Mukama; CCM haina orodha ya mafisadi

*Yakanusha kuwapa siku 90

Na Mwandishi Wetu

CHAMA  Cha Mapinduzi (CCM) kimesema kwamba japokuwa kuna tuhuma za ufisadi dhidi ya baadhi ya makada na  viongozi  wake, bado hakina
majina rasmi ya watuhumiwa hao, kama inavyodaiwa na vyombo vya habari nchini huku kikikanusha  kwamba kilitoa siku  90 kuwatimua wanachama hao.

Kauli hiyo ilitolewa Dar es Salaam na Katibu Mkuu wa CCM,  Bw. Wilson Mukama  alipokutana na wahariri wa vyombo  mbalimbali  vya habari  kwa  lengo la kufahamiana na  kutambulisha sekretarieti mpya ya chama hicho.

Hatua hii inazua  maswali mengi miongoni mwa umma  na wanachama wa CCM , ambao bado wamegubikwa na utata juu ya nani hasa analengwa  katika operesheni hiyo maalumu inayojulikana  kama ‘kujivua gamba’  ambayo wachambuzi wanasema  huenda ikawa ngumu kwa CCM katika utekelezaji wake.

Tayari  vyombo vya habari nchini vimekuwa vikiwataja makada  watatu wa CCM kuwaoanisha na hatua  ya kuvuliwa nydhifa zao ndani ya chama akiwemo Waziri Mkuu aliyejiuzulu Bw. Edward Lowassa, Mwanasheria mkuu mstaafu, Bw. Andrew Chenge na Mbunge wa Igunga, Bw. Rostam Aziz .

Hata hivyo, Bw. Mukama  aliyeonekana kukwepa kujibu moja kwa moja  maswali ya waandishi hao alibainisha kuwa orodha ya watu 11 wanaodaiwa kuwa mafisadi  iliyotolewa na Katibu Mkuu wa CHADEMA Dkt.  Wilbroad Slaa sio ya CCM .

“CCM haina orodha ya mafisadi. Kilichopo ni kwamba tunarajia utekelezaji wa hotuba ya mwenyekiti wetu pamoja na maazimio ya Halmashauri Kuu ya chama iliyokaa katika kikao chake mwezi uliopita,” alisema Mkama.

Pamoja na hayo Katibu Mkuu huyo alisistiza kuwa CCM imepania ‘kuwatema’ wanachama wote wanaohusishwa kwa namna yoyote katika tuhuma za ufisadi  kwani uamuzi huo ni moja ya maazimio ya NEC lililopitishwa kwa kauli moja katika kikao hicho.

Akisoma Azimio  namba 15 la  NEC, alisema  NEC ilisisitiza kuwa chama kitaendelea na mapendekezo yake dhidi ya ufisadi aidha viongozi wote waliotuhumiwa, watafakari, wapime na wachukue hatua.

Alisema mbali ya Azimio hilo, hotuba ya Mwenyekiti wa chama hicho Rais Kikwete ilisisitiza kuwataka wote wanaotuhumiwa kwa ufisadi  watafakari na kuchukua hatua.

“Wasipofanya hivyo, basi tunatarajia kwamba chama kitachukua hatua kupitia Tume yake ya Maadili ambayo imeongezewa nguvu na kwa kuongezewa  idadi ya wajumbe,”  alisema.

Hatua hii inakuja ikiwa imebaki mwaka mmoja kwa chama hicho kufanya uchaguzi wake mkuu na miaka minne kabla ya uchaguzi mkuu wa rais, na wabunge na madiwani.

Katika mkutano huo ambao ulitawaliwa na maswali mazito  ya waandishi, Bw. Mukama alikanusha pia hatua ya CCM kudaiwa kuwapa siku 90 watuhumiwa ufisadi na bila kufanya hivyo watatimuliwa.

“ Haya yakusema siku 90 sijui yametoka wapi, kwa utaratibu NEC inakutana mara tatu kwa mwaka hapo pana miezi minne, huenda mtu alidhani NEC inakutana baada ya miezi mitatu na kudai tumeweka muda huo,” alisema.

Alisema  mabadiliko yaliyofanyika kwenye Kamati Kuu ya chama na sekretarieti ni  hatua ya kawaida ya kitaasisi na kinachotafsiriwa na wananchi ni tofauti kabisa na makusudi ya chama hicho.

“Tunaamini kwamba mageuzi ya kisiasa yanakua kwa kasi sana hapa Tanzania. Sisi kama CCM tunajiweka sawa kukabiliana na mabadiliko haya, kwa kuanzia ngazi ya juu kuelekea chini,” alisema Bw. Mukama.

Bw. Mukama alisema kwamba ufumbuzi wa matatizo ya kiuongozi ya CCM ya umeanzia katika ngazi za juu na inatarajiwa kuendelea katika ngazi za chini ili kurudisha imani kwa wananchi.