Nape atamba kuyavua magamba yaliyokwama

Na Rachel Balama

KATIBU wa Uenezi na Itikadi wa Chama cha Mapinduzi (CCM) Taifa, Bw. Nape Nnauye, amesema kuwa viongozi wote wanaojitapa  kwamba magamba yao yapo kiunoni na hayawezi kuondolewa wanajidanganya,  yataondolewa kwa shoka kwenye kikao kijacho cha Halmashauri Kuu ya CCM Taifa.


Bw, Nauye, alitoa kauli hiyo Dar es salaam jana wakati alipokuwa akizindua tawi la CCM barabara ya Pamba.

Alisema kuwa wakati huu CCM inapoendelea na kampeni yake ya kujivua gamba kuna baadhi ya viongozi ndani ya chama na serikali wanadai kwamba magamba yao hayawezi kutoka kwa kuwa yapo kiunoni si kweli na yatatoka tu.

"Wale ambao magamba yao yapo kiunoni na hayawezi kuondolewa tutatumia shoka kuyaondoa katika kikao kijacho cha Halmashauri Kuu ya CCM Taifa", alisema.

Alisema kuwa kuna baadhi ya viongozi wanatumia ilani ya CCM kwa ajili ya kunufaisha matumbo yao hali inayopelekea wananchi kupoteza imani na chama pamoja na serikali.

Alisema kuwa atapambana na mafisadi hadi kieleweke ili kila mwananchi wa tanzania aishi maisha bora na kamwe hatomuogopa mtu yoyote  wakati akipigania usawa kwa wananchi wote.

Alisema kuwa kama aliyewahi kuwa Waziri Mkuu wa serikali ya awamu ya kwanza hayati Edward Sokoine alichukiwa na baadhi ya watu haijalishi yeye akichukiwa pia kwa kutetea maslahi ya wananchi.

"Alichukiwa hayati Sokoine itakuwa mimi, mimi ni zaidi ya Babu wa Loliondo nitawashughulikia tu mafisadi ili kila mtu ajifunie kuwa mwana CCM," alisema.

Alisema kuwa leo viongozi wengi wamekuwa matajiri kupita kiasi huku wananchi wengine wakiendelea kuwa masikini kutokana na ufisadi.

Alisema kwamba kamwe hawezi kunyamaza hadi pale atakapoona nchi inatawalika kwa usawa.

Alisema kuwa atapambana vikali ili kuhakikisha kwamba tofauti ya vipato kati ya walionacho na wasionacho haitofautiani sana ili wananchi waweze kujenga imani na chama.

Pia Bw. Nnaye aliwataka vijana wa CCM kupambana kwa lengo la kuwashughulikia wale wote wanaofanya dhuruma kwa kuwadhurumu watu kwa namna moja ama nyingine.

Bw. Nnauye, aliwataka watu wote watakaodhurumiwa  serikalini kukimbilia kwenye tawi hilo la Pamba na kama itashindikana basi waende kwake na atapambana na wadhurumaji hao hadi kieleweke.

"Wananchi wengi wamekuwa wakidhurumia mali zao kama ardhi na vitu vingine , sasa nasema waje kwangu nitapambana na wadhurumaji," alisema.

Aisha

Katika hatua nyingine Bw. Nnauye, alisema kuwa Chama cha Demokrasia na Maendeleo(CHADEMA) sasa kinakuwa ni chama cha kigaidi na si cha siasa.

Alisema kuwa chama chochote cha siasa hakiwezi kufanya matendo ya kigaidi kama kinavyofanya chama hicho.

Alisema Bw. Lwakatare ambaye aliwahi kuwa CUF sasa amepeleka vurugu zote CHADEMA.

"Bw.Lwakatare alipokuwa CUF chama kilikuwa na vurugu kubwa sasa ameziamishia vurugu zote za kigaidi CHADEMA," alisema.

Bw. Nnauye alisema kuwa wana uwezo wa kuwashughulikia watu wote wanaofanya vurugu na kuwataka wananchi kujiepusha na chama hicho kwa kuwa kinawapeleka sehemu siko.

Aliyataka matawi yote ya CCM nchini kutoshughulika na siasa pekee na badala yake pia yawe ni sehemu ya uzalishaji kwa lengo la kujiongezea kipato na kupambana na umasikini.

Katika uzinduzi huo Bw.Nnauye aliwataka wanachama wa tawi hilo kuanzisha mfuko wa tawi ambapo aliahidi kutoa sh. milioni mbili.