Hotuba ya Kikwete yaibua angalizo

*Wataka vitendo zaidi vitumike kuliko maneno
*Askofu:Wauza dawa za kulevya washughulikiwe
*Mwingine aelezea suala la Mahakama ya Kadhi

Na Mwandishi Wetu

SIKU moja baada ya Rais Jakaya Kikwete kutumia Baraza la Idd El-Fitr, kuzungumza masuala mbalimbali yanayohusu mstakabali wa taifa, ambayo
baadhi yake yamekuwa yakiibua mijadala mikali nchini, baadhi ya viongozi wa dini wametoa maoni yao, wakiipongeza, lakini wakitoa angalizo kuwa iendane na vitendo.

Katika hotuba yake hiyo ya takribani dakika 65, juzi mjini Dodoma, Rais Kikwete alitumia muda huo kuzungumzia masuala mbalimbali kama vile uanzishwaji wa Mahakama ya Kadhi, dalili za kuwepo kwa dhana ya udini nchini, hatima ya mali zilizokuwa zikimilikiwa na madhehebu ya dini kabla hazijataifishwa na serikali, ushiriki wa baadhi ya viongozi wa dini katika biashara haramu ya dawa za kulevya na mijadala ya katiba mpya.

Akizungumzia hotuba hiyo, Askofu wa Kanisa la African Inland Church (AICT), Dayosisi ya Pwani, Charles Salala, alisema kuwa hotuba ya Rais Kikwete katika Baraza la Idd, ilijikita katika masuala ya msingi, lakini katika baadhi ya hoja akatoa angalizo kuwa ni vyema serikali ikadhihirisha dhamira yake kwa vitendo badala ya kuishia katika maneno.

"Ni vizuri hili la serikali kutokuwa na dini liendelee kusimama katika uhalisia wake, serikali ilisimamie kwa uhalisia wake...katika suala la mahakama ya kadhi, moja ya vitu vilivyokuwa vikizungumzwa na wenzetu wa upande wa pili ni juu ya serikali kuhusika katika uendeshaji wa mahakama hiyo, kwa maana ya serikali kutumia fedha za walipa kodi ambao wengine wana dini wengine hawana dini, kuendesha chombo cha dini nyingine.

"Hilo likiwekwa vizuri kwa nini gharama hizo za kuendesha chombo zibebwe na serikali, maana karibu kila dini inazo gharama zake katika kuendesha masuala ya ibada, sasa isingekuwa sahihi serikali kugharamia ibada ya dini, ni vyema hilo likaendeshwa na wao wenyewe, serikali haina dini na ni vyema isimamie hilo kwa uhalisia wake.

"Juu ya suala la madawa ya kulevya kwa kweli hakuna mtu anaweza kutoka leo akasema kuwa halipo, categorically sidhani mtu anaweza kujitokeza na kuchukua position ya namna hiyo, maana huwezi kuwajua viongozi wote wa dini zote na malengo yao, lakini suaa la msingi ni kuwa hao wachache wanaojulikana serikali iwachukulie hatua, maana hakuna aliye juu ya sheria," alisema Askofu Salala na kuongeza;

"Serikali iwabainishe kwa kuwaweka wazi, iwachukulie hatua ili liwe funzo kwa watu wengine pia. Katika suala la katiba, ni kweli kabisa, katiba mpya inapaswa kutuuunganisha na kuwabeba Watanzania wote. Si mahali pa kila mtu kuweka maslahi yake mbele, yawe ya kidini au mengine yoyote yale, sisi tunaweza kuwa na tofauti zetu lakini katiba yetu ni moja tu, hiyo ibebe maslahi ya Watanzania wote, hivyo ni kweli tuwe makini."

Akizungumzia suala la dhana ya udini, Askofu Salala alisema kuwa ni vyema serikali nayo ikawa thabiti katika kuhakikisha kuwa hakuna viongozi wa dini wanaoendekeza udini, hasa katika mahubiri ambapo wamekuwa wakitumia muda mwingi kukashfu na kubeza dini za watu wengine, akisema viongozi wa dini wana mchango wao katika kumaliza tatizo la udini, lakini serikali isisite kuingilia kati na kuchukua hatua kukomesha vitendo vya namna hiyo.

Kwa upande wake, Padri Baptiste Mapunda alihoji kwa nini Rais Kikwete amechelewa namna hiyo kuzungumzia masuala muhimu kama hayo aliyoyasema jana. Lakini pia akahoji eneo ambalo rais aliamua kutolea ujumbe huo.

"Ataweza vipi kuthibitisha kuwa hayo aliyoyasema ndiyo yatafanyiwa kazi, maana suala lenyewe (la mahakama ya kadhi) haliendi kwa uwazi. Lakini kwa nini serikali ishiriki katika mchakato huo, kwa nini wasiachiwe waislam wenyewe, ina maana hawaamini waislam kama wanaweza kuanzisha mambo yao wao wenyewe, kwani hawawezi kujisimamia mpaka serikali iwasimamie," alihoji Padri Mapunda.