Z'BAR TUSILAUMIWE

• ZMA YATOA TAMKO ZITO,YAKIRI KUISAJILI

 Na Mwajuma Juma, Zanzibar

MKURUGENZI wa Mamlaka ya Usafiri wa Baharini Zanzibar (ZMA), Bw. Abeid Omar Maalim, amesema Zanzibar haipaswi kulaumiwa kutokana na tukio la kukamatwa kwa meli ambayo ilibeba shehena ya bangi nchini Italia.

Bw. Maalim aliyasema hayo jana wakati akizungumza na waandishi wa habari Zanzibar katika kumbukumbu ya kutimiza miaka miwili tangu kuzama kwa meli ya Mv Spice Islander.

Alisema meli hiyo ambayo inamilikiwa na Kampuni ya Gold

Star, iliyopo kwenye Visiwa vya Marshal, Amerika ya Kusini ilisajiliwa Zanzibar mwaka 2011 ambapo usajili huo hauna maana kuwa Zanzibar inahusika na tukio hilo.

"Kweli meli hii ilisajiliwa Zanzibar, jambo la msingi ni kuangalia bangi iliyokamatwa ilipakiwa wapi na nani anahusika na biashara hiyo," alisema Bw. Maalim.

Aliongeza kuwa, kama itabainika mmiliki wa meli hiyo anahusika moja kwa moja na usafirishaji huo, ZMA haitasita kuchukua hatua za kufuta usajili na kuangalia sheria nyingine.

"Kwa mujibu wa sheria za usajili wa meli, kuna kipengele ambacho mmiliki anajifunga kwa kusema meli yake haitasafirisha biashara haramu ikiwemo ya dawa za kulevya, ikibainika kafanya hivyo meli yake itafutiwa usajili," alisema.