baraza hilo Bw. Athuman Mwinyimvua alisema kuwa wanatoa pole kwa wale wote walioathiriwa na vurugu zile kwa kupoteza mali huku wengine wakipoteza maisha na wale waliojeruhiwa.