Wabunge wamlipua Msekwa

*Msigwa asema anagwa maeneo ya kitalii Ngorongoro
*Ole Telele amtaka Waziri Maige kuvunja bodi yake
*Waziri Maige akaangwa kwa wanyama waliotoroshwa

Na Waandishi Wetu, Dar, Dodoma

KAMBI ya Upinzani Bungeni imemtaja Makamu Mwenyekiti CCM, Bw. Pius Msekwa ambaye pia ni
mwenyekiti wa Bodi ya Hifadhi ya Ngorongoro kuwa amejigeuza mwenyekiti mtendaji wa hifadhi na kufikia hatua ya kugawa maeneo kwa wafanyabiashara kwa ajili ya shughuli za kitalii kinyume na taratibu.

Uovu mwingine ulioibuliwa na kambi hiyo ni pamoja na wizi wa wanyamapori wapatao 130, ambao walisafirishwa kupitia Uwanja wa Ndege wa Kimataifa wa Kilimanjaro (KIA) kwenye ndege ya Qatar.

Akiwasilisha maoni ya kambi hiyo, Waziri Kivuli Maliasili na Utalii, Mchungaji. Peter Msigwa (Iringa Mjini-CHADEMA), alisema hali hiyo inachangia kudhoofisha rasilimali za Watanzania.

“Pamoja na matatizo mengine mengi, hifadhi ya taifa  ya Ngorongoro inakabiliwa na tatizo la kuwa na mwenyekiti wa bodi anayevuka mipaka ya majuku yake, tuna ushahidi kuwa Makamu Mwenyekiti wa CCM, Mhe. Pius Msekwa ambaye ndiye mwenyekiti wa bodi hiyo, amegeuka kuwa mwenyekiti mtendaji anayefanya kazi ya kutoa 'offer' kwa wafanyabiashara wenye mahitaji ya kujenga hoteli za kitalii huku akiwaelekeza maeneo, kazi ambayo si yake,” alisema Mchungaji. Msigwa.

Mchungaji Msigwa alisema kutokana na utaratibu huo unasababisha mgongano mkubwa wa kimaslahi na wenye madhara makubwa katika hifadhi hiyo.

“Haiwezekani mwenyekiti wa bodi ya ngorongoro ambaye moja ya majukumu yake ni kukagua hali halisi ya hifadhi hiyo, ajiingize  katika shughuli za utendaji, tena zilizo nyeti kama hizo. Mheshimiwa Naibu Spika, Kambi Rasmi ya Upinzani inaitaka serikali kuchukua hatua kali dhidi ya mwenyekiti huyu wa bodi mara moja kwa kukiuka mipaka ya majukumu yake na tunaahidi kuipa serikali ushirikiano kuhusiana na tuhuma hizi,” alisema Bw. Msigwa.

Akichangia mjadala huo, Mbunge wa Ngorongoro, Bw. Saning'o Telele alimtaka Waziri wa Maliasili na Utalii, Bw. Ezekiel Maige kuvunja Bodi ya Ngorongoro inayoongozwa na Msekwa, huku akifafanua tuhuma kuwa amegawa eneo la kujenga Hoteli ya Kitalii kwenye hifadhi hiyo na kuonya kuwa wananchi watapimana naye nguvu kwa kukataa ijengwe mahali hapo.

Utoroshaji wayamapori

Akizungumzia sakata la utoroshaji wa wanyamapori, Mchungaji Msigwa alisema haiwezekani wanyamapori hai 130 wakiwemo twiga, waibwe na kusafirishwa kupitia uwanja huo bila taarifa yoyote kutoka wizara husika.

"Kambi ya Upinzani inaitaka serikali kuwachukulia hatua za kisheria na nidhamu aliyekuwa Katibu Mkuu wa Wizara hii, Bw. Ladislaus Komba na Mkurugenzi wa Idara ya Wanyamapori, Bw. Erasmus Tarimo kwa uzembe uliopelekea au kufanikisha wizi wa wanyamapori hai 130, wakiwemo twiga, uhalifu uliofanyika Novemba 26, mwaka jana," alisema Mchungaji Msigwa.

Alisema moja ya majukumu makuu ya wizara hiyo ni pamoja na kulinda rasilimali za nchi na mali kale dhidi ya matumizi haramu ya kuhakikisha utoaji bora wa huduma za kitalii unafanyika.

“Lakini mheshimiwa spika utoroshaji huu wa wanyamapori unaonyesha viongozii na watumishi hawa wa umma wameshindwa kutimiza wajibu wao hivyo kambi ya upinzani inaitaka serikali kuwawajibisha kwa sababu ya kuzembea wajibu wao na kusababisha wizi uliofanyika,” alisema Mchungaji Msigwa.

Kwa mujibu wa mbunge huyo, serikali inapaswa kuwawajibisha wakuu na watendaji wote wa vyombo vya usalama waliopewa dhamana ya moja kwa moja ya kulinda maliasili lakini wakaachia wizi huo kutendeka.

"Na tunaitaka serikali ilieleze bunge hili wanyama wetu hao wako wapi mpaka sasa?" alihoji.

Kwa upande wake Kamati ya Kudumu ya Bunge ya Ardhi, Maliasili na Mazingira imesema serikali imepata kigugumizi kutolea ufafanuzi wa wizi wa wanyamapori 116 hai na ndege 16 walioibwa nchini Novemba 24, mwaka jana kama wanarudishwa nchini na wahusika kuburuzwa mahakamani.

“Kwa hakika kuna dalili kubwa ya uzembe na kulindana ndani ya Wizara hii na ndiyo maana kumekuwa na kigugumizi katika kushughulikia ushauri wa kamati," alisema Mwenyekiti wa Kamati ya Kudumu ya Bunge, Ardhi, Maliasili na Utalii, Bw. James Lembeli.

"Mheshimiwa naibu spika wanyamapori walioibwa wana thamani ya sh. 163,732,500 na ndege hai wana thamani ya sh. 6,838,000 kupitia uwanja wa KIA na ndege ya jeshi la Qatar.

“Na mpaka Kamati yetu inatoa taarifa hii ndani ya bunge lako tukufu, haijulikani wanyama wale baada ya kupakiwa pale Uwanja wa Ndege wa Kimataifa wa Kilimanjaro walipelekwa wapi wala bado wapo hai," aliongeza

Kwa mujibu wa Bw. Kembeli kamati imebaini kuwa uharamia huo ulifanywa na Watanzania na kwamba kigugumizi cha serikali kushughulikia suala hilo kimeisikitisha kamati yake kwa kuwa rasilimali iliyoibwa ni adimu na haijulikani ipo wapi na itarudishwa lini hapa nchini nchini.

Akichangia hoja hiyo, Mbunge wa Sikonge, Bw. Juma Nkumba alishangaa jinsi wanyama hao wanavyoweza kutoroshwa katika nchi yenye vyombo vya ulinzi vya kutosha na kupendekeza wanyama hao kama bado wako hai warudi na kama wamekufa mafuvu yao yarejeshwe.

Mamlaka makubwa ya waziri

Mchungaji Msigwa alisema kuwa sheria ya Wanyamapori ya mwaka 2009 namba 38 (3)(e) imempa madaraka makubwa waziri mwenye dhamana katika mchakato mzima wa ugawaji wa vitalu vya uwindaji, ikiwemo kuteua wajumbe watano wa kuingia kwenye Kamati ya Ushauri ya Ugawaji wa Vitalu vya Uwindaji.

Baadhi ya wajumbe walioteuliwa na Waziri Maige kuingia kwenye kamati hiyo ni Bw. Benno Malisa (Makamu Mwenyekiti wa UVCCM na Bw. Daniel Nsanzungwako (ambaye pia ni kada wa CCM),” aliongeza.

Bw. Msigwa alisema kutokana na uteuzi huo kambi hiyo imeshtushwa na uteuzi wa wajumbe hao kuingia kwenye kamati hiyo ya kumshauri wakati hawana vigezo vinavyotakiwa, ikiwemo ujuzi na uzoefu kwenye masuala ya utawala, na uhifadhi wa mazingira unaohusiana na uwezeshaji wa kiuchumi,” alisema Bw. Msigwa.

Imeandaliwa na Godfrey Ismaely, Pendo Mtibuche na Peter Mwenda