Dowans kuhatarisha uhalali wa serikali

"Kama watalipa faster faster (haraka) watakuwa wameongeza upana wa hoja yangu, badala ya kuliomba bunge kumpigia kura Ngeleja ya kujiuzulu, nitaliomba bunge kadri litakavyoona inafaa, lipige kura ya kutokuwa na imani na serikali," alisema David Kafulila.

Na Tumaini Makene

SAKATA la Kampuni tata ya Dowans bado tete na
bichi sasa imeelezwa kuwa kama halitafanyiwa kazi kwa umakini litaipotezea serikali uhalali wa kisiasa wa kuongoza wananchi walioiweka madarakani.

Iwapo serikali itafikia uamuzi wa kuilipa mabilioni ya fedha kampuni hiyo bila ukweli kuwekwa bayana ili kuondoa 'mazonge mazonge' yanayolizunguka sakata hilo, utakuwa uamuzi mbaya, ukifananishwa na kujitia kitanzi.

Kwa mujibu wa Mbunge wa Kigoma Kusini (NCCR-Mageuzi), Bw. David Kafulira, kama serikali itaendelea na mipango yake ya 'fasta fasta' kuilipa Dowans sh. bilioni 94 kama ilivyoamuriwa na Mahakama ya Kimataifa ya Usuluhishi wa Migogoro ya Kibiashara (ICC) kabla ya mkutano ujao wa bunge, ijiandae kupigiwa kura ya kutokuwa na imani nayo.

Akizungumza jana Dar es Salaam, katika mkutano wa wabunge wasiokuwa katika kambi rasmi ya upinzani bungeni na waandishi wa habari, Bw. Kafulila alilifananisha sakata hilo na kashfa maarufu ya Goldenberg nchini Kenya.

Alisema "inashangaza kuona serikali inakuwa na speed (kasi) ya ajabu kutaka kuilipa Dowans eti kwa sababu ni suala la kisheria, mbona hatujaona speed hiyo katika kuwalipa walimu waliokuwa wakiidai serikali kisheria pia, au kwa nini hatuoni kasi hiyo katika kuwalipa wastaafu wa iliyokuwa Jumuiya ya Afrika Mashariki, wanaoidai kisheria.

"Serikali itambue wazi kuwa hili si suala la lelemama wala masihara...Ngeleja (William, Waziri wa Nishati na Madini) asicheze na moto wa Dowans, chimbuko lake ni kubwa liliwahi kuiangusha serikali, alipojiuzuru waziri mkuu. Asikurupuke kufanya maamuzi. Maana hata ndani ya serikali inaonekana hawana mwafaka juu ya suala hili," alisema na kuongeza;

"Serikali iwe makini kuna mazonge mazonge mengi katika hili, ukweli haujajulikana. Serikali inapoteza legitimacy (uhalali) wa kisiasa wa kutawala, suala hili litaiondoa CCM madarakani kama kashfa ya Goldenberg ilivyoitafuna na kuiondoa KANU na Moi (Rais Mstaafu wa Kenya, Daniel Arap) madarakani.

"Kashfa ile nchini Kenya ilianza miaka ya 1993 huko, hivi hivi, lakini ikaja ikaiangusha KANU na Moi. Unajua unapopoteza uhalali wa kisiasa wa kuongoza unaweza kusababisha machafuko, hasa katika wakati huu ambapo kuna tatizo kubwa la uadilifu wa viongozi. Waache hoja iende kwenye mkaa wa moto wa bunge, kisha ndiyo walipe."

Ingawa alisema mpaka sasa hajajibiwa rasmi kama hoja yake itawasilishwa katika mkutano wa pili wa Bunge la 10 uliopangwa kuanza Februari 8, Bw. Kafulila aliongeza kuwa iwapo serikali itaamua kufikia maamuzi ya kuilipa Dowans, itakuwa imepanua wigo wa hoja yake binafsi, kwani ataliomba bunge 'kadri linavyoona' lipige kura ya kuiangusha serikali.

Mpaka sasa hoja yake hiyo, ambayo aliiwasilisha ofisi za bunge Desemba 10 mwaka jana na kujibiwa Desemba 14 kuwa inafanyiwa kazi, ina sehemu mbili, mgawo wa umeme unaoendelea kuathiri uchumi na hukumu ya ICC iliyoiamuru TANESCO kuilipa Dowans sh. bilioni 94 kwa kuvunja mkataba wa kuzalisha umeme.

"Hatuwezi kuendeshwa kwa mambo ya mission town (ujanja ujanja wa mjini), kama watalipa faster faster (haraka) watakuwa wameongeza upana wa hoja yangu, badala ya kuliomba bunge kumpigia kura Ngeleja ya kujiuzulu, nitaliomba bunge kadri litakavyoona inafaa, lipige kura ya kutokuwa na imani na serikali.

"Ipunguze speed ya kulipa, mbona hatuioni speed ya namna hiyo sehemu nyingine...pia kama bunge litaona kuna haja ya taarifa ya Mwakyembe kusomwa yote pia hakuna shida," alisema Bw. Kafulira.

Akiunga mkono hoja ya Bw. Kafulira kuwa kamwe nchi na Watanzania wasitarajie kuendelea kiuchumi kwa matatizo ya umeme yaliyopo nchini,  Mbunge wa Mkanyageni (CUF), Bw. Mohamed Habib Mnyaa, alisema kuwa uzalishaji na mahitaji (matumizi) ya umeme ni moja ya vigezo vinavyotofautisha mtu mmoja mmoja au nchi moja na nyingine, katika maendeleo ya kiuchumi.

"Kwa maana ya kiinjinia ukiuliza maana ya maendeleo ni nini, utaambiwa katika sentesi moja tu, kuwa mtu au nchi inayotumia umeme mwingi;

"Kafulila hapa kasema kuwa mahitaji ya umeme Tanzania ni megawati elfu moja mia tano, lakini wenzetu South Afrika (Afrika Kusini) mahitaji yao ni megawati arobaini na mbili elfu (42,000), tofauti hiyo ndiyo iliyopo pia katika pengo la namna nchi hizi kila moja kimaendeleo," alisema Bw. Mnyaa ambaye pia alikuwa mjumbe wa Kamati Teule ya Bunge iliyoongozwa na Dkt. Mwakyembe. 

Machafuko Arusha na Katiba Mpya

Mapema, Mwenyekiti wa kamati ya wabunge wasiokuwa katika kambi rasmi ya upinzani bungeni, Bw. Hamad Rashid Mohamed (Wawi-CUF) alisema kuwa machafuko ya Arusha yamesababishwa na serikali kushindwa kutimiza wajibu wake, hasa wa kuwasiliana na raia wake katika namna nzuri, kuepusha madhara.

Alisema ingawa mauaji hayo si mara ya kwanza kutokea nchini, akikumbushia mauaji ya Zanzibar na Mwembechai, Bw. Hamad alionekana kushangazwa na tabia inayoota mizizi ya viongozi kutowajibika linapotokea suala la uvunjifu wa utawala bora, hali ambayo itaifanya nchi isitulie.

"Tunapenda kutoa pole kwa wafiwa. Mola awalaze marehemu mahala pema peponi. Tumejifunza mengi kutokana na hilo, ingawa si mara ya kwanza...sisi tulipoteza takribani vijana 43 ingawa matangazo yake yalikuwa kama amekufa mtu mmoja, Mwembechai pia walikufa watu wengi...kote huko hakukuwa na publicity (haijatangazwa) kama ya Arusha.

"Ninachomaanisha kusiwe na double standard katika mambo haya...suala la Arusha kuna pande mbili, serikali na raia wake...raia wana haki zao na serikali ina majukumu yake...serikali inapaswa kuboresha mawasiliano na raia wake ili kuepusha madhara...huwezi kuruhusu maandamano leo halafu asubuhi ghafla unakataa.

"Lakini pia serikali inaweza kuja na sababu nzito isiyoweza kusema hadharani hasa wakati huu ambapo dunia ina mambo ya ugaidi na vitu vingine, lakini ni jukumu la serikali kuboresha mawasiliano kwa namna ambayo hata raia wanaozuiwa waridhike kuwa kuna suala la msingi.

"Lakini la pili, kuna suala la kuwajibika...kuna matatizo ya serikali au viongozi kuwajibika, hili limekuwa tatizo la msingi sasa nchini, serikali lazima iwajibike, kutowajibika kunaifanya nchi isitulie maana kuna watu wanakuwa hawajaridhika," alisema Bw. Mohamed.

Akizungumzia suala la katiba mpya, Bw. Hamad ambaye alikuwa Mkuu wa Kambi ya Upinzani Bungeni katika bunge lililopita, alisema kuwa ni muhimu kuwa na katiba itakayotokana na wananchi, ambayo pia haitaacha kipengele muhimu cha kuwahusisha wananchi kila serikali inapotaka kufanya maamuzi makubwa nchini.

Alitolea mfano wa Tanzania Visiwani, ambako Serikali ya Umoja wa Kitaifa ya Zanzibar, haiwezi kufanya jambo lolote kubwa linalogusa maslahi ya wananchi bila kuitisha kura ya maoni ya Wazanzibar wote, kwani ndivyo marekebisho ya 10 ya Katiba ya Zanzibar yaliyofanyika mwaka jana, yanavyosema.

"Pia wananchi wapewe nafasi ya kusema ili iandikwe katika katiba wanataka mfumo wa aina gani wa serikali nchini. Suala hili sioni likizungumzwa katika mijadala inayoendelea...hatuwezi kuacha suala hili katika sera za vyama vya siasa, CUF wanasema serikali tatu, CCM serikali mbili kuelekea moja, NCCR nao tatu.

"Masuala ya msingi kama haya yanapaswa kuwekwa katika katiba si ilani ya vyama, ukienda Marekani au Uingereza leo yako mambo ya msingi ambayo hata akija nani hawezi kuyabadili anavyotaka kwa sababu tayari wananchi wa Marekani au Uingereza walishaamua," alisema Bw. Hamad akiwa na matumaini makubwa kuwa katiba mpya itapatikana.