Polisi waua wawili kwa risasi

Na Raphael Okello, Musoma

WATU wanne wameuawa, wawili kwa kupigwa risasi na polisi, na nyumba nane kuteketezwa kwa moto katika kijiji cha Nyamisisi katika Wilaya ya
Musoma vijijini.

Tukio hilo lilitokea juzi baada ya wananchi wenye hasira kuwaua watu wawili na kuchoma moto nyumba zao kutokana na imani ya kishirikina huku polisi nao wakifyatua risasi na kuua watu wawili katika tukio hilo.

Kamanda wa Polisi Mkoa wa Mara, Bw. Robert Boaz amethibitisha tukio hilo kuwa waliouawa kwa imani za kishirikina ni Bi. Modesta Nyamhanga (60) na Bw. Cosmas Mniko (60) wakazi wa Kijiji cha Nyamisisi wilaya ya Musoma vijijini.

Waliouawa kwa kupigwa risasi na polisi katika tukio hilo ni Bw. Julias Hamphery (32) na Bw. Sese Kabari (30) wote wakazi wa kijiji cha hicho.

Akielezea tukio hilo lililotokea juzi saa 9:30 jioni Bw. Boaz alisema kuwa siku mbili kabla ya tukio mama mmoja alimtuma mtoto wake kuteka maji kisimani na mtoto huyo akamkuta Bi. Nyamhanga ambaye alimpaka dawa isiyojulika kichwani.

Kamanda alisema baada ya mtoto huyo kurudi nyumbani alitoa taarifa kwa baba yake ambaye aliwachukua mgambo kumfuata bibi huyo na kumpeleka katika Kituo Kidogo cha Polisi Kyabakari Musoma vijijini ili aandike maelezo na baadaye alipewa dhamana na kurudi nyumbani kwake.

Bw. Boaz alieleza kuwa kabla ya tukio hilo lililomhusu binti kupakwa dawa pia kuna mtoto mwingine alipotea katika kijiji hicho katika mazingira ya kutatanisha ambapo pia Bi. Nyamhanga alituhumiwa kuwa yeye ndiye aliyemficha.

Alisema kutokana na hisia hizo juzi siku ya tukio Marehemu Bi. Nyamhanga aliondoka nyumbani kwake na watoto wa kike wawili waliodaiwa kuwa ni watoto wake kuwapeleka katika Kituo cha Mabasi ya Nyamisisi ili kuwasafirisha kwenda  Mwanza kusalimia ndugu zao.

"Akiwa hapo stendi wananchi walimuona na ndipo walipompigia yowe kuwa alikuwa anamtorosha huyo mtoto aliyesaidikiwa kuwa alikuwa amemficha," alisema Bw. Boaz.

Alisema wakiwa katika kituo hicho cha mabasi licha ya Bi. Nyamhanga kukanusha madai yao wananchi hao waliendelea kumpiga wakimshurutisha arudi nyumbani kwake ili awaonyeshe alipo mtoto aliyedaiwa kutoweka kimiujiza hapo kijijini.

Bw. Boaz alisema wananchi hao walimpeleka hadi nyumbani kwake na walipofika hapo walimlazimisha aingie ndani huku wengine wakichoma moto nyumba hiyo na kumteketeza kwa moto.

Kwa mujibu wa kamanda wakati wanampiga, Bi. Nyamhanga aliwambia kuwa mtoto huyo yuko kwa mtu mmoja aliyefahamika kwa jina la Bw. Cosmas Mniko mkazi wa kijiji hicho jambo lililowalazimisha wananchi hao kwenda na kumkamata Bw. Mniko ambaye naye walimuua na kuteketeza nyumba zake saba na pamoja na mali zake.

Alisema wakati wanafanya vitendo hivyo askari polisi wa Kituo cha Kiabakari walikwenda kwenye tukio ambapo hata hivyo kamanda huyo alidai kuwa kutokana na umati wa watu ambao nao walianza kukabiliana na polisi ili wasiwazuie kutekeleza azma yao, polisi walifyatua risasi ambazo ziliwapata vijana wawili Bw. Sese Kabari na Bw. Julius Amphrey ambao wote walifariki dunia.

Bw. Boaz alisema kutokana na purukushani na hasira za wananchi hao ambao nao walikusudia kufanya uharibifu zaidi, alituma kikosi kingine cha polisi kutoka mjini Musoma ambao waliongeza nguvu na kufanikiwa kutuliza ghasia hizo.

Kamanda huyo alisema kuwa polisi waliofyatua risasi na kuua bado wanashikiliwa kwa mahojiano zaidi ili kuhakikisha kuwa haki inatendeka na ametumia fursa hiyo kuwataka wananchi kutochukulia sheria mkononi.