Viongozi wa Kiislamu yawakuta makubwa *Msafara wao waingia matatani, polisi yatoa ufafanuzi

Rehema Maigala na Stella Aron

JUMUIYA ya Kiislamu ya Hayatul-Ulamaa, imelitaka Jeshi la Polisi nchini kutoa tamko juu ya askari wake kuwalaza chini, kuwapekua viongozi wa dini hiyo waliokuwa wakitoka katika mihadhara wakidhaniwa kuwa wahamiaji.


Tukio hilo lilitokea jana asubuhi mjini Bagamoyo, mkoani Pwani baada ya polisi wilayani humo, kuwakamata na kuwaweka chini ya ulinzi viongozi hao wakiwa katika msafara wakitokea jijini Tanga kwenda Dar es Salaam.

Viongozi hao ni mashekhe wa jumiiya hiyo na viongozi watatu kutoka nchini Yemen ambao baada ya kupekuliwa na polisi hao, walitoa taarifa kwa wenzao juu ya tukio hilo.

Akizungumza na Majira, mmoja wa mashekhe aliyekuwa katika msafara huo ambaye pia ni Mjumbe wa Umoja wa Wanazuoni wa Kiislamu na kiongozi wa mihadhara nchini, Shekhe Nurdin Kishki, alidai kusikitishwa na kitendo hicho ambacho pia kimewahusisha wageni wao kutoka nje ya nchi.

Akizungumzia tukio hilo, Shekhe Kishki, alisema msafara huo ulikuwa ukitoka Arusha na Tanga kwenda Dar es Salaam ukipitia njia ya Bagamoyo ili kuepuka foleni ya Barabara ya Morogoro.

Baada ya kufika Bagamoyo, walishangaa msafara wao ukisimamishwa na watu waliovaa kiraia wengine wakiwa na silaha.

Alisema baada ya kusimama, waliamuriwa kutelemka katika magari, kulala chini na kuwapekua wakipewa masharti mbalimbali na kutakiwa kutulia.

“Tuliwaeleza kuwa sisi ni mashekhe na tulikuwa tukitoka kwenye mikutano katika mikoa ya Arusha na Tanga, awali tulijua tumetekwa na majambazi lakini baada ya muda, tuligundua walikuwa polisi,” alisema Shekhe Kishki.

Aliongeza kuwa, polisi waliwapeleka Kituo cha Bagamoyo wakiwa chini ya ulinzi mkali kutokana na hisia ya msafara huo kuwa wa wahamiaji.

Akizungumzia sakata hilo, Kamanda wa Polisi mkoani humo,  Ernest Mangu, alikiri kukamatwa kwa Waislamu hao ambao walikuwa wakitoka Tanga kwenda Dar es Salaam.

Alisema viongozi hao walikuwa na msafara wa magari mawili ambapo polisi wa doria waliwatilia shaka na kuwasimamisha ili kupata maelezo yao lakini walipotakiwa kusimama walikaidi.

Mkuu wa Mkoa huo Bi. Mwamtumu Mahiza, alikiri kutokea kwa tukio hilo lakini hakuweza kuthibitisha kama viongozi hao walilazwa chini na kupekuliwa.