Hotuba ya JK yapondwa

*Wasomi wamshangaa kushtaki wateule wake

Na Edmund Mihale

HOTUBA ya Rais Jakaya Kikwete aliyoitoa kwa watendaji wa serikali katika semina elekezi juzi mjini Dodoma imeibua mjadala mkali baada viongozi wa
kisiasa na wanaharakati mbalimbali kumtaka ajiuzuru kwa kuwa ameonesha udhaifu katika uongozi wake.  

Katika hotuba hiyo Rais Kikwete alisema ipo kasoro kubwa ya watendaji wakuu serikali kwa kuwa kumekuwa na uhusino mbaya kati ya makatibu wakuu, mawaziri na wafanyakazi wa chini jambo ambalo ni hatari kwa serikali.

Rais Kikwete aliwataka viongozi wasiowajibika kujiondoa katika Baraza la Mawaziri na bungeni ili watakaobaki wajenge umoja.  
    
Akizungumza na Majira kwa njia ya simu Mhadhiri wa Chuo Kikuu cha Mt. Augustine, Prof. Mwesiga Baregu alisema hali ilipofikia sasa kwa Rais Kikwete kuwasuta watendaji wake hadharani kinaonesha ni jinsi gani Serikali ya Chama Cha Mapinduzi (CCM) ilivyo dhaifu katika kuwatumikia wananchi.

"Alikaa akawaona wanafaa na sasa anawashtaki kwetu, sisi tunalalamika kutoka na ugumu wa maisha na yeye analalamikia sasa tumsaidieje.

"Aliwateua pekee yake hakuna mwanachi yeyote aliyemsaidia kujua kuwa wanafaa, sasa ni miezi mitano imepita, ameanza kulalamika anawashtaki kwetu wakati kuna cabinet meeting (Baraza la Mawaziri) sijui wanakaa mara ngapi, lakini alitakiwa kuwambia huko bila ya sisi kujua kama anaona serikali imemuelemea anatakiwa kujiuzuru na kutuachia tuunde serikali itakayowajali wananchi," alisema.

Profesa baregu alisema Rais Kikwete alipaswa kuwashtaki mawaziri hao kwa wananchi kana alivyofanya juzi iwapo wangekuwa wamechuguliwa na wananchi au kuwateua na kuidhinishwa na bunge lililochaguliwa na wanachi kama ilivyo Marekani ambapo ambako mawaziri hudhinishwa na bunge.

Alisema kuwa kimsingi haoni mantiki ya Hotuba ya Rais Kikwete katika kuwatumikia wananchi, hivyo kama naona kuwa serikali imemuelemea anatakiwa kujiuzuru kuliko kuunda serikali inayotumia muda mwingi kualalamika kuliko kutatua matatizo ya wananchi. 

Kwa upande wake, Mkurugenzi wa Chama cha Waandishi Wanawake Tanzania (TAMWA). Bi. Ananileya Nkya alisema kuwa anashindwa kuelewa ni kwa nini rais aliamua kuzungumza udhaifu wa watendaji wake katika hadhara ya Watanzania.

"Ni kwa nini alalamike, wananchi walalamike, yeye naye alalamike sasa tukimbile wapi kama serikali nayo inalalamika? Kama anaona mtu hafanyi kazi awafukuze sisi tunataka wachapakazi nchi iendelee," alisema Bi Nkya.

Naye Naibu Katibu Mkuu wa Chama cha Wananchi Bara (CUF), Bw. Mtatiro alisema Rais Kikwete alikuwa anajaribu kupoteza muda kwa kuwa serikali imeshindwa kufanya kazi ya kuwatumikia wananchi.

Alisema kukiri kwa Rais Kikwete kuwa kuna baadhi ya watendaji ni mzigo ni ishara kuwa serikali yake ni dhaifu mbele ya wananchi na mabadiliko iko hayawezi kutokea hata kama akizungumza vipi.

"Serikali imeshindwa kuchukua hatua kwa watendaji wake, utasikia huyo ni mzigo, leo unamtoa katika wizara hii kesho unampeleka katika wizara ile akiharibu, sasa mabadiliko ya kifanisi yatapatikana wapi hapo,"  alisema Bw. Mtatiro.

Alisema Rais Kikwete ni dhaifu pamoja na serikali yake na kwamba  mabadiliko hayaji kwa kuzungumza katika semina elekezi bali kutokana na  utendaji.

"Sasa wamachinga wanalalamika, wafanyabishara nao wanalalamika, wananchi pia wanalalamika, serikali nayo inalalamikia. Bora wananchi wanahangaika na kujikwamua kiuchumi kwa kutafuta mitaji huku na kule baada ya kuona serikali yao imeelemewa, sijui tufanyeje ili kuisaidia," alisema Bw. Mtatiro.

Alisema sasa tunahitaji rais atakayekwenda kufanya kazi kuwasaidia wananchi ili wajikwamue na hali ya ugumu wa maisha lakini sasa tuna serikali iliyoshindwa kufanya kazi imekaa madarakani kwa sababu ya kulalamika kuhusu utendaji wake.