Jinsi Osama Bin Laden alivyouawa

*Maiti yake yazikwa haraka baharini
*Wamarekani walipuka kwa furaha

WASHNGTON, Marekani

MWANZILISHI na kiongozi wa kundi la kigaidi la Al Qaeda, Bw. Osama Bin Laden ameuawa na
majeshi ya Marekani nchini Pakistan, Rais wa Marekani,  Bw. Barack Obama amesema.

Kabla ya Rais Obama kuutangazia ulimwengu juu ya kifo hicho, maofisa wa Serikali walisema kuwa usiku wa giza, helkopta za Marekani zililivamia jengo la kifahali lililokuwa na ukuta mrefu nchini Pakistan ama kwa lengo la kumkamata kiongozi huyo wa ngazi ya juu wa ugaidi au kumuua.

Wamebainisha kuwa katika kipindi cha dakika zisizozidi 40, Bw. Bin Laden alikuwa ameshauawa sambamba na watu wengine wanne, na kufanikisha kile Marekani ilichokuwa inahangaika nacho kwa miaka 10 iliyopita bila mafanikio.

Jengo la Kifahari

Wakati iliaminika kuwa Bin Ladema anaishi mapangoni ama Afganistan au Pakstani, taarifa za kifo hicho zimebainisha kinyume chake, kwani alikutwa kwenye jengo la kifahari.

Maofisa hao waliothibitisha taarifa hizo walisema kuwa jengo hilo linasadikika kuwa lilijengwa miaka mitano iliyopita umbali wa kilometa 100 kutoka Kaskazini mwa mji mkuu wa Pakistani, Islamabad maalumu kwa ajili ya kumficha Bw. Bin Laden.

Hata hivyo, maofisa hao wa ngazi ya juu walikataa kutaja idadi ya wanajeshi waliotumika katika mpango huo lakini wakawaeleza waandishi wa habari jinsi hali operesheni ilivyofanyika.

Wakizungumza kuhusu muundo wa jengo alimokutwa kiongozi huyo, maofisa hao walisema kuwa lilikuwa la vyumba vitatu likiwa na madirisha kidogo yaliyojitokeza kwenye ukuta mrefu uliokuwa na urefu wa futi saba.

Walisema kuwa walilibaini jengo hilo kuwa huenda linahifadhi magaidi wa ngazi ya juu akiwemo Bw. Bin Laden baada ya kazi ya ujasusi iliyochukua miezi kadhaa.

Kwa mujibu wa maofisa hao jengo hilo ambalo linakadiliwa kuwa na thamani ya dola milioni moja hapakuwepo na huduma ya simu wala internet na wakasema kuwa wakati wa shughuli hiyo helkopta yao moja ilianguka kutokana na sababu za kiufundi.

Kauli ya Rais Obama

Katika taaifa yake Rais Obama alisema kuwa kwa mujibu wa taarifa za kijasusi, kiongozi huyo wa al-qaeda aliuawa katika operesheni ya ardhini nje ya mji wa Islamabad baada ya ufyatulianaji wa risasi, majeshi ya Marekani yalichukua mwili wake.

Bw. Bin Laden anashutumiwa kwa kuhusika katika baadhi ya vitendo vya ukatili ikiwemo mashambulizi mjini New York na Washington, mnamo Septemba 11, 2001.

Kifo chake ni pigo kubwa kwa kundi la Al-qaeda lakini kuelezea hofu kuwa huenda wakashambuliwa katika mashambulizi ya kulipiza kisasi.

Bw. Obama alisema alielezea Agosti mwaka jana kuhusu mahali  alipokuwa amejificha Bin Laden na kufuatia uchunguzi wa kijasusi waligundua kuwa amejificha nchini Pakistan.

Wiki iliyopita alitoa amri operesheni kufanyika kumsaka Bin Laden na akasema kuwa operesheni hiyo iliendeshwa na kundi ndogo la wanajeshi wa Marekani katika eneo la Abbottabad, Kaskazini mwa Islamabad.

"Baada ya ufyatulianaji wa risasi, Bin Laden aliuawa na mwili wale kuchukuliwa na majeshi ya Marekani," alisema Rais Obama.

Rais Obama na maofisa wa ngazi ya juu walisema kuwa hakuna mwanajeshi wao hata mmoja aliyejeruhiwa wakati wa oparesheni hiyo iliyofanyika juzi asubuhi kwa muda wa saa za Pakistan.

Hata hivyo, viongozi hao hawakutoa taarifa zaidi lakini maofisa wa kikosi cha wanamaji walisema kuwa kikosi chao kilihusika huku maofisa wengine wakisema kuwa walitumia njia mbalimbali ili kutambua maiti hiyo kama ni ya Bin Laden.

Osama azikwa baharini

Taarifa mbalimbali zilizosambaa kwenye vyombo vya habari zilisema kuwa tayari mwili wa Bin Laden umeshazikwa baharini kwa kufuata taratibu za kiislamu zinazolazimisha mwili huo kuzikwa ndani ya saa 24, lakini hawakutoa taarifa zaidi ya hapo.

Maafisa wa Marekani ambao hawakutaka kutajwa majina walisema ingekuwa vigumu kupata nchi ambayo ingekubali kupokea mwili wa Bin Laden kutoka na vitendo vyake, hivyo wakalazimika kuuzika baharini.

Hata hivyo kitendo hicho kimeibua maswali mengi, huku watu wakijiuliza ni kwa vipi azikwe haraka na wasioneshe mwili wake, jambo ambalo lingeifanya dunia kuamini kuuawa kwake.

Bin Laden ni nani?

Histroa inaonesha kuwa kiongozi huyo ambaye jina lake kamili anaitwa Bw. Osama bin Muhammad bin Awad bin Laden, alizaliwa mjini Riyadh, Saudi Arabia mwaka 1957.

Kwa mujibu wa historia hiyo kinara huyo alikulia kwenye familia yenye utajili akiwa mtoto wa 17 kati ya watoto 50 wa mzee Mohammed bin Laden, ambaye alikuwa mataalamu wa ujenzi akiwa na mahusiano na familia ya ukoo wa kifalme.

Bin Laden, ambaye mama yake ni raia wa Syrian, alikulia katika madhebu ya Kiislamu ya Wahhabi na alipata elimu yake nchini Saudi Arabia na baba dyake alifariki kwenye ajali ya ndege mwaka 1967.

Alioa mke wa kwanza raia wa Syria akiwa na umri wa miaka 17 na inasadikika kuwa amezaa watoto zaidi ya 20 kutoka kwa wanawake watano.

Akiwa kijana mdogo alijiunga na mshirika wake, Bw. Abdullah Azzam nchini Afghanistan ili kupambana na majeshi ya uvamizi ya Kisovieti na kuanzisha kundi la Maktab al-Khadamat na kwa kutumia utajili wake aliwekeza fedha nyingi katika vita hiyo na kufanikisha ununuzi wa silaha.

Mwishoni mwa miaka ya 1980 alirejea nchini Saudi Arabia akiwa shujaa wa mujahideen baada ya kuyashinda majeshi ya Russia na kisha akaanzisha mtandao wake wa siri wa kundi la al-Qaeda, na wakati Irak ilipoivamia Kuwait mwaka 1990, na kisha Saudi Arabia ikakubali majeshi ya Marekani kutumia ardhi yake ndipo akaigeuka nchi alipozaliwa kwa kitendo cha kuruhusu majeshi ya  Marekani kutumia ardhi hiyo.

Baada ya kukwaruzana na serikali ya Saudia huku fedha zake zikiwa zimezuiwa, mwaka 1992 Bin Laden alikimbilia uhamishoni nchini Sudan akiwa na wapiganaji wake wa kundi la Mujahideen na hatimaye kuunganisha nguvu zake na kundi la Kiislamu la nchini Misri liitwalo Egyptian Islamic Jihad ambalo lilikuwa likiongozwa na Bw. Ayman al-Zawahiri.

Hata hivyo mwaka 1995 kundi hilo lilifukuzwa Sudan baada yakujaribu kumuua aliyekuwa rais wa nchi hiyo, Bw. Hosni Mubarak.Baadaye Bin Laden alirejea nchini Afghanistan ambako alikuwa akilindwa na utawala wa Taliban uliokuwa chini Bw. Mullah Mohammed Omar na kuanzisha kambi ya kutoa mafunzo kwa kundi la al-Qaeda ambalo limekuwa likifanya mashambulizi maeneo mbalimbali duniani.