Aliyesahaulika mkasi tumboni afariki dunia

Na Waandishi Wetu

MGONJWA aliyefanyiwa upasuaji katika Hospitali ya Taifa ya Muhimbili (MNH) na kudaiwa kusahaulika mkasi tumboni, Scolastika Rwambo (43), mkazi wa Kigogo, alifariki usiku wa kuamkia jana hospitalini hapo.Kwa mujibu wa msemaji wa
familia hiyo, Bw. Peter Rwambo, ndugu yao, ambaye ni kocha wa timu ya Wizara ya Mambo ya Ndani na Mjumbe wa Serikali ya Mtaa wa Matokeo, Kigogo Luhanga, alifariki saa 9 usiku wa kuamkia jana, wakati akiendelea kupatiwa matibabu hospitalini hapo.

Alisema wamepata na mshtuko kutokana na kifo cha ndugu yao huyo na wameiomba serikali kufanya uchunguzi ili kubaini chanzo cha uzembe huo na kuwawajibisha wote waliohusika.

Wanandugu hao wameshangazwa na baadhi ya watendaji wa hospitali hiyo kuwakataza kuchukua picha ya mgonjwa huyo ICU iliyopigwa na kuonyesha mkasi huo tumboni na risiti walizolipia kwa ajili ya huduma hospitalini hapo.

Kwa mujibu wa Bw. Rwambo wanafanya jitihada kuendelea kufuatilia vielelezo hivyo na endapo watashindwa kuvipata watawasiliana na wanaharakati wa haki za binadamu ili waweze kuwasaidia kuvipata.

Mgonjwa huyo alikufa saa chache baada ya Mganga Mkuu wa Serikali, Dkt. Deo Mtasiwa, kusema wizara yake imeagiza uchunguzi wa tuhuma zinazowakabili madaktari dhidi ya mgonjwa huyo zifanyike haraka iwezekanavyo.

Ofisa Uhusiano wa MNH, Bw. Aminiel Aligaesha alisema suala hilo linashughulikiwa na majibu yatatolewa baada ya uchunguzi kufanyika.
Scolastika alifikishwa hospitalini hapo mwishoni mwa Septemba mwaka huu, ambapo alilazwa na kufanyiwa upasuaji wa tumbo Oktoba 4, mwaka huu.

Baada ya upasuaji huo aliruhusiwa kurudi nyumbani lakini katika kipindi chote nyumbani tumbo lilikuwa likimsumbua na kulazimika kurudishwa hospitalini hapo ambapo alipimwa na kugundulika kuwa kuna mkasi tumboni mwake.