Viongozi wa dini waombea mradi wa maji

Na Steven William, Muheza

VIONGOZI wa dini ya Kikristo na Kiislamu, katika Kijiji cha Lusanga, Wilaya Muheza, mkoani Tanga, wameshiriki katika
ibada ya kuombea mradi wa kisima kirefu cha maji ili ujenzi
wake uweze kukamilika haraka na kuwasaidia wananchi.


Kisima hicho kinajengwa katika eneo la Kitisa Estate ambapo maombi hayo yalifanyika mwishoni mwa wiki yakiongozwa
na Shekhe Mkuu wa Msikiti wa kijiji hicho, Abdi Hamisi
Mdoe na Mchungaji wa Kanisa la Angilikana, Haidano Kamote.

Maombi hayo pia yalimshirikisha Mkuu wa Wilaya hiyo, Bi.
Subira Mgalu, Mhandisi wa Maji wilayani humo, Patric Hansi
na viongozi mbalimbali wa chama na Serikali.

Bi. Mgalu aliwashukuru viongozi wa dini kwa kukiombea kisima hicho ili ujenzi wake ukamilike mapema na kupunguza tatizo la
maji ambalo linakwamisha maendeleo ya wananchi.

Alisema mradi huo hadi kukamilika kwake utaghalim sh. milioni 800, ambapo awamu ya kwanza fedha zilizotumika sh. milioni 229 hivyo wanasubiri fedha za ujenzi wa awamu ya pili.

“Nawaomba viongozi wa dini muwaombee viongozi wa nchi ili wapate nguvu za kuwatumikia wananchi na kufanikisha miradi mbalimbali ya maendeleo ikiwemo ya maji,” alisema.

Aliongeza kuwa, mradi huo utawanufaisha wananchi wa Vijiji vya Mamboleo, Kitisa, Lusanga na Muheza Mjini ambapo kwa sasa Mfuko wa Jimbo uliopo chini ya mbunge wa jimbo hilo, Herbert Mntangi, umetoa fedha za kutandaza mabomba.