Mahabusu waua polisi wawili Shinyanga

Zuhura Semkucha na Patrick Mabula, Shinyanga

MAHABUSU waliokuwa katika Kituo cha Polisi cha Kagongwa wilayani Kahama mkoani Shinyanga wamewaua kwa kuwapiga risasi askari wawili
wa Jeshi la Polisi waliokuwa zamu katika kituo hicho.

Tukio hilo lilitokea juzi saa moja jioni kituoni hapo baada ya  mahabusu hao kumuita askari mwenye namba F. 5344 PC Salimu kwa madai ya kuwa wanashida na baada ya kufungua mlango huo walimvuta ndani ya chumba hicho na kumunyang'anya silaha.

Kaimu Kamanda wa Polisi Mkoa wa Shinyanga, Bw. Justus Kamugisha alisema kuwa mara baada ya kumvuta na kumuingiza katika chumba cha mahabusu askari huyo walimfunika tisheti usoni na kumnyang’anya silaha aliyokuwa nayo anian ya SMG namba 14303612.

Alisema baada ya kumdhibiti askari huyo ndipo askari mwingine mwenye namba F. 4964 PC Ngwegwe alikwenda kutoa msaada naye akapigwa risasi sehemu za kifuani na kufariki hapo hapo.

Majambazi hao yaliwapora askari hao bastola aina ya Chinese yenye namba XR7526 aliyokuwa nayo kwa ajili ya kazi yake.

Kamanda huyo alisema kuwa muda mfupi baada ya tukio hilo polisi walifuatilia nyendo za watu hao kwa kushirikiana na wananchi na kumkamata mmoja Bw. Audax Buberwa ambaye aliuawa kwa kushambuliwa na wananchi.

Kutokana na tukio hilo wananchi walitoa ushirikiano kwa hilo na kuwakamata watuhumiwa tisa.

Aliwataja kuwa ni Bw. Kwizela Lionel (mtusi) , Goodluck Leonard, Bw. James Leonard (26), Bw. Suleiman Dossi, mkazi wa Mabagala Dar es Saalam, Bw. Simon Fredi mkazi wa Mwanza, Bw. Paulo John mkazi wa Kahama, Bw. Lilakozi Willy ambaye ni Mrundi Bw. John Peter mkazi wa Mwanza, Bw. Emanuel Jockson mkazi wa Bukombe.