Business Times yainyuka Jeshi Stars

Na Elizabeth Mayemba

TIMU ya netiboli ya Kampuni ya Business Times Limited (BTL Queens), imeanza vizuri michuano ya Bandari Chalenji Cup kwa kuichapa Jeshi Stars kwa mabao 36-28, mchezo uliopigwa juzi Uwanja wa Habours, Kurasini jijini Dar es Salaam.


Kampuni hiyo inachapisha gazeti hili, Spoti Starehe na Business Times hushiriki michuano mbalimbali ikiwemo Kombe la NSSF.

Timu ya BTL iliongozwa na Mwanaid Hassan, ambaye katika mechi hiyo aling'ara kwa kupachika mabao mengi na kuifanya safu ya ulinzi ya Jeshi kuhaha kumdhibiti.

BTL ambayo imewahi kutwaa ubingwa wa NSSF, ilidharauliwa lakini baada ya kutoa 'dozi' kila timu sasa imeanza kuihofia.

Timu hiyo itashuka tena uwanjani Jumamosi kuumana na Bandari A, ambapo mechi zingine za mwisho wa wiki zilizikutanisha Bandari A ambayo iliichapa CMTU.

Nyingine ilikuwa ni Bandari B, ambayo iliibuka na ushindi dhidi ya Vijana Barracks huku waandaaji wa michuano hiyo wakiziomba timu zingine kushiriki endapo zitataka kufanya hivyo.