Bungeni kwachafuka

*Ni kutokana na mchango wa Kafulila
*Samuel Sitta achangia, awasha moto
*Mwenyekiti aahirisha bunge kiana

Na Gladness Mboma, Dodoma

HALI ya hewa ndani ya ukumbi wa Bunge Mjini Dodoma, ilichafuka jana baada ya Mbunge wa Kigoma Kusini (NCCR-Mageuzi), Bw. David Kafulila kuirushia
makombora serikali, akidai imekuwa legelege kukusanya kodi.

Mchango wa Bw. Kafulila uliwafanya wabunge wa CCM kusimama na wakitaka kutoa taarifa wakionekana kutoridhishwa na kauli aliyotumia mbunge huyo.

Hali hiyo pia ilimfanya Kaimu Mkuu wa Shughuli za Serikali Bungeni, Bw. Samueli Sitta, kushindwa kuvumilia na kulazimika kusimama kutoa msimamo wa serikali kuhusu yaliyokuwa yakisemwa.

Wakati hayo yakiendelea ilionekana wazi Mwenyekiti wa Bunge, Bi. Jenista Mhagama kupata wakati mgumu kwa kushindwa kuwatuliza wabunge ambao sauti zao zilikuwa zikisikika kupitia vipaza sauti na kutoa maneno ya kejeli kabla ya kuruhusiwa na meza.

Bw. Sitta alianza kwa kutoa kauli iliyoonekana kuwatuliza wabunge, pale aliposema kuwa anachofanya Bw. Kafulila ndiyo kazi ya vyama vya upinzani. Alisema kazi ya vyama hivyo ni kubeza kila jambo linalofanywa na serikali, lakini na wananchi wanajionea wenyewe.

Lakini Bw. Sitta ambaye pia ni Waziri wa Afrika Mashariki alionekana kuchafua hali ya hewa zaidi, pale aliposema 'wapinzani wamezoea kuzungumza maneno ya kinafikinafiki', hali ambayo ilizua malumbano zaidi kwa wabunge.

Kauli alizokuwa akitumia kwenye mchango wake Bw. Kafulila kujenga hoja, zilionekana kuwachoma wabunge wa CCM ambao walisimama mara kwa mara kutoa taarifa kwa mbunge huyo, lakini hata pale aliposimama kuendelea na mchango wake alikataa kuzipokea taarifa hizo.

Kauli ya Bw. Kafulila iliyoonekana kuwaudhi wabunge hao, ni pale aliposema kuwa serikali ni legelege, hivyo imeshindwa kukusanya kodi.

Baada ya kutoa kauli hiyo Mbunge wa Nzega, Dkt. Khamis Kigwangwala, alisimama na kuomba mwongozo wa Mwenyekiti wa Bunge, Bibi. Mhagama, akimtaka Bw. Kafulila kufuta kauli hiyo kwa kuwa ni ya kuudhi.

“Mheshimiwa Mwenyekiti, naomba mbunge afute kauli kuwa serikali ya CCM si legelege na haijashindwa kukusanya kodi. Kauli hii imeniudhi, serikali inakusanya kodi na imekuwa ikiongezeka mwaka hadi mwaka,” alisema

Baada ya taarifa hiyo, Bi. Mhagama alimtaka Bw. Kafulila kufuta kauli hiyo lakini alikataa kwa maelezo kuwa maneno hayo ni nukuu ya Hayati Baba wa Taifa, Mwalimu Julius Kambarage Nyerere.

Pia alisema mpaka sasa serikali haijafanikiwa kuongeza kiwango cha ukusanywaji kodi, kwani wakati ikikusanya kiwango juu hicho dola moja ilikuwa sh 1,000, lakini sasa dola imepanda na kufikia sh. 1,600.

Kutokana na maelezo hayo, Bi. Mhagama alisema kuwa hoja ya Bw. Kafulila ina mantiki, lakini haiendani na maelezo aliyokuwa akitoa, kwani ameitumia vibaya nukuu hiyo na kusisitiza Bw. Kafulila kufuta kauli hiyo.

Wakati Bi. Mhagama akieleza hayo, baadhi ya wabunge walikuwa wamewasha vipaza sauti wakipinga maelekezo ya kumtaka mbunge huyo afute kauli, huku wale wa CCM wakisika kukiwabeza wenzao.

Bw. Kafulila alishikilia msimamo wake na hata pale alipopewa nafasi na Bi. Mhagama alisema;

“Nashangaa tunachukua muda mrefu kujadili suala hili. Huu ni ukweli mchungu na nipo tayari kuufia,” alisema.

Baada ya malumbano hayo, Bw. Sitta alisimama na kuwasihi wabunge wa CCM kuwa watulivu, kwani wapinzani kazi yao ni kubeza kila kitu kinachofanywa na serikali.

“Wabunge wa upinzani kazi yao ni kubeza kila kitu kinachofanywa na serikali, lakini sisi tutahukumiwa na wananchi. Siku zote wapinzani mambo yao ni ya kinafikinafiki,” alisema.

Kauli ambayo iliendelea kuibua mizozo ndani ya ukumbi wa bunge.

“Nitatoa mfano, baadhi yao wanadai posho za vikao ni kuwaibia wananchi, lakini wapo baadhi yao walichukua posho hizo miaka mitano iliyopita. Warejeshe posho hizo ndipo wananchi watawaelewa… kila siku wataendelea kuwa wapinzani,” alisema.

Melezo ya Bw. Sitta hayakuweza kuzima mzozo uliokuwepo, kwani wabunge wengi wa upinzani walisimama wakitaka mwongozo wa Mwenyekiti wa Bunge, lakini aliahirisha bunge kutokana na muda wa kikao kumalizika, ndipo wabunge wa upinzani walianza kupiga makofi wakisema huku wakisema; CCJ... CCJ...CCJ"

Baada ya kuahirishwa kwa kikao hicho, baadhi ya wabunge wa upinzani na wa CCM walionekana kunyoosheana vidole huku baadhi yao wakimpongeza Bw. Sitta.

Awali, akichangia hoja ya bajeti ya Wizara ya Afya na Ustawi wa Jamii, Bw. Kafulila alisema inasikitisha kuona kuwa wakati nchi inaelekea kusherehekea miaka 50 ya Uhuru, bado bajeti ya sekta ya afya ni tegemezi.

Alisema hali hiyo inatokana na tatizo la kimtazamo katika serikali na kumtaka waziri asikubali bajeti ndogo na hata ikiwezekana ajiuzulu.

“Leo dunia nzima sisi ndio tuna uwiano mbovu kati ya daktari na wagonjwa. Ni aibu bajeti ya sekta ya afya kuwa tegemezi kwa asilimia 97. Haiwekezani.

“Serikali haitozi kodi. Serikali imeshindwa kukusanya pesa inasikitisha kwa sababu sekta ya afya inahusu maisha ya Watanzania,” alisema.

Bw. Kafulila alisema hazungumzii suala hilo kama mpinzani, bali ni ukweli na kuongeza kuwa serikali inashindwa kuwekeza katika masuala mengine ya afya kutokana na utegemezi.

“Kuna matatizo mengi zaidi ya Ukimwi, lakini kutokana na kuwa tegemezi tunashindwa kuwekeza katika masuala mengine ya kiafya,” alisema.

Mbunge huyo alieleza kuwa watoto wa wabunge na mawaziri wanatibiwa katika hospitali bora ndani na nje ya nchi, lakini watoto wa wanyonge wanatibiwa katika hospitali ambazo hazina hata dawa.

Kutokana na kauli hiyo, Waziri wa Maliasili na Utalii, Bw. Ezekiel Maige, alisimama na kuomba mwongozo wa Mwenyekiti na kumtaka mbunge huyo kutotoa kauli za jumla jumla, ambayo iliibua minong’ono miongoni mwa wabunge wa upinzani na mwenyekiti kusimama na kuwataka wabunge kuheshimu nidhamu ya bunge.

Baada ya maelezo ya Mwenyekiti, Waziri wa Nchi, Ofisi ya Waziri Mkuu (Uwekezaji na Uwezeshaji), Dkt. Mary Nagu, alisimama na kuwataka wabunge kuzungumza kwa nidhamu, akidai kuwa mtoto wake ni daktari Muhimbili na wanaye wanatibiwa katika hospitali za kawaida.

"Baba yangu anatibiwa hospitali ya Katesh na mimi natibiwa huko, Naomba Kafulila ukubali taarifa hii,” alisema.

Hata hivyo, Bw. Kafulila alikataa taarifa hiyo na kuongeza kuwa familia ya mbunge na waziri zinatibiwa bure tena nchi za nje na ndio sababu inawafanya wasiwekeze kwenye sekta ya afya na kumtaka Waziri wakati mwingine asikubali bajeti ndogo.

Bw. Kafulila alisema inawezekana serikali kuwekeza katika sekta ya afya vijijini, kwani nchi hii ni tajiri.

“Tanzania ni nchi tajiri, lakini ni taifa la saba kwa kupatiwa misaada duniani, tunaongozana na nchi zenye machafuko. Haiwekezani kuwa maskini kiasi hiki,” alisema huku akionyesha jarida la Ecomomist.

Akizungumzia bima ya afya, Bw. Kafulila alisema kitendo cha kutopatikana dawa ni utapeli kwa wananchi na kuitaka serikali kujipanga.