Mauaji Arusha ya kupanga-Mbowe

Na Grace Michael

CHAMA cha Demokrasia na Maendeleo (CHADEMA) kimesema kuwa mauaji yaliyofanywa na Askari Polisi mkoani Arusha yalipangwa na Rais Jakaya Kikwete pamoja na Chama Cha Mapinduzi (CCM) walihusika moja kwa moja katika
umwagaji huo wa damu.

Hayo yalisemwa jana na Mwenyekiti wa CHADEMA, Bw. Freeman Mbowe kwenye ibada ya kuwaombea waandamanji waliouawa na polisi kwa risasi, wakati wa maandamano ya amani yaliyofanyika Januari 5, mwaka huu.

"Rais Kikwete na serikali yake na chama chake cha CCM wanahusika moja kwa moja na damu iliyomwagwa kwa makusudi Arusha...Kikwete ni Amiri Jeshi Mkuu wa majeshi yote ya ulinzi na usalama. Aidha, chini ya Sheria ya Jeshi la Polisi, Inspekta Jenerali wa Polisi – ambaye ni mteuliwa wa Rais – anawajibika kufuata amri na maelekezo ya Waziri wa Mambo ya Ndani – mteuliwa mwingine wa Rais kuhusiana na udhibiti wa shughuli za Jeshi la Polisi.

"Kwa hiyo, kikatiba na kisheria, Jeshi la Polisi liko chini ya mamlaka ya Rais na wateuliwa wake kama Waziri wa Mambo ya Ndani na Inspekta Jenerali wa Polisi. Pamoja na mamlaka ya Rais juu ya Jeshi la Polisi, Kikwete mwenyewe alikwishatoa kauli na matamko hadharani ambayo yaliashiria kwamba Jeshi la Polisi la Tanzania lilikuwa linajiandaa kumwaga damu ya Watanzania ili kulinda utawala wake na wa chama chake," alidai Bw. Mbowe.

Mbali na hayo pia chama hicho kilitoa mapendekezo kwa kuitaka serikali kuwajibika kwa wananchi kama ilivyotamkwa na Katiba ya Tanzania kwa Waziri wa Mambo ta Ndani ya Nchi, Shamsi Vuai Nahodha na Inspekta Jenerali wa Polisi, Saidi Mwema wajiuzulu mara moja ili kuwawajibisha kama viongozi na wasimamizi wa juu kabisa wa Jeshi la Polisi la Tanzania.

Alisema kuwa kujiuzulu kwao kutapisha uchunguzi huru na wa kina wa matukio yote yaliyosababisha wananchi kuuawa, mamia kujeruhiwa na mamia wengine kukamatwa bila sababu yoyote na kuwekwa rumande na baadaye kufunguliwa mashtaka ya uongo ya jinai.

Aidha alisema kuwa Ispekta Jenerali wa Polisi Saidi Mwema, Kamanda wa Polisi wa Mkoa wa Arusha, Thobias Andengenye na wale wote walioamuru au kutekeleza amri ya kuvunja maandamano na mkutano halali, wafunguliwe mashtaka ya jinai kwa matumizi mabaya ya madaraka na kwa kusababisha mauaji ya wananchi wasiokuwa na hatia.

Kwa mujibu wa Bw. Mbowe, CHADEMA kinataka ilipwe fidia stahili kwa mujibu wa sheria husika za nchi kwa ndugu na kwa wale wote walioumizwa kwa namna yoyote ile au kuharibiwa mali zao kutokana na vitendo hivyo.

"Lakini pia tunataka mashtaka ya uongo ya jinai yaliyofunguliwa dhidi ya viongozi wa ngazi zote wa CHADEMA, wanachama, wafuasi na wananchi wengine wote yafutwe bila masharti yoyote kwa sababu maandamano na mkutano wa hadhara uliozuiliwa ulikuwa halali kwa mujibu wa sheria husika za nchi yetu," alisema Bw. Mbowe.

Alisema kuwa kwa vile uchaguzi wa viongozi wa Halmashauri ya Jiji la Arusha ndio chanzo cha mauaji ya wananchi na kwa kufahamu utaratibu haramu uliotumika kumpata Meya wa Jiji hilo, matokeo ya uchaguzi huo yafutiliwe mbali na uchaguzi mpya uitishwe haraka iwezekanavyo kwa kufuata sheria husika za nchi.

Aidha CHADEMA kimeendelea kusisitiza kuundwa kwa tume huru ya kimahakama kwa sababu historia ya tume nyingine ambazo zimeundwa kwa utaratibu wa rais kuteua watu anaowataka inaonesha kwamba zimefanya kazi zao za uchunguzi mafichoni bila kushirikisha wadau wengine na bila wananchi kufahamu kitu kinachoendelea.

Alisema kuwa ili kuhakikisha madai hayo yanatekelezwa, alielekeza viongozi, wanachama na wafuasi wote mikoani na wilayani kuandaa maandamano ya amani nchi nzima ili kulaani mauaji ya wananchi wa Arusha na kudai utekelezaji wa madai haya.

Akifafanua zaidi kuhusika kwa Rais Kikwete katika mauaji hayo, alisema kuwa pamoja na mamlaka ya Rais juu ya Jeshi la Polisi, yeye mwenyewe alishatoa kauli na matamko hadharani ambayo yaliashiria kwamba Jeshi la Polisi la Tanzania lilikuwa linajiandaa kumwaga damu ya Watanzania ili kulinda utawala wake na wa chama chake.

"Kwa mfano katika hotuba yake ya Mwaka Mpya aliyoitoa usiku wa Desemba 31, 2010, Kikwete alidai kwamba 'wapo baadhi ya wanasiasa na vyama vya siasa wamepanga kuchochea migomo vyuoni na maandamano ya wananchi mara kwa mara. Wao hasa wanachotaka ni ghasia kutokea na vyombo vya dola kuingilia, ati waiambie jumuiya ya kimataifa jinsi serikali yetu ilivyo katili...katika hotuba hiyo, Kikwete alizungumzia kile alichokiita wananchi kugeuzwa kuwa mbuzi wa kafara'," alinukuu baadhi ya maneno ya Rais Kikwete.

Bw. Mbowe alisema kuwa mauaji hayo yamedhihirisha wazi umuhimu wa kuwa na katiba mpya kwa ajili ya nchi na hii ni kwa sababu, 'katiba viraka' inayotumika sasa hivi haiheshimiwi hasa na watawala wenyewe kama ilivyoonekana kwenye uhuru wa kufanya maandamano ya amani na mikutano ya hadhara.Alisema kuwa matukio yaliyosababisha mauaji ya Arusha yanaonesha kwamba mfumo mzima wa kisheria na kitaasisi wa kuendesha chaguzi katika nchi unahitaji mabadiliko makubwa.

"Sasa ni muda muafaka wa kuhakikisha tunapata katiba mpya itakayohakikisha kwamba vyombo vya ulinzi wa wananchi vinakuwa chini ya udhibiti halisi wa wananchi au vyombo vyao vya uwakilishi. Sasa ni muda muafaka kuhakikisha kwamba tunapata katiba mpya itakayohakikisha kwamba mfumo wetu wa uchaguzi ni huru na wa haki kwa watu na vyama vyote," alisema Bw. Mbowe.

Alisema kuwa utaratibu ambao CHADEMA itauunga mkono na kushiriki kikamilifu ni ule utakaowezesha kufanyika kwa Mkutano wa Kitaifa wa Katiba ambao utawakilisha makundi yote ya kijamii katika uundaji wa Katiba mpya.

"Utaratibu wa kusubiri fadhila za Kikwete za kuteua wajumbe wa Tume ya Katiba haukubaliki tena na CHADEMA haitaubariki kwa kushiriki... CHADEMA itatumia uwezo wake wote kuhamasisha wananchi nchi nzima kuhakikisha wanapinga utaratibu unaopendekezwa na Kikwete na kuunga mkono utaratibu wa kidemokrasia wa kupata katiba mpya kwa kupitia Mkutano wa Kitaifa wa Katiba," alisema.

Alihusisha mauaji hayo na kisasi cha Uchaguzi Mkuu kwa viongozi wa CHADEMA wa ngazi zote na kwa wananchi wa Arusha kwa kudiriki kuisambaratisha CCM katika Uchaguzi Mkuu wa mwaka jana.

Alisema Jeshi la Polisi la Tanzania limelipa kisasi kwa niaba ya CCM kwa sababu wananchi wa Arusha wamediriki kutumia haki zao za kisheria kupinga mipango ya mafisadi kuingiza Meya wa Jiji la Arusha atakayelinda maslahi ya mafisadi na chama chao.

"Wananchi wa Arusha wamelipiziwa kisasi kwa sababu mafisadi wanajua wangeruhusu haki itendeke katika uchaguzi wa Meya wa Jiji la Arusha CCM ingesambaratishwa kama ilivyosambaratishwa katika Uchaguzi Mkuu," alisema.

Alisema kuwa mauaji hayo hayakuwa kisasi cha CCM dhidi wananchi wa Arusha tu bali ilikuwa ni kisasi pia dhidi ya wananchi wa Tanzania na dhidi ya CHADEMA, kwa sababu, kwa mara kwanza tangu mfumo wa vyama vingi vya siasa urudishwe mwaka 1992, Uchaguzi Mkuu wa 2010 ulionesha wazi kwamba CCM imeanza safari yake ya mwisho kuelekea ukingoni.

Alisema kuwa mara ya kwanza, CCM ilipoteza miji mikubwa karibu yote ya Tanzania, licha ya uchakachuaji wa kura, rushwa na uharamia wa kutisha, ilipoteza Jiji la Dar es Salaam, Jiji la Mwanza, Jiji la Arusha, Jiji la Mbeya na miji mikubwa kama vile Moshi, Iringa na Musoma.

Kutokana na hali hiyo Bw. Mbowe aliitangaza Januari 5, 2011 kuwa siku ambayo haitasahaulika katika historia ya Jiji la Arusha, na historia ya Tanzania.

"Ni siku ambayo Jeshi la Polisi la Tanzania ambalo limepewa wajibu wa kisheria wa kulinda amani, sheria na utulivu, kugundua na kuzuia uhalifu, kukamata na kudhibiti wahalifu na kulinda mali za wananchi; liliamua kwa makusudi kuacha kutimiza wajibu wake kisheria na kujipa wajibu mwingine wa kuwa ni Jeshi la kuvunja amani, kukiuka sheria, kuvuruga utulivu, kufanya uhalifu na kuharibu mali za wananchi.