Wawekezaji wa madini wamponza mchimbaji

Wawekezaji wa madini wamponza mchimbaji
 
Kamanda wa Polisi wa Mkoa wa Shinyanga, Bw.Diwani Athuman, alisema Bw. Magunila, alishambuliwa juzi mchana na kundi la wachimbaji wadogo wadogo katika machimbo ya dhahabu yaliyopo kijiji cha Mhandu kata ya Chela, wilayani Kahama.
 

Bw.Athuman alisema siku ya tukio hilo, Bw.Magunila alikuwa amefuatana na wawekezaji kutoka nje ya nchi na kwenda nao katika machimbo hayo bila kuwashirikisha, kitu walichomtuhumu anataka kuuza eneo hilo kwa maslahi yake binafsi, ndipo walipoanza kumshambulia kwa mawe na marungu.
 
Akiongea kwa taabu na mwandishi wa habari hizi alikolazwa katika Hospitali ya Wilaya ya Kahama, Bw. Magunila, alisema eneo hilo ni mali yao na Mkuu wa Wilaya Meja Matala kwa vile wameshalikatia leseni kutoka mwaka jana.

Bw.Magunila alisema eneo la machimbo ya dhahabu la Mhandu walishalikatia leseni ya majina mawili yeye na Meja Matala, ambapo wana viwanja sita.

Wachimbaji wadogo wadogo katika eneo hilo ambao hawakupenda majina yao yaandikwe gazetini waliwatuhumu Meja Matala na Magunila kutumia ujanja wa kulichukua eneo hilo bila wao kuwashirikisha.

Diwani wa Kata ya Chela Bw. Mibako Mabubu, alisema Bw.Magunila, alifanya kosa kwenda eneo hilo bila kushirikisha viongozi wa kata pamoja na kudai ana leseni ya viwanja sita.

Mkuu wa Wilaya ya Kahama Meja Matala alipoulizwa alikiri kuwepo kwa tukio hilo ila akasema hawezi akalizungumzia suala hilo kama Bw.Magunila.

Ofisa Madini Mkazi wa Wilaya ya Kahama Bw.Tuna Badoma, alipotakiwa kuthibitisha kuhusu leseni ya Bw.Magunila na Meja Matala alisema yeye si msemaji