FM Academia kuzindua video ya ‘Vuta Nikuvute’

Na Zahoro Mlanzi

BENDI ya FM Academia, maarufu kama Wazee wa Ngwasuma, inatarajia kuzindua video ya albamu ya ‘Vuta Nikuvute’, katika Ukumbi wa Arcade (Heineken House), uliopo
Mikocheni jijini Dar es Salaam, Ijumaa Aprili 29.

Miongoni mwa video zitakazokuwamo katika albamu hiyo ni pamoja na Vuta Nikuvute, Jasmin, Heshima kwa wanawake na nyinginezo zinazofanya vizuri katika ulingo wa muziki wa dansi hapa nchini.

Akizungumza jana jijini Dar es Salaam jana, Meneja wa bendi hiyo, Kelvin Mkinga alisema maandalizi ya uzinduzi wa video hiyo yamekalimika, hivyo kuwataka mashabiki wao kufika kwa wingi kujionea burudani hizo.

Alisema wanachofanya kwa sasa ni kuweka mikakati imara ya kuwapatia heshima zaidi katika muziki wa dansi, kwa kutoa burudani kubwa kwa mashabiki wao kwenye uzinduzi wa video za albamu ya Vuta Nikuvute.

“Sisi ndiyo bendi bora kwa sasa kuliko wenzetu, hivyo mipango ni kuwapatia burudani kubwa kutoka kwetu, katika uzinduzi huo, maana tunaamini mashabiki na wadau wetu wanataka raha na si maneno kama wanavyofanya wengine.

“Naamini hilo litatuweka katika nafasi nzuri ya kuendelea kutamba kwenye kona ya muziki wa dansi hapa nchini, yenye ushindani wa hali ya juu, ukizingatia kwamba kila mmoja anataka awe juu na kufurahisha watu wake," alisema.