Makada CCM wazidi kuirarua CHADEMA

*NCCR nayo kuanza mikutano mikoani

Na Waandishi Wetu

MAANDAMANO yaliyoambatana na mikutano ya Chama cha Demokrasia na Maendeleo (CHADEMA) kwa takriban siku tisa yamezidi kukisumbua
Chama Cha Mapinduzi (CCM) ambacho wanachama na jumuiya zake wamezidi kutoa matamko ya kulaani na kuomba hatua zaidi zichukuliwe dhidi yake, ikiwamo kufutwa kwenye daftari la msajili wa vyama vya siasa.

Mbali na matamko ya Mwenyekiti wa CCM taifa, Rais Jakaya Kikwete, Katibu wa NEC, Itikadi na Uenezi, Bw. John Chiligati na Waziri wa Mahusiano na Uratibu, Bw. Stephen Wassiara; Jumuiya ya Wazazi ya chama hicho waasisi wa chama mkoani Mbeya na CCM mkoa wa Shinyanga wameungana kulaani harakati za chama hicho.

Waasisi wa TANU waibuka Mbeya

Mkoani Mbeya, waasisi wa TANU na CCM wamemtaka Rais Kikwete kutoa tamko la kalipio kwa CHADEMA kutokana na kauli zao zinazoonesha dhahiri kupinga ushindi wake na kutangaza vita kwa namna ya kujificha kwenye hoja ya malipo ya Dowans.

Mzee Michael Mwamkinga (89) alisema kuwa tangu wakiwa na chama cha TANU chini ya muaisisi wake na Rais wa Kwanza wa Tanganyika, Hayati Mwalimu Julius Nyerere walijifunza kutunza amani na utulivu huku hata vyama vilivyokuwepo wakati huo kikiwemo chama cha ASP viongozi wake wakiongozwa na kuiheshimu na kuipenda nchi.

Mimi nasema, sisi wazee nikiwemo mimi tunaposikia maneno mazito yakitamkwa na watoto wetu hawa wanasiasa na kisha wakiachwa bila rais kuwaambia wazi kuwa wakiendelea atawachukulia hatua kali za kisheria sisi tunaanza kuona kuwa yawezekana yeye anawaonea huruma au ana urafiki nao na hivyo wanataka umwagaji wa damu ufike na kisha viongozi wakimbie na kutucha tukipata shida, alisema.

Alisema kuwa viongozi wa CHADEMA wanatafuta umaarufu na   huruma ya kusifiwa na mataifa yanayotaka kuiona Tanzania ikiangamia na kuwapokea viongozi hao watakapokuwa wamekimbilia huko na kupata maisha mazuri huku Watanzania wengine wakifa kutokana na vita.

Naye Muasisi na Mwenyekiti Mstaafu wa CCM, Wilaya ya Mbeya vijijini Mzee Patrick Nswila, alionya kuwa wanaocheza na amani ya nchi wanapaswa kuonywa na rais kwa ukali pasipo kuwaogopa, kwani Watanzania wakati wa uchaguzi mkuu walimchagua kwa kura nyingi wakiamini kuwa kura zao ndio dhamana ya maisha yao na hivyo asisite kutoa maamuzi mazito.

Mimi nasema kuwa Kikwete amepewa nchi hii na Mungu na Watanzania pale walipompa kura nampongeza kwa uvumilivu wake wa ajabu ambapo kama mwenzetu hayati Mwalimu Nyerere angefufuka leo akapewa aongoze nchi hii naamini kuwa kwa jinsi alivyokuwa mkali na asiyependa mtu kuchezea usalama wa nchi angeweza kutoa maamuzi mazito ambayo yangetingisha   dunia, alisema.

CCM Shinyanga

Halmashauri Kuu ya CCM ya Mkoa wa Shinyanga imemuomba Rais Kikwete kuwa makini na viongozi wa vyama vya upinzani ambao wameanza kutumia vibaya majukwaa ya kisiasa.

Ombi hilo lilitolewa mwishoni mwa wiki iliyopita na wajumbe wa Halmashauri Kuu ya CCM mkoani Shinyanga kufuatia tukio la maandamano ya CHADEMA yaliyofanyika mjini humo hivi karibuni.

Kwa mujibu wa tamko rasmi lililotolewa na Katibu wa Siasa na Uenezi wa CCM mkoani Shinyanga, Bw. Hassan Mwendapole jana, Halmashauri Kuu ya mkoa imemtaka Rais Kikwete ambaye pia ni Amiri Jeshi mkuu kuwa makini na macho kwa kutozipuuzia kauli zinazozotolewa hivi sasa na baadhi ya viongozi wa vyama vya upinzani nchini.

Tamko hilo la Halmashauri hiyo ya mkoa limedai kuwa ni vyema viongozi wa vyama vya upinzani wakaelewa kuwa Tanzania ni ya Watanzania wote hivyo ni wajibu wa kila kiongozi kujikita katika harakati za kuwaletea maendeleo wananchi wake badala ya kuhamasisha vurugu.

Wajumbe hao wameziomba mamlaka zenye dhamana ya ulinzi pamoja na zile za haki za binadamu ziwe macho na makini juu ya hali hiyo inayochomoza katika baadhi ya maeneo ya nchi ya Tanzania kwa baadhi ya watu kutaka kutumia ndivyo isivyo uhuru wa demokrasia nchini.

Kwa upande wake, Mwenyekiti wa CCM mkoani Shinyanga, Bw. Hamisi Mgeja alisema matukio ambayo hivi sasa yanatokea huko katika nchi za kaskazini mwa Afrika hayawezi kutokea hapa nchini kwa vile Watanzania wanaamini hawajafikia hatua hiyo.

Bw. Mgeja alisema matatizo yaliyotokea huko Tunisia na Misri na sasa Libya yanatokana na viongozi wa nchi hizo kutoheshimu misingi ya demokrasia, tofauti na ilivyo hapa nchini ambapo misingi hiyo inaheshimika.

Alisema Tanzania ni nchi inayoongozwa kwa kufuata misingi ya kidemokrasia kwa kuwaweka viongozi wake madarakani kila baada ya miaka mitano ambao wanatokana na matakwa ya wananchi wenyewe kwa njia ya sanduku la kura bila kutumia mabavu, maandamano wala mitutu ya bunduki.

Wakati huo huo baadhi ya wakazi wa mji wa Shinyanga wameushauri uongozi CCM wa ngazi ya juu pamoja na serikali yake kuacha kulumbana na viongozi wa CHADEMA kwa vile wanachokifanya viongozi hao hivi sasa ni moja ya majukumu yao nchini.

Wakazi hao walisema moja ya kazi ya vyama vya upinzani nchini ni kukikosoa chama tawala kinachoongoza serikali kila wanapoona mambo hayaendi kama inavyotakiwa na kwamba CCM isifikiri kuwa Watanzania wa leo ndiyo wale wa miaka ya sitini na sabini.

Binafsi yangu sioni sababu ya CCM na serikali yake kuamua kuwashambulia hawa watu wa CHADEMA, moja ya kazi ya upinzani ni kukikosoa chama kilichoko madarakani pale wanapoona mambo hayaendi sawa, ni ajabu kusikia CCM ikidai eti CHADEMA wanataka kuleta vurugu nchini, hii siyo kweli,

Haiwezekani hata siku moja Rais Kikwete akiri kuwa maandamano na mikutano ya kisiasa nchini ni ruhusa kwa mujibu wa katiba ya nchi, halafu ategemee viongozi
hao wa upinzani wapande majukwaani kukisifia chama tawala, itakuwa ni miujiza, na viongozi watakaofanya hivyo watakuwa wamefilisika kisiasa, alieleza Bw.  Fredy Mmassy.

Kwa upande wake Bw. Said Kalindile alisema CCM na serikali yake walichopaswa kufanya mara baada ya CHADEMA kuamua kufanya maandamano ya amani nchini na mikutano ya hadhara, ilikuwa ni kutekeleza yale yanayolalamikiwa, kwa mfano kuwapunguzia Watanzania ukali wa maisha na kudhibiti mfumko wa bei za bidhaa.

Mimi sioni sababu ya serikali kupigizana kelele na CHADEMA, wanachokifanya ni sahihi kabisa, wala hawalengi kuleta vurugu nchini, kama vurugu zitaletwa na serikali iliyoko madarakani baada ya wananchi kuchoshwa na jinsi serikali inavyoendeshwa, ulikuwa ni wakati muafaka wa CCM kujibu mapigo kwa vitendo badala ya vitisho, alieleza Bw. Kalindile.

Kauli ya Jumuiya ya Wazazi

Jumuiya ya Wazazi ya Chama Cha Mapinduzi (CCM) Wilaya ya Kinondoni, imemuomba Msajili wa Vyama vya Siasa nchini kuangalia uwezekano wa kuifuta CHADEMA kutokana na vitendo vya kuchochea vurugu katika mikutano yake na kuhatarisha uvunjivu wa amani.

Akizungumza katika mkutano wa wajumbe wa jumuiya hiyo Dar es Salaam jana, Katibu wa Wazazi wa Wilaya ya Kinondoni Bw. Stanley Mkandawile alisema vurugu hizo huchochewa kupitia maandamano yanayodaiwa kuwa ya amani yenye lengo la kuiondoa serikali halali iliyopo madarakani.

Bw. Mkandawile alisema wanalaani vitendo hivyo kwa kuwa vinakwenda kinyume cha sheria na kukiuka katiba ya nchi.

"Nchi yetu ni ya kidemokrasia, hivyo tunawaasa ndugu zetu wa CHADEMA wasubiri hadi uchaguzi ujao wanadai sera zao na sio kutumia mikutano kuchochea vurugu zisizo na faida katika jamii," alisema Bw. Mkandawile.

Katika hatua nyingine, Bw. Mkandawile aliiomba serikali na Jeshi la Polisi kuwachukulia hatua za kisheria viongozi wa chama hicho bila kuwaonea haya kwa kuwa wanachokifanya ni uhaini unaoweza kugharimu maisha ya wananchi.

NCCR nayo kuanza mikutano

Chama cha NCCR-Mageuzi kimeandaa mikutano ya kitaifa ya hadhara kwa ajili ya kuwashukuru wapiga kura kutafuta wanachama wapya na kutoa semina kwa madiwani wao nchi nzima.

Mkuu wa Idara ya Itikadi na Mafunzo wa NCCR-Mageuzi, Bw. George Kahangwa alisema kuwa ziara hiyo ikatayoongozwa na viongozi wa kitaifa inaanzia mkoa wa Kigoma ambako leo uongozi wa kitaifa wa chama hicho utakutana na viongozi wa wilaya ya Kasulu.

Alisema kesho kutakuwa na mkutano wa NCCR-Mageuzi utakaofanyika Kasulu mjini kwa ajili ya madiwani wao 19 waliochaguliwa katika mkoa wa Kigoma kupata mafunzo ya kiutendaji.

Bw. Kahangwa alisema Machi 9 kutakuwa na mkutano wa hadhara utakaofanyika Kasulu vijijini na siku iyakayofuata kutakuwa na mkutano mwingine wa hadhara Kasulu mjini na Manyovu.

Bw. Kahangwa alisema Machi 11 mwaka huu NCCR-Mageuzi itafanya mkutano wa hadhara Buyungu na Muhambwe na kufuatiwa na mwingine utakaofanyika Kigoma Kusini na Machi 13 utafanyika Kigoma Kaskazini na Kigoma Mjini.

Alisema katika mikutano hiyo NCCR-Mageuzi itazungumza na wananchi kuhusu masuala mbalimbali ya kitaifa kuhusu maendeleo, uchumi na huduma za jamii.

Imeandikwa na Rehema Mohamed na Peter Mwenda, Dar; Suleiman Abeid, Shinyanga; na Charles Mwakipesile, Mbeya