Msondo, Sikunde uso kwa uso Idd Mosi

Na Mwandishi Wetu

BENDI kongwe nchini na zenye upinzani mkubwa, Msondo Music 'Baba ya Muziki na DDC Mlimani Park Orchestra 'Sikinde Ngoma ya Ukae', zinatarajia kupambana siku ya Iddi Mosi kwenye viwanja vya Leaders Club, Kinondoni.

Kutokana na mpambano huo wa aina yake mashabiki wa bendi hizo, tayari wameanza kutambiana ambapo kila mmoja kujitapa kuibuka kidedea.

Akizungumza Dar es Salaam jana Mratibu wa mpambano huo, Joseph Kapinga alisema kwamba shoo hiyo imeandaliiwa na Kampuni za Keen Arts na kudhaminiwa na kinywaji cha Konyagi.

Kapinga alisema mchuano huo ni maalumu kwa ajili ya kusherehekea sikukuu ya Idd el Fitr, ambao utaamua ni bendi ipi bora kati yao mwaka huu.

"Ili kuondoa malalamiko ya kuhujumiwa, kila bendi itatumia jukwaa lake kwa kupiga kwa saa moja," alisema Kapinga.

Kapinga alisema kampuni yake inafanya mipango ya kuwapeleka Leaders wapenzi wa bendi hizo kutoka wilaya zote za Dar es Salaam ili kushuhudia mpambano huo.

Alisema burudani zataanza kuanzia saa nane mchana hadi majogoo.

Bendi hizo mwaka jana zilipambana katika Ukumbi wa Sigara Club, Chang'ombe kwenye sikukuu ya Krismasi ambapo zilitoka sare.

hata hivyo Kapinga alisema mwaka huu mshindi ni lazima apatikane hata kwa kurusha shilingi.