Mafisadi CCM kung'oka rasmi

*Kamati ya Maadili sasa yapewa meno
*Mukama asema hakuna kurudi nyuma
*Viongozi waagizwa kuwachukulia hatua

Na Rehema Mohamed

CHAMA cha Mapinduzi (CCM) kimetangaza rasmi hatua ya kuwashughulikia watuhumiwa wa ufisadi ndani ya chama hicho kwa
kuiongezea nguvu Kamati ya Maadili kuwa Tume kamili yenye maamuzi.

Pia chama hicho kimeongeza idadi ya wajumbe wawili katika kamati hiyo na kuwaagiza viongozi wake katika ngazi zote, kuanza kutekeleza azimio la Halmashauri Kuu ya Taifa (NEC) iliyomalizika wiki iliyopita mjini Dodoma kwa kuwachukulia hatua haraka bila kupoteza muda watuhumiwa hao.

Akizungumza na waandishi wa habari Dar es Salaam jana, Katibu Mkuu wa chama hicho Bw. Wilson Mukama, alisema uamuzi wa kamati hiyo kuongezewa nguvu, unatokana na msimamo wa watuhumiwa kukataa kujiondoa wenyewe.

Alisema kutokana na hali hiyo, CCM inalazimima kuchukua hatua madhubuti ya kuwashughulikia watuhumiwa hao ili kuhakikisha maamuzi ya NEC, yanatekelezwa na kuweka wazi kuwa, chama hicho hakitarudi nyuma katika suala hilo.

“Mwenyekiti wetu (Rais Jakaya Kikwete), ametuomba tuzidi kulitolea ufafanuzi suala la maadili ndani ya chama chetu, viongozi wanaotuhumiwa, watafakari, wajitazame kisha wachukue hatua wao wenyewe;

“Katika kufanikisha hili, tumeamua kuiongezea nguvu na mamlaka Kamati ya Maadili kwa kuibadilisha kuwa Tume kamili bila kusubiri Kamati Kuu na kuongezea wajumbe toka 12 hadi 14,' alisema Bw. Mukama.

Alisema suala la maadili ndani ya chama hicho litaendelea kutiliwa mkazo kwani CCM ndiyo imeunda na maamuzi yake ni makini.

Aliongeza kuwa, chama hicho kimewaagiza watendaji wake katika ngazi zote kuanzia Taifa, Kamati za Siasa ngazi zote na Kamati ya Usalama na Maadili, kuanza mara moja mchakato wa kutekeleza azimio la NEC dhidi ya viongozi wanaohutumiwa kwa ufisadi ndani ya chama hicho.

“Hadi sasa takribani miezi saba imepita tangu azimio hili kupitishwa, bado hatujapata mwitikio wa kuridhisha kutoka kwa viongozi wa ngazi zote ambao ni walengwa wa azimio hili,” alisema Bw. Mukama akimaanisha wale wanaotuhumiwa.

Aliongeza kuwa, “Bila shaka wakati umefika kwa chama kutekeleza ile sehemu ya pili ya azimio lake kuwawajibisha wahusika kwa kufuata utaratibu uliowekwa na kanuni za CCM za uongozi na maadili,” alisema.

Alitaja sehemu ya pili ya hatua hiyo kuwa ni kuwaondoa viongozi wanaotuhumiwa kwa nguvu chini ya utaratibu wa chama hicho ambao awali walipewa nafasi ya kutafakari, kujipima na kuchukua hatua wao wenyewe kwa maslahi ya chama.

Alisema kama wameshindwa kufanya hivyo, CCM italazimika kuwawajibisha na kusisitiza kuwa, hatua hiyo inatakiwa kutekelezwa kwa haraka bila kuchelewa.

Katika hali inayoonesha kukasirishwa na kauli iliyotolewa na baadhi ya wana-CCM kuwa suala la kuwavua gamba viongozi watuhumiwa wa ufisadi limepita na kutamba wameshinda, Bw. Mukama alisema kama kuna mtu anadhani ameshinda si kweli bali hiyo ni hulka yake.

“Kama kuna mtu atatuhumiwa taratibu zitafuatwa dhidi yake, kama kuna mtu anasema ameshinda baada ya kikao cha hivi karibuni hiyo ni hulka yake, tume bado hatumhukumu mtu,” alisema.

Alisema CCM imefikia hatua hiyo kutokana na mwitikio mdogo wa azimio lilipotolewa katika mkutano wa NEC uliofanyika mjini Dodoma, Aprili 10 hadi 11 mwaka huu.

Akifafanua zaidi Bw. Mukama alisema, mtu akituhumiwa hatua ya pili inayofuata ni kufanyiwa uchunguzi wa juu ya tuhuma husika kwa kuhojiwa na taarifa kuwasilishwa katika kamati ndogo chini ya Makamu Mwenyekiti wa CCM na baadaye Kamati ya Usalama na Maadili itamalizia.

Bw. Mukamba alipotakiwa kutaja majina ya wanatuhumiwa alidai kuwa hadi sasa hawajapata mtu aliyetuhumiwa, akipatikana taratibu za uchunguzi zitafuatwa.

Katika kikao cha NEC, baadhi ya wajumbe walilalamika kuchafuliwa na kuhoji sababu za wanaowachafua kutochukuliwa hatua.