DC Igunga apigwa

*Adaiwa kupanga njama za ushindi wa CCM jimboni humo
*CHADEMA wambeba juu juu, watendaji pia wakong'otwa
Na Benjamin Masese, Igunga

MKUU wa Wilaya ya Igunga Bi. Fatuma Kimario, amejikuta katika wakati mgumu baada ya kudaiwa kukutwa akiendesha kikao cha siri na
watendaji wa Kijiji, kata, tarafa, na wazeee maarufu kwa lengo la kuchafua Mkutano wa Chama Cha Demokrasia na Maendeleo (CHADEMA).

Mkutano huo wa CHADEMA ulitarajiwa kufanyika katika Kijiji cha Isakamaliwa Kata ya Isakamaliwa na kitendo cha Mkuu huyo wa wilaya kukutwa akifanya mkutano ulisababisha kiongozi huyo kuvurutwa na kubebwa juu juu na wafuasi wa CHADEMA huku watendaji wakiambulia kipigo.

Viongozi waliokuwemo katika kikao hicho walikimbia na kubaki mtendaji wa kijiji hicho Bw. Shokoro Karedia, na mtendaji wa kata aliyefamika kwa jina moja la Bw.Nyamwamga ambao walipewa kipigo na wafuasi wa CHADEMA kabla ya kutokomea kusikojulikana.

Kikao hicho kilivunjwa haraka huku nyaraka mbalimbali zilizokuwa ajenda zikikamatwa na viongozi wa CHADEMA na kukabidhiWA Katibu Mkuu wa chama hicho Dkt. Willibroad Slaa.

Baada ya Bi. Kimario kubebwa na kuwekwa katikati ya barabara alihojiwa na viongozi wa CHADEMA pamoja na waandishi wa habari uhalali wa kufanya kikao hicho.

Mkuu huyo wa wilaya aliyekuwa na gari lake yenye namba STK 38O6 alihojiwa na viongozi hao wa CHADEMA na wafuasi wake huku akishindwa kujibu na kuishia kuomba maji ya kunywa huku akihema na kuomba msaada kwa wasaidizi wake.

Alipoulizwa kama alijua kwamba kuna mkutano hapo alijibu kuwa hakujua na hata ratiba ya mikutano hiyo haijamfikia ofisini kwake na kuahidi kufuatilia ofisi za Halmashauri.

Akijieleza alisema yeye kama kiongozi wa serikali aliitwa na uongozi wa kata na serikali za mitaa kujadili mambo mbalimbali ya mifugo kuhamishwa, masuala ya mimba mashuleni, mipaka ya shule, elimu bora, ujenzi wa vyoo na nyumba bora za walimu  pamoja na uchaguzi mdogo wa Jimbo la Igunga.

Hata hivyo nyaraka zilizodaiwa kukamatwa na kukabidhiwa Dkt.Slaa zilidaiwa kuwa na ajenda ya mbalimbali za kuhakikisha CCM inashinda kwa kishindo pamoja na kuwahamasisha vijana waliopata mafunzo wanafanya kaziz kama walivyoagizwa.

Hata hivyo Bi. Kimario alikiri kufanya makosa kutokana na kutokuwa na ratiba ya uchaguzi huo mdogo na kuomba kuonana na Dkt. Slaa kumuomba radhi kwa kitendo hicho na kukubali kufanya hivyo baada ya mkutano huo kumalizika.

Kutokana na hali hiyo viongozi wa CHADEMA na wananchi waliondoka eneo hilo na kwenda eneo la mkutano alikokuwa anahutubia Dkt. Slaa na Bw. Kashindye huku wakimsubiria kwa hamu kuja kuomba radhi.

Awali kabla ya tukio hilo wakati wananchi wakiwapokokea viongozi wa CHADEMA akiwemo mgombea wao Bw. Joseph Kashindye, ghafla kijana mmoja aliyefahamika kwa jina la Juma Mwangara, Mwenyekiti wa Kitongoji cha Zahanati alijitokeza mbele ya maandamano hayo na kuzua tafrani.

Ilidaiwa kuwa wananchi wa Kata ya Isakamaliwa ndio walitoa taarifa ya kikao cha Mkuu wa Wilaya katika ofisi ya kata na kwamba lengo ilikuwa kuvuruga mkutano wa CHADEMA.

Tukio hilo liliongozwa na wafuasi wa CHADEMA pamoja na Mbunge wa Maswa Mashariki Bw. Slyvester Kasulumbai, Mbunge wa Viti Maalum Bi. Suzan Kiwanga huku Dkt. Slaa na mgombea ubunge Bw. Kashindye walibaki majukwaani wakiendelea kuhutubia wananchi waliokuwepo.

Dkt. Slaa alisema kuwa ni makosa kwa mkuu wa wilaya kufanya vikao karibu na mkutano wa kampeni huku akitumia gari la serikali lililokuwa na bendera.