Viongozi CCM Tabora wazomewa mkutanoni

Na Mwandishi Wetu, Tabora

 BAADHI ya viongozi wa Chama Cha Mapinduzi (CCM) wamejikuta kwenye wakati mgumu baada ya kukumbwa na izomeazomea kutoka kwa wananchi wakati wa mkutano wa hadhara.

Tukio hilo lilitokea kwenye mkutano huo ambao ulifanyika kwenye viwanja vya stendi ya mabasi ya zamani ambapo CCM ilikuwa ikifanya mkutano wake.

Mkutano huo wa hadhara ulifanyika baada ya viongozi wa CHADEMA wakiongozwa Naibu Katibu Mkuu, Zitto Kabwe, kufanya mkutano eneo hilo na kusema wabunge wa CCM Tabora hawawatendei haki wapiga kura wao.

Alisema viongozi wa CHADEMA watapiga kambi mkoani Tabora kuwatetea wananchi kuhusiana na haki zao.

Hatua hiyo iliwafanya CCM nao kujibu mapigo kwa baadhi ya viongozi wake akiwemo Mbunge wa Jimbo la Tabora Mjini, Aden Rage, kujibu mapigo.

Dalili za zomeazomea zilianza mapema kwani baadhi ya wananchi walianza

vicheko na kejeli kwa viongozi wa CCM, huku wengine wakisikika wakisema hawataki majigambo, matusi bali wanataka barabara za lami

Tabora-Nzega, Tabora-Urambo na ile ya Itigi-Tabora, huku wengine wakisema Peoples Power’.

Wakati katibu wa CCM Mkoa wa Tabora Idd Ame,akimwaga sera zake,wananchi wachache waliokusanyika kwenye mkutano huo walianza kuzomea kila katibu huyo alipokuwa akitoa kauli kuhusu CHADEMA.

"Ndugu zangu wananchi hebu angalieni mnavyodanganywa, hivi hawa CHADEMA wanajigamba kujenga barabara wakati wao sio watoaji wa fedha na fedha zinatolewa na Serikali ya CCM sio hao CHADEMA, wanafiki waongo," alisema.

Alisema Zitto anaacha jimbo lake Kigoma kwenda Tabora kuwafundisha siasa.

Baada ya katibu huyo kutamka maneno hayo, ndipo wananchi walipoanza kuzomea kwa nguvu na kudai wanataka sera na si matusi, huku wengine wakisema CCM waongo siku zote walikuwa wapi kuja kufanya mikutano hadi CHADEMA waende.

Zomeazomea ilizidi ambapo Katibu wa CCM Mkoa wa Tabora,alipoendelea kutamka kuwa endeleeni na huo ujinga wenu hapa tutaumizana hapa, alizidisha hasira za wananchi huku nao wakijibu mapigo kuwa; “Sawa tu tuumizane tumechoka na ahadi zenu za uongo.”

"Hapa tuko kamili endeleeni kuzomea tu, tutaumizana kweli kweli hapa msifikiri hatuwezi na tutawashtaki viongozi wa CHADEMA Tabora kwa kutufanyia fujo kwenye mkutano wetu,” alisema kada huyo wa CCM.

Wakati katibu huyo akitamka hayo,mjumbe wa NEC, John Mchele, alitoka jukwaani na kwenda kumnong`oneza katibu huyo.