SAKATA LA JAIRO

Serikali ya JK yajichanganya

*Yaagiza Jairo asimamishwe kazi tena
*Ni kutokana na shinikizo la wabunge
*Pinda ahoji tena matumizi ya mil 578/-

Na Pendo Mtibuche, Dodoma

RAIS Jakaya Kikwete, amemsimamisha tena kazi Katibu Mkuu wa Wizara ya
Nishati na Madini, Bw. David Jairo, ikiwa ni siku moja baada ya wabunge kupinga uamuzi wa serikali kumrejesha ofisini.

Hata hivyo hatua hiyo ya Rais kumsimamisha tena Bw. Jairo imeonekana kuwa ni ya kujichanganya kwa viongozi wa juu wa serikali akiwamo Rais Jakaya Kikwete na Waziri Mkuu Mizengo Pinda.

Wiki chache zilizopita Waziri Mkuu alimsimamisha kazi Katibu Mkuu huyo kwa tuhuma za rushwa, lakini juzi Ikulu ikaamuru arudi kazini, kabla ya Rais kutangaza kumsimamisha tena jana baada ya wabunge kuamua kuunda kamati teule kuchunguza tuhuma dhidi ya Bw. Jairo.

Hatua ya Bw. Jairo kusimamishwa kazi kwa mara ya pili, ilitangazwa bungeni jana na Waziri Mkuu, Bw. Mizengo Pinda, wakati akijibu maswali ya hapo kwa hapo ya wabunge.

Bw. Pinda alikuwa akijibu swali lililoulizwa na Mbunge wa Hai (CHADEMA), Bw Freeman Mbowe, alihoji kuwa serikali haioni haja ya kumpa likizo Bw. Jairo kutokana na Bunge kupinga kauli ya Katibu Mkuu Kiongozi Bw Philemon Luhanjo aliyoitoa juzi na Bunge kufikia uamuzi wa kuunda tume ya kuchunguza swala hilo.

Akijibu swali hilo Waziri Mkuu alisema kuwa tayari hatua hiyo imekwishachukuliwa na Rais Kikwete  ya kumwagiza Katibu Mkuu huyo wa Wizara ya Nishati na Madini kwenda likizo ili kutoa nafasi kwa tume teule iliyoundwa na Bunge kuchunguza tuhuma zinazomkabili.

Alisema kuwa serikali itajitahidi kutoa ushirikiano juu ya jambo hilo  ili kuweza kubaini mambo mbalimbali yaliyojitokeza katika suala hilo zima.

Hata hivyo Mbowe aliitaka serikali kueleza kuwa ni hatua gani itazichukua kwa wale watakaobainika kutumia fedha zilizokusanywa na Katibu wa Wziara hiyo.

Hata hivyo Waziri Mkuu alihoji uhalali wa wizara hiyo kutaka kutumia sh. milioni 578 kwa ajili ya posho wakati Ofisi ya Waziri Mkuu ambayo ilitumia muda wa siku tano kujadiliwa haikuweza kuwa na bajeti kubwa kiasi hicho ambapo ilitumia sh.milioni 174.5 tu.

Akijibu swali hilo pia Waziri Mkuu alisema kuwa jambo hilo liachiwe kamati hiyo itakayoundwa na kuchunguza mambo mbalimbali kuhusu suala hilo na kwamba kamati hiyo ya Bunge ndio itakayokuja na majibu kama katibu mkuu huyo alikuwa sahihi au la.

Juzi uamuzi uliotangazwa na serikali wa kumrejesha kazini Katibu Mkuu wa Wizara ya Nishati na Madini, Bw. David Jairo,ulipingwa vikali na wabunge huku wakisema imeonesha dharau kwa chombo hicho.

Moto wa kupinga kurejeshwa kazini Bw. Jairo uliibuliwa Bungeni mjini Dodoma jana na Mbunge wa Kigoma Kaskazini, Bw. Zitto Kabwe (CHADEMA) baada ya kuwasilisha hoja binafsi kwa kuzingatia kanuni ya 51 (3)ambayo inampa mbunge nafasi ya kutoa hoja bila kufuata utaratibu wa taarifa nyingine.

Wakati Bunge likiamua kuuda tume, jijini Dar es Salaam Bw.  Jairo, juzi alizungumza na gazeti hili ofisini kwake na kujibu mapigo ya wabunge hao. Aliwataka wabunge hao kuisoma ripoti ya CAG kwa umakini ili wajiridhishe.

"Ni lazima wabunge wakubali kuheshimu vyombo vyenye mamlaka ambavyo wao wanaviamini katika maamuzi ya kitaifa, kama watashindwa kuamini ripoti ya CAG na PCCB katika hili, basi kutakuwa na mtu ana maslahi yake mengine anayo yataka,"alisema Bw. Jairo.

Alisema mtu wa kawaida akituhumiwa bungeni hapewi nafasi ya kujitetea, lakini kama kamati itaundwa nafasi hiyo itatolewa kwa kuhojiwa na kupitia vielelezo mbalimbali na kanuni kama zinavyotaka.

Bw. Jairo kwa siku ya juzi alionekana mwenye furaha, huku akisema alituhumiwa  na muhimili mwingine na yeye yuko chini ya muhimili mwingine ambao una mamlaka halali za kufanyia kazi suala hilo na zimefanikiwa kufanya hivyo kwa mujibu wa sheria. Alisema serikali imejiridhisha kuwa anafaa kutenda kazi kwa nafasi hiyo, hivyo Bunge lizingatie taratibu na mipaka ya mihimili mingine hasa taratibu za serikali.

Alitangaza kutoa msamaha kwa wale wote waliomkejeli wakati wa sakata hilo tangu lilipoibuliwa bungeni na Mbunge wa Kilindi, Bi. Beatrice Shelukindo, huku Waziri Mkuu, Bw. Mizengo Pinda, akisema kama angekuwa na mamlaka angemfukuza kazi.