Mgogoro wa umeya Arusha wamalizika

*CHADEMA, TLP wakubali kugawana unaibu meya

Na Queen Lema, Arusha 

HATIMAYE mgogoro wa uchaguzi wa Meya wa Manispaa ya Jiji la Arusha baina ya Chama cha Demokrasia na Maendeleo (CHADEMA) kutomtambua
Meya wa jiji hilo, Bw. Gaudence Lyimo (CCM) umemalizika jana kwa makubaliano maalumu ya kugawana madaraka.

Katika Makubaliano hayo, Bw. Lyimo ataendelea kuwa meya na nafasi naibu wake kuchukuliwa na vyama vya CHADEMA na TLP kwa nyakati tofauti, ambapo Diwani Estomih Mala kutoka CHADEMA atashika nafasi hiyo kuanzia sasa hadi mwaka 2014 atakapomwachia nafasi Diwani wa TLP, Bw. Michael Kivuyo.

Mgogoro huo ulitokana na chama hicho kutokubaliana na matokeo ya uchaguzi wa meya, ambapo ilielezwa kuwa madiwani wa vyama viwiki walifanya uchaguzi bila kuishirikisha CHADEMA na kupata diwani kutoka CCM, na diwani pekee wa TLP kuwa naibu wake.

Kutokana na mgogoro huo CHADEMA walipinga uchaguzi huo kwa maandamano yaliyosambaratishwa na polisi na watu watatu, akiwamo raia mmoja wa Kenya, kuuawa kwa risasi na hadi sasa viongozi kadhaa wa chama hicho wanakabiliwa na kesi ya jinai katika Mahakama ya Arusha.

Lakini sasa hayo yote yamepita, pande zinazohusika zimejirudi na kufikia makubaliano yaliyosababisha wahusika washikane mikono kwa furaha.

Akizungumza katika kikao na madiwani wa Halmashauri ya Manispaa  ya Arusha, Mwenyekiti wa Kikao cha Usuluhishi, Bw. Kivuyo   alisema kuwa wamefanya usuluhishi kwa miezi minne mfufulizo   ambapo vyama hivyo vitatu vilikuwa vinakutana ili kumaliza mgogoro huo ambao umedumu tangu mwishoni mwa mwaka jana baada ya kutangazwa kwa Meya Lyimo.

Bw. Kivuyo alisema kuwa madiwani hao wanalazimika kuungana na  kuachana tofauti zao, kwani iwapo migogoro hiyo itaendelea ndani ya halmashauri hiyo, ni wazi kuwa mipango ya maendeleo itadidimia na kushindwa kufikia malengo.

Alisema kuwa kwa sasa tayari Meya wa Jiji anatambulika kama meya halali kulingana na sheria na taratibu za nchi.

"Sasa mgogoro umeisha na sisi kama madiwani wa vyama upinzani tunatambua Meya ni Bw. Lyimo na pia napenda kuwaambia wananchi  wa Manispaa ya Arusha kuwa kuanzia sasa Naibu Meya wa Jiji la  Arusha ni Bw. Estomih Mala kutoka upinzani ambaye atadumu katika nafasi hiyo hadi 2014," alisema  Bw. Kivuyo.

Hata hivyo, Bw. Kivuyo alisema kuwa kutokana na kikao cha usuluhishi kilichokaa, wameamua kuweka utaratibu mpya kutoka na mambo yaliyojitokeza

Alisema kuwa hali hiyo ya vyama hivyo kuungana kutaleta   mafanikio makubwa ndani ya jiji la Arusha kwa kuwa kwa sasa viongozi hawatasusa vikao na hivyo malengo halisi ya maeandeleo yatajadiliwa kwa kina na viongozi hao.

Alisema kuwa viongozi hao wameamua kuwa na umoja na kusahau machafuko yaliyotokea mjini hamo na kufanya mji huo kuwa na historia mbaya, lakini sasa wamepata viongozi halali wanaotambulika kisheria kulingana na kanuni za muongozo kuhusu viongozi wa jiji hilo.

"Mimi nimefurahi sana kwa sisi vyama upinzani na chama tawala  kuungana na kwa hali hii, basi naweza kusema kuwa yale machafuko yaliyotokea hayawezi kutokea tena na badala yake sisi kama  viongozi tutakuwa na umoja na tutaweza kutatua kero za wananchi  wa jiji la Arusha, hususan katika vikao vya mabaraza ya madiwani," alisema Bw. Lyimo.

Diwani wa Kata ya Elerai, Bw. John Bayo alisema kuwa mgogoro unapokuwepo baina ya chama kimoja na kingine hauna tija kwa kuwa lengo halisi la kupewa nafasi ya kuongoza ni pamoja na  kuwatatulia wananchi kero zao.

Bw. Bayo alisema kuwa mgogoro huo uliodumu tangu Januari mwaka huu umekuwa na madhara makubwa kwao kwa kuwa haukuwa na umuhimu kwa baraza hilo hata kwa kujadiliana masuala mbalimbali ambayo  yanawalenga wananchi hususani wale wa chini.

Mkuu wa Wilaya ya Arusha, Bw. Raymond Mushi alisema kuwa suala  hilo ambalo lilileta madhara makubwa kwa wananchi wa Manispaa ya  Arusha halitarudiwa tena na badala yake wameweka mikakati  maalumu kuhusu kufanya jiji liwe na amani.

Naye Mbunge wa Jimbo la Arusha Bw. Goodbless Lema akizungumza kwa njia ya simu na Majira alisema kama uchaguzi huo umefanyika kwa haki basi kila kitu kiwe kwa haki, usawa na uwazi.