Mgeja naye amkaba koo Sitta

Na Suleiman Abeid, Shinyanga

SAKATA la malumbano kati ya viongozi wakuu ndani ya Chama cha Mapinduzi (CCM) limeendelea kupamba moto baada ya mwenyekiti wa chama hicho Mkoa wa
Shinyanga, Bw. Hamisi Mgeja kuungana na mwenyekiti wa CCM Mkoa wa Dar es Salaam, Bw. John Guninita kumtuhumu Bw. Samuel Sitta juu ya kauli zake dhidi ya serikali.

Akizungumza na waandishi wa habari mjini Shinyanga jana, Bw. Mgeja alisema kauli zinazotolewa na Bw. Sitta ambaye pia ni waziri wa ushirikiano wa Jumuiya ya Afrika Mashariki zinaweza kuwa chanzo kikubwa cha kukisambaratisha Chama cha Mapinduzi.

Kauli ya Bw. Mgeja ambaye pia ametoa ushauri kwa Mwenyekiti wa CCM Taifa, Rais Jakaya Kikwete kukaa nakuangalia njia muafaka itakayomuwezesha Bw. Sitta arudi katika mstari kwa kuheshimu
katiba na kanuni za chama, imekuja siku chache baada ya viongozi wengine wawili wa CCM kutoa shutuma kama hizo dhidi yake.

Wa kwanza kumlaumu Bw. Sitta alikuwa Naibu Waziri wa mambo ya Ndani na Mbunge wa Bukoba Mjini, Balozi Khamis Kagasheki, akafuatiwa na Mwenyekiti wa CCM Mkoa wa Dar es Salaam, Bw. John Guninita ambao kwa nyakati tofauti waliwatupia lawama Bw. Sitta na Katibu wa NEC, Itikadi na Uenezi, Bw. Nape Nnauye.

Lakini Bw. Sitta alijibu mapigo hayo kwa mkupuo akisema ataendelea kusema ukweli na kamwe hawezi kubabishwa na mawakala wa mafisadi.

Kama ilivyokuwa kwa wenzake, Bw. Mgeja alimtaka Rais Kikwete 'ampige pini' Bw. Sitta ili aweze kutumia vikao pale anapoona mapungufu yoyote yanayofanywa na chama au serikali yake badala ya kushambulia akiwa nje majukwaani.

Kauli za Bw. Sitta za kuikosoa serikali na CCM alizitoa katika mkutano wa hadharani mjini Mbeya ambao mgeni rasmi alikuwa Bw. Nnauye, ambapo kiongozi huyo alikosa watendaji wa serikali, akiwamo Waziri wa Nishati na Madini, Bw. William Ngeleja kwa kushindwa kupata suluhisho la mgawo wa umeme.

Bw. Mgeja alisema kauli za Bw. Sitta zinaonesha wazi zinaashiria aina ya uchochezi uliofichika ambao usipodhibitiwa mapema kuna hatari ya kukibomoa chama na hivyo hazistahili kuvumiliwa kwa vile ni sawa na usaliti unaoweza kusababisha mapinduzi baridi kwa
serikali iliyoko madarakani.

"Kwa kweli hizi kauli za mwenzetu Bw. Sitta hata mimi nazipinga vikali, na naungana na mwenzangu wa Bw. Guninita kuhisi kwamba huenda mwenzetu huyu anatumika vibaya kwa lengo la kutaka kukigawa Chama chetu," alisema.

Aliongeza: "Nafikiri lengo ni kutaka kuwepo kwa mapinduzi baridi ndani ya serikali ya CCM, na ikizingatiwa kuwa yeye ni mmoja wa wajumbe wa Baraza la Mawaziri katika serikali hii ya awamu ya nne, ambaye ki-utaratibu alipaswa kutoa majibu sahihi ya mapungufu yote
ndani ya serikali na kuitetea badala ya kukaa pembeni na kulalamika.

Bw. Mgeja alifafanua kuwa waziri yeyote anastahili kuwa upande wa serikali pale anapokuwa kwa wananchi, kinyume na jinsi anavyofanya Bw. Sitta ambapo hivi karibuni wakati akiwa mkoani Mbeya aliwaacha wananchi pasipo majibu ya matatizo yao na yeye kubakia kuwa mmoja wa walalamikaji.

Hata hivyo, Bw. Mgeja alikiri kwamba hivi sasa baadhi ya Watanzania
mmoja mmoja wameathirika kiuchumi pamoja na taifa kwa ujumla katika suala zima la kimapato kutokana na tatizo la uhaba wa umeme nchini na kwamba jambo ambalo Bw. Sitta hakupaswa kujitoa na kuilaumu serikali.

"Ni unafiki mkubwa na uasi kwa waziri aliye ndani ya serikali kuishutumu serikali yake na kuishinikiza iwaombe radhi wananchi katika mkutano wa hadhara badala ya kutumia hekima kushauri suala hilo kwenye vikao vya Baraza la Mawaziri ambavyo mwenyekiti wake ni Rais Jakaya Kikwete.

"Ni kweli matatizo ya nishati ya umeme yameathiri kwa kiwango kikubwa taifa, lakini alipokuwa huko Mbeya hakustahili kutoa kauli zile za kinafiki, kuitaka serikali iombe radhi katika mkutano wa hadhara, hili ni tatizo tena waziri Sitta hakutumia busara, kama anaiona nyumba aliyomo ina matatizo kwanini aendelee kuishi?" alihoji Bw. Mgeja.

Pamoja na tuhuma hizo, Bw. Mgeja alikiri kuwa kauli za Bw. Sitta ni changamoto kubwa kwa Chama cha Mapinduzi (CCM) kwa kuhakikisha kinanusuru hali hiyo kwa kumdhibiti, waziri huyo juu ya kauli zake hizo zisizo na nia njema na CCM na serikali yake kwa ujumla.

"Namuomba Katibu Mkuu wa CCM Taifa, Bw. Mukama (Wilson) azitazame kauli hizo kwa macho mawili, kwani adui wa ndani ni mbaya sana kwa ustawi wa maendeleo, kama jinsi zinavyoonekana kauli za Bw. Sitta ambazo zina dhamira ya kutengeneza makundi ndani ya Chama kwa kubainisha kundi bora na lisilo bora," alieleza Bw. Mgeja.