Simba wageukia saikolojia

*Wadai Yanga sawa na Oljoro JKT

Na Amina Athumani

UONGOZI wa klabu ya Simba umesema utawajenga wachezaji wake kabla ya kukutana na watani wao wa jadi, Yanga, katika
mechi ya Ligi Kuu Bara itakayopigwa kwenye Uwanja wa Taifa, Dar es Salaam, jumamosi.

Lengo na uongozi huo ni kuhakikisha wachezaji wao, waichukulie mechi hiyo kama wanavyocheza na timu nyingine katika ligi hiyo.

Akizungumza Dar es Salaam jana, Katibu Mkuu wa klabu ya Simba, Evodius Mtawala, alisema wanatambua ukubwa wa mechi hiyo na hawawezi kuidharau.

Alisema watahakikisha wanawajenga wachezaji wao kisaikolojia ili waichukulie mechi hiyo,  kama walivyozichukulia mechi nyingine walizocheza.

"Simba itaendelea na mazoezi Dar es Salaam kule Bamba Beach, kambi haitahamia Zanzibar,"alisema Mtawala.

Kuhusu kamati zilizoundwa na klabu hiyo, alisema siyo kwa ajili ya kuiangamiza Yanga, ba,li zitafanya kazi kwa kipindi cha miaka minne.

"Kamati hizi siyo kwa ajili ya kuifunga Yanga, kwani ukiifunga kinachofuata nini? Alihoji Mtawala.

Alisema kamati hizo zipo kwa ajili ya programu za muda mfupi na mrefu, zikiwemo ya timu za vijana na mikakati mbalimbali ya kibiashara katika klabu hiyo.