CUF wamvaa Sitta

*Wadai amewakebehi Wazanzibari kuhusu muungano
*Watakiwa kusimama bila ya woga kutetea nchi yao

Na Mwajuma Juma, Zanzibar

CHAMA cha Wananchi (CUF) kimemvaa Waziri wa Afrika Mashariki, Bw. Samuel Sitta kikimtaka aache kuwakebehi Wazanzibari kwa kauli alizotoa
bungeni kuhusiana na muungano.

Naibu Katibu Mkuu wa CUF, Bw. Ismail Jussa Ladhu amesema wakati umefika kwa Wazanzibari kusimama kidete na bila ya woga kuitetea Zanzibar katika masuala mbalimbali ya Muungano.

Wiki iliyopita Bw. Sitta akijibu hoja mbalimbali za wabunge wakati akichangia bajti ya Ofisi ya Makamu wa Rais, alipinga kuanzishwa kwa serikali tatu, akisema itakuwa ndio kuua muungano, kwa kuwa itahatarisha ustawi wa Zanzibar.

"Kuleta serikali tatu ni kumleta mbia wa kushindana na Zanzibar na hapo Tanganyika haitakubali, kwani wote watalazimika kuichangia serikali ya tatu na hapo haitakuwa na meno ... kwa sababu ya Muungano, Zanzibar inauziwa umeme kwa bei ndogo na sasa tunaidai sh bilioni 50, lakini tumekaa kimya.

"Kwa akili nyepesi kutaka serikali tatu ni kuua Muungano, kama Muungano hautakiwi semeni kistaarabu tuwe na maelewano ... tuache kusema Karume (Abeid) alikuwa mbumbumbu wakati alifanya mazuri mengi kama kujenga nyumba za Michenzani," alisema.

Pia waziri huyo, alisema wakati wa mjadala wa Muungano baina ya waasisi wake, Mzee Abeid Aman Karume alikuwa anataka uwe wa serikali moja na yeye awe Makamu wa Rais, lakini Baba wa Taifa, Mwalimu Julius Nyerere alisema ikiwa hivyo Zanzibar itamezwa, hivyo akashauri ziwe serikali mbili, kama ilivyo sasa.

Kutokana na kauli hiyo, Bw. Jusa aliyeonekana kukerwa na kauli hizo za Waziri Sitta, alisema wakati huu Wazanzibari wote wanahitaji kupata haki sawa juu ya mambo yanayohusu Muungano. Alimtaka na kuwabeza Wazanzibari wakati wanaposimama kudai haki zao.

Bw. Jussa alitoa kauli hiyo jana wakati akiwahutubia wananchi na wanachama wa chama hicho Jimbo la Bububu, Wilaya ya Magharibi Unguja.

Alisema, Bw. Sita amekuwa akitoa matamshi mabaya juu ya lengo na adhima ya muungano, jambo ambalo halileti taaswira nzuri.

"Kwenye muungano huu kila nchi inapaswa kupata haki sawa na mwenzake na mambo ambayo hayamo katika muungano yanapaswa yasiingiliwe,” alisema.

Alisema kuwa Marehemu Karume na Mwalimu Nyerere walitaka kuwepo na muungano wenye maslahi bora kwa pande zote mbili.

Lakini kinyume na hilo, Bw. Sitta amekuwa akibeza muungano kwa kusema mambo ambayo hayamo katika makubaliano, huku akifanya Wazanzibari kama watu wasioelewa adhima ya muungano huo.

“Huu si wakati tena wa kutudanganya, Wazanzibari wa leo tumesoma hatudanganyiki,” alisema Bw. Jussa na kupigiwa makofi na wananchi waliokuwepo.

Alisema kuwa katika Muswada wa Sheria ya Mabadiliko ya Katiba Wazanzibari wamependekeza mambo kadhaa ambayo kutoingizwa kwake kutasababisha mswada huo kutopita.

"Kama alivyosema Mzee Karume Muungano ni sawa na koti, hivyo likitubana tutalivua," alisema.

Aidha aliwaambia wananchi hao kuwa Serikali ya Mapinduzi ya Zanzibar imechukua ahadi kuwa itasimamia kidete kuhakikisha maslahi ya Zanzibar yanalindwa.

Akijibu malalamiko ya wabunge waliochangia kuwa suala la mafuta kuwekwa kwenye Muungano baada ya kuwa na dalili ya kupatikana Zanzibar, Bw. Sitta alisema serikali ililazimika kuliingiza kwenye Muungano, baada ya kubainika kuna uwezekano wa kupatikana mafuta baharini kwenye mpaka kati ya Tanga na Pemba.

"Hapo huwezi kujua mafuta yatapatikana wapi, hivyo kuepuka ugomvi na yasitokee kama ya Iraki na Kuwait, tukaona tuliingize kwenye Muungano," alifafanua.

Kuhusu mambo ya Muungano kuongezwa kutoka 11 hadi 22, alisema yaliongezwa kulingana na matukio kama kulipovunjika Jumuiya ya Afrika Mashariki (EAC) na hayakuongezwa kiholela, bali Bunge lilipitisha kwa kupiga kura. Alitaja baadhi ya mambo hayo kuwa ni Posta na Simu; Hali ya Hewa na Ofisi ya Takwimu.

Hata hivyo, alisema, suala la elimu ya juu liliingizwa baada ya Serikali ya Mapinduzi Zanzibar (SMZ) kuiomba Serikali ya Muungano kwa barua ambayo hadi leo ipo imehifadhiwa.

Akizungumzia ushiriki wa Zanzibar kwenye masuala ya Afrika Mashariki, alisema "ushiriki wake ni wa moja kwa moja, kabla ya kwenda huwa wataalamu wa pande zote wanakutana na baadaye mawaziri tunakwenda kwenye majadiliano."

Alitaja miongoni mwa miradi ya maendeleo ya Zanzibar iliyotokana na ufadhili kupitia EAC, kuwa ni pamoja na ujenzi wa uwanja wa ndege wa Karume kisiwani Pemba; bandari ya Marhubi; ujenzi wa chelezo ambapo mtu ataweza kusafiri na gari hadi Mombasa au Dar es Salaam.