Majambazi yamiminia risasi basi, yaua abiria.

*Polisi watupa bunduki kwa kuogopa
*Basi laharibiwa, abiria 23 wajeruhiwa

Na. Prosper Kwigize, Kibondo.
MAJAMBAZI nane wakiwa na silaha za kivita wameshambulia na kuteka gari la abiria na kusababisha kifo cha abiria mmoja na wengine kujeruhiwa kabla ya kupora mali mbalimbali za
abiria pamoja na bunduki mbili za polisi waliokuwa wamesindikiza basi hilo.

Tukio hilo limetokea lilitokea jana katika eneo la Mukugwa wilayani Kibondo mkoani Kigoma kilomita takribani 30 kabla ya kufika  mjini Kibondo, ambako majambazi hayo yalilishambulia basi la kampuni ya Golden Inter City Express lenye namba za usajiri T457 ACR linalofanya safari zake kati ya Kigoma na Mwanza.

Kwa mujibu wa mwenyekiti wa Kamati ya Ulinzi na Usalama Wilaya ya Kibondo, Bw. Dan Makanga ambaye pia ni Mkuu wa wilaya hiyo, majambazi hao hawakuweka kizuizi chochote na kwamba waliibuka kutoka porini na kuanza kurusha risasi mfululizo na kuharibu vibaya basi hilo.

“Majambazi wanne wakiwa na silaha nzito walijitokeza barabarani na kuaanza kurusha risasi hali iliyomlazimu dereva wa basi hilo Bw. Method Chang’a kulisimamisha, wakatoa amri kwa askari polisi waliokuwemo ndani ya basi hilo kusalimisha silaha na kadri walivyochelewa kufanya hivyo  ndivyo majambazi hao walivyozidi kupiga risasi sehemu mbali  mbali na kusababisha abiria wengi kujeruhiwa na risasi hizo,”  alisema mkuu huyo wa Wilaya ya Kibondo.

Imeelezwa kuwa kutokana na kuendelea kupigwa kwa risasi hizo kwa fujo huku askari polisi nao wakijaribu kujihami na kuwalinda abria bila mafanikio, walilazimika kuzirusha nje ya basi bunduki zao kitendo kilichowapa fursa majambazi kuliteka na kuanza kupora abiria mmoja baada ya mwingine.

Kaimu Mganga Mkuu wa Wilaya ya Kibondo Dkt. Florian Ntinuga alisema kuwa abiria aliyeuawa ni Katibu wa Jumuiya ya Umoja wa Vijana wa CCM Musoma Vijijini mkoani Mara Bw. Wilfred Peter Muga na abiria 23 wamejeruhiwa na kufikishwa katika Hospitali ya Wilaya ya Kibondo. Watatu kati yao hali zao ni mbaya na watasafirishwa kwenda Hospitali ya Rufaa Bungando mkoani Mwanza kwa matibabu zaidi.

Majambazi hao ambao hawakuwa wameficha sura zao waliweza kutokomea porini bila kukamatwa huku wakiondoka na silaha mbili aina ya SMG zikiwa na magazine nne mali ya Jeshi la Polisi na msako mkali katika pori hilo unaendelea ili kuwatia mbaroni majambazi hayo.

Eneo la Mkugwa lilipotokea tukio hilo lilikuwa kambi ya wakimbizi mchanganyiko kabla ya kufungwa na wakimbizi hao kuhamishiwa wilayani Kasulu na eneo hilo kufunguliwa
shule ya sekondari ya wasichana.

Hili ni tukio baya la pili kutokea eneo hilo.  Miezi minne iiliyopita majambazi yalilitega gari dogo la abiria na kumuua mwalimu Deo Kato ambaye pia alikuwa Mwenyekiti wa Parokia ya Kanisa Katoliki Kibondo akiwa njiani kutoka Kasulu kwenda Kibondo.

Juhudi za kumpata Kamanda wa Polisi Mkoa wa Kigoma, George Mayunga hazikufanikiwa kutokana na simu yake kuwa katika matumizi kwa  muda mrefu.

Hata hivyo Mkuu wa Polisi wilayani Kibondo,  Innocent Rwelamira amethibitisha kutokea kwa tukio hilo na kuongeza kuwa askari wawili waliokuwa na silaha aina ya SMG wakisindikiza basi hilo wameporwa silaha zao na kujeruhiwa.