Wanachama 331 MIMCO waanza kugawiwa viwanja

Na Heri Shaaban

 WANACHAMA 331 wa Umoja wa Wauza Mitumba wa soko la Mchikichini (MIMCO)wameanza kupewa viwanja kwa kila mwanachama wa umoja huo ili wajenge nyumba za kuishi.

Viwanja hivyo walivyopewa wanachama wameuziwa na umoja wao wa MIMCO baada kununua shamba zaidi ya heka 20 eneo la Pemba Mnazi Wilayani Temeke,ambapo kila mwanachama hulipia sh.milioni 1.2 pamoja na kupatiwa leseni ya kiwanja kilichopimwa na Serikali.

Akisoma taarifa ya Bodi ya MIMCO Mwenyekiti wa Bodi hiyo, Bw.

Ajali Mohamed alisema kila mwanachama hai wa umoja huo ambaye hadaiwi ada atapatiwa eneo la kujenga.

Alisema kila mwanachama atagawiwa eneo la kujenga baada kukamilisha taratibu na fedha atalipa kwa awamu tofauti kwa kuanzia sh. 400,000.

"Madhumuni ya wanachama wangu kuwagawia kila mmoja kiwanja ni ili wajenge nyumba za kuishi watoke katika nyumba za kupanga halafu waweze kupata mikopo kwa urahisi kutokana dhamana ya leseni zao," alisema Bw. Mohamed.

Bw.Mohamed alisema umoja huo ulianzishwa mwaka 2005 mwezi Mei kikiwa na wanachama 331 kati yao wanawake 24 wanaume 307 na wajumbe wanane wa bodi hiyo.

Aliwataka wanachama wa umoja huo kulipa ada kila mwaka ili umoja huo uweze kukua sambamba na kukuza hisa zao.

Pia bodi hiyo imependekeza viwanja hivyo wauziwe wanachama walio hai ambao hawadaiwi hisa wala ada na mtu atakayepewa kiwanja alipe pesa ndani ya miezi mitatu ili waweze kupata fedha kwa maendeleo ya MIMCO na wanachama wake.

Kwa upande wake Mwenyekiti Mstaafu wa soko la Mchikichini Bw. Deo Mkali, aliwataka wanachama wa MIMCO wachague viongozi bora na si bora viongozi ili chama hicho kisipoteze mwelekeo katika uongozi wake.

Bw.Mkali alisema chama hicho kinapofanya chaguzi zake kichague viongozi bora na wenye upeo katika utendaji ambao watasaidia chama kupiga hatua zaidi katika elimu ya ujasiriamali.

Pia alikitaka chama hicho kiwape kipaumbele wanawake kuwa sehemu ya uongozi wa bodi na viwanja vigawiwe pasipo dhana ya ubaguzi.

"Nimestaafu kwa hiari yangu ila natoa wosia kwa chama tujiepushe na wanachama wanaojitokeza kuleta vurugu na uchochezi sokoni kwa ujumla pamoja na kujiepusha na masuala ya udini, siasa ukabila na ubaguzi vinavyoashiria kujitokeza sokoni kwa sasa,"alisema Bw.Mkali.