CCM yakosoa ujenzi daraja Rau

Na Florah Temba, Moshi

 KAMATI ya Siasa ya Halmashauri Kuu ya Chama cha Mapinduzi na Sekretarieti ya halmashauri kuu ya chama hicho Manispaa ya Moshi mkoani Kilimanjaro, imesema haijaridhishwa na ujenzi wa daraja la Rau Mbokomu linalojengwa na Halmashauri ya Manispaa ya Moshi, hivyo kuitaka manispaa hiyo kupitia upya ujenzi huo na kuhakikisha magari makubwa hayapiti, hadi pale litakapothibitishwa kuwa liko imara.

Daraja hilo ambalo litagharimu sh. milioni 102 bado halijakamilika lakini limeonekana kubomoka, hali ambayo imesababisha watu kuhofia kuwa

hata kama litakamilika na kukabidhiwa linaweza kuleta maafa kutokana na kujengwa chini ya kiwango.

Akizungumza wakati wa ukaguzi wa miradi iliyotekelezwa na manispaa kwa kipindi cha mwaka 2012/2013 Katibu wa CCM Manispaa ya Moshi, Aluu Segamba, alisema wao hawajaridhishwa na ujenzi wa daraja hilo ambalo lina umuhimu mkubwa kwa wananchi.

"Sisi si wataalamu lakini naomba niseme kuwa hatujaaridhishwa na ujenzi wa daraja hili,kwani haiwezekani daraja lijengwe halijakamilika lakini libomoke, kunahitajika uangalizi mkubwa hapa ili kuhakikisha daraja hili linakamilishwa kwa kiwango kinachostahili ili kuokoa maafa yatakayoweza kutokea kutokana na kukamilisha chini ya kiwango," alisema Segamba.

Aidha Segamba alisema kwa sasa wanaangalia uwezekano wa kutuma wataalamu ili kwenda kukagua daraja hilo na kujiridhisha kabla halijaanza kutumika.

Katibu huyo alishauri daraja hilo lisitumike kupitisha magari makubwa hata baada ya kukabidhiwa hadi pale watakapokwenda wataalamu kukagua na kujiridhisha hatua ambayo itasaidia kuepuka maafa.

Mjumbe wa NecManispaa ya Moshi, Agrey Marialle alisema licha ya taarifa kutolewa kuwa daraja hilo limeshakamilika kwa asilimia 80 bado kazi ni kubwa na inahitaji umakini wa hali ya juu.

Kwa upande wake mkadiriaji wa ujenzi manispaa hiyo, Charles Huka akizungumza kwa niaba ya mkandarasi wa manispaa hiyo alisema wao wanaridhishwa na ujenzi wa daraja hilo ambalo limekamilika kwa asilimia 80 na kwamba linatarajiwa kukamilika mwezi Juni mwaka huu.

Kwa upande wake Eveta Lyimo msaidizi wa mchumi wa manispaa hiyo alisema mradi wa daraja hilo ambao uliibuliwa na wananchi kama mradi wa TASAF ulianza kujengwa mwaka 2009/2010 na kwamba ulihitajika uwe umekamilika lakini kutokana na mvua umeshindwa kukamilika kwa wakati uliopangwa.