Minziro atamba kufanya vyema Kagame Cup

Na Shufaa Lyimo

Kocha Msaidizi wa Yanga, Filex Minziro amesema watafanya vyema katika mashindano ya Kombe la Kagame yanayotegemea kuanza mwezi huu.

Yanga ambao ni mabingwa watetezi wa kombe hilo imepangwa Kundi C pamoja na timu za APR (Rwanda), Wau Salamu (Sudan Kusini) na Atletico ya Burundi.

Akizungumza na mwandishi wa habari hizi juzi jijini Dar es Salaam, Minziro alisema licha ya kupangwa kundi moja na timu zenye viwango bado wana nafasi ya kufanya vizuri katika mashindano hayo.

"Mimi sina wasiwasi na wachezaji wangu kwani wana uwezo wa kufanya vyema na tuna uhakika tutacheza fainali," alisema Minziro.

Alisema wachezaji waliosajiliwa wameleta chachu ya ushindani katika kikosi hicho, kitu kinachomfanya kila mchezaji kujua jukumu lake uwanjani.

Timu hiyo Jumamosi katika Uwanja wa Taifa, ilicheza mechi ya majaribio dhidi ya Express ya Uganda na kuibuka na ushindi wa mabao 2-1.