Kifo cha Osama utata mtupu

*Maswali kibao yaibuka, picha ya maiti yaghushiwa
*Wengi wahoji kuzikwa haraka haraka, baharini
*Wataka picha zake zioneshwe hadharani, ili waamini

Na William Shao

Siku moja baada ya kutangazwa kuuawa kwa aliyekuwa kiongozi wa mtandao wa kigaidi duniani wa
al-Qaeda, Osama bin Laden, watu mbalimbali nchini na duniani wameonesha wasiwasi wao kuhusu kifo hicho wakidai kuwa huo ni mchezo wa kutaka kuipumbaza dunia, Majira limegundua.

Kwa mujibu wa maoni mbalimbali kutoka kwa wasomaji wa Majira na mtandao wa intaneti, inawezekana Osama alifariki miaka kadhaa iliyopita jambo lililofanya Marekani kuona aibu kwa kuendesha operesheni  ya mabilioni ya dola bila  mafanikio hivyo kuamua  kufanya usanii huo ili kuihadaa dunia.

Tangu dunia ilipotangaziwa rasmi kifo cha kiongozi huyo wa al-Qaeda  na Rais Barack Obama wa Marekani mlolongo mzima wa tukio hilo umeacha maswali mengi kuliko majibu huku  baadhi ya wasomaji wa gazeti hili wakihoji kwanini picha za maiti ya Osama  hazikuoneshwa na sababu za kuzikwa haraka kiasi hicho pamoja na kwamba alikuwa mtuhumiwa  aliyesakwa kwa udi na uvumba na Wamarekani.


“Najua kuwa hizi ni sheria za Kiislamu, kama watu wengi wanavyosema, lakini hapa tunamzungumzia mtu aliyekuwa akitafutwa zaidi duniani kuliko mwingine yeyote,” alisema msomaji mmoja na kuhoji, “Walimtafuta kwa zaidi ya miaka kumi, hatimaye walipomuua, ndipo ghafla wakaona kuwa ni bora waheshimu sheria za Kiislamu?”

HATA HIVYO, WASOMAJI WENGINE WAMEINGIWA NA WASIWASI JINSI JAMBO LENYEWE LILIVYOTENDEKA. WANAHOJI IKIWA OSAMA BIN LADEN AMEUAWA KWANINI PICHA ZA MAITI YAKE HAZIJAONESHWA POPOTE KATIKA VYOMBO VYA HABARI?

HABARI  ZINADAI KUWA VIPIMO VYA VINASABA (DNA) VILITHIBITISHA KUWA ALIYEUAWA NI OSAMA KWA SABABU VILIWIANA NA VINASABA KUTOKA KATIKA UBONGO WA DADA YAKE AMBAYE ALIKUFA KUTOKANA NA KANSA MJINI BOSTON, MAREKANI.

 TELEVISHENI YA CNN ILIRIPOTI KUWA UBONGO WA DADA YAKE HUYO ULIHIFADHIWA NA WAMAREKANI KWA KUSUDI LA KUGUNDUA VINASABA VYA BIN LADEN KAMA SIKU MOJA ANGEPATIKANA HAI AU AMEKUFA.

Taarifa zilizoenea katika mitandao zinaeleza kuwa picha inayodaiwa kuwa maiti ya Osama inadaiwa kutengenezwa nchini Pakistan ili ionekane ni kweli Osama amekufa. Picha hiyo ilioneshwa pia katika televisheni ya Pakistan.

Hata hivyo, taarifa za awali zilidai kuwa Osama bin Laden alipigwa risasi kichwani, lakini taarifa nyingine zinasema alipigwa risasi jichoni na nyingine zinadai kuwa alipigwa risasi kisogoni.

Kwa mujibu wa taarifa ya Shirika la Utangazaji la Uingereza (BBC) ya Januari 9, 2010, Osama bin Laden alikufa miaka minane iliyopita wakati wa vita iliyokuwa ikiendelea Tora Bora, Afghanistan. Mwandishi wa BBC, Mike Rudin, alisema huenda Osama aliuawa ama na mabomu ya Marekani au ugonjwa wa figo ambao tayari ulikuwa umemdhoofisha.

Kwa muda wa muongo mmoja, Osama bin Laden alifanikiwa kuyapiga chenga mataifa makubwa, hususan Marekani, waliokuwa wakimsaka kwa nguvu kubwa.

Picha kadhaa za video za Osama zimekuwa zikitolewa zinazomwonesha akitoa vitisho kuwa angeendelea kuishambulia Marekani na Wamarekani popote walipo. Video ya kwanza ya mfano huo ilitolewa na Wizara ya Ulinzi ya Marekani Desemba 2001.

Katika video hiyo, Osama alisema alishiriki tukio la kigaidi la Septemba 11, 2001 ingawa wengi wanadai kuwa Osama hajawahi kukiri kufanya tukio hilo.

Madai kwamba inawezekana Osama alifariki miaka mingi iliyopita yalitolewa pia na mwanasiasa wa Pakistan, Bi.  Benazir Bhutto. Katika mahojiano na vyombo vya habari muda mfupi kabla yeye hajauawa, Bhuto alisema Osama alishakufa.

Pia, kituo cha televisheni cha Fox News Reported, Desemba 26, 2001, kilitangaza kuwa Osama bin Laden alikuwa amekufa. Lakini miaka 10 baadaye Rais Barrack Obama wa Marekani akatangaza kifo cha Osama bin Laden.

Kwa mujibu wa vyombo vya habari mara baada ya taarifa ya kuuawa kwa bin Laden katika mashambulizi yaliyofanywa na askari wa Marekani, maofisa wa Serikali ya Pakistan walisema mwili wake ungezikwa kwa mujibu wa taratibu za Kiislamu.

Kwa mujibu wa taratibu za dini ya Kiislamu, mwili unatakiwa uzikwe ndani ya saa 24, walisema maofisa hao. Baada ya kuona ugumu wa kukubali kupokea mabaki ya gaidi aliyekuwa akitafutwa zaidi duniani, walisema maofisa hao, Marekani waliamua kuuzika mwili huo baharini.

Osama bin Laden alizaliwa Jumapili ya Machi 10, 1957, mjini Riyadh, Saudi Arabia. Inaaminika kuwa yeye ni mwanzilishi wa mtandao wa kigaidi wa al-Qaeda ambao unaaminika kuwa ulihusika na mashambulizi ya Marekani ya Septemba 11, 2001 na yale ya Dar es Salaam na Nairobi mwaka 1998.

Alikuwa katika orodha ya watu kumi wanaotafutwa zaidi duniani na Shirika la Upelelezi la Marekani, FBI. Kuanzia 2001 hadi 2011, bin Laden na mtandao wake walikuwa ndio shabaha kubwa ya Vita Dhidi ya Ugaidi duniani.

Mei 1, 2011, Rais wa Marekani, Barack Obama, aliamuru mashambulizi dhidi ya eneo ambalo Marekani walihisi Osama alikuwa amejificha. Operesheni hiyo, kwa mujibu wa Rais Obama, ilifanikiwa kwa kusaidiwa na Shirika la Kijasusi la Marekani, CIA. Katika muda wa dakika 40, bin Laden akawa amepigwa risasi kichwani. Mwili wake ulichukuliwa na kupelekwa kusikojulikana hadi ilipotangazwa kuwa amezikwa baharini.