CCM yatishia kuishtaki Halmashauri Moshi

Na Martha Fataely, Moshi

TISHIO la Chama Cha Demokrasia na Maendeleo (CHADEMA) kutaka kukinyang’anya Chama Cha Mapinduzi (CCM) majengo na viwanja vilivyokuwa mali ya
umma, limekifanya chama hicho kikongwe kizizime na kutangaza hatua ya kuiburuza mahakamani Halmashauri ya Manispaa ya Moshi kwa kuicheleweshea hatimiliki ya viwanja hivyo.

Juzi Katibu wa Madiwani wa CHADEMA, Bw. Abrahman Sharifu na mbunge wa Moshi mjini, Bw. Philemon Ndesamburo walieleza nia ya Baraza la Madiwani lililopangwa kufanyika kesho kuinyanga’anya CCM mali hizo zinazodaiwa zilikuwa za umma kabla ya mfumo wa vyama vingi. Halmashauri ya Manispaa ya Moshi inaongozwa na CHADEMA.

Kutokana na hatua hiyo, Katibu wa CCM mkoani Kilimanjaro, Bw. Stephen Kazidi alisema chama chake kinakusudia kuifikisha mahakamani manispaa hiyo na kimetoa notisi kuanzia Machi 25, ili wawe wamekamilisha taratibu za kisheria kutoa hati hizo.

Alisema Viwanja hivyo namba 056038/94 ilipo Ofisi ya CCM Moshi Mjini na kiwanja namba 15686 ilipo Ofisi ya Jumuiya ya Vijana ni mali ya CCM kwani walivipata kwa mujibu wa sheria na kuthibitishwa na vikao halali vya Manispaa ya Moshi.

Alifafanua kwamba kiwanja ilipo ofisi ya CCM Moshi mjini kilitolewa kupitia vikao halali tangu Novemba 30, mwaka 1993 na aliyekuwa Waziri Mkuu na Makamu wa Kwanza wa Rais kupitia barua yake namba PMO/2/U.20/18 aliridhia maamuzi ya manispaa hiyo.

Hali kadhalika Bw. Kazidi alisema kiwanja ilipo ofisi ya UVCCM kilitolewa kwa jumuiya hiyo kwa uamuzi uliofanywa na vikao vya kisheria vya halmashauri, kamati ya mipango miji, kamati ya fedha na mipango ambapo jumuiya hiyo ilitakiwa kuilipa Manispaa sh. milioni 11.7, ambazo tayari zimelipwa.

Alisema kulingana na taratibu zote zilizofuatwa majengo na viwanja hivyo ni mali ya CCM chini ya Baraza la Wadhamini wa CCM na lile la UVCCM na kwamba wataendelea kuzilinda.

Katibu huyo alisema baada ya siku 30, CCM itaifikisha Halmashauri ya manispaa ya Moshi makahamani endapo wataendelea na ubabe wa kuzuia mali halali za CCM.

Awali katibu wa Madiwani wa Chadema na diwani wa kata ya Bondeni,Bw Abrahman Sharif alisema mpango wa chama chake kuhakikisha mali hizo za umma zinarejeshwa mikononi mwa manispaa lipo pale pale kwani CCM imezipora baada ya kuwa wapangaji wa muda mrefu.

Akizungumza kwa niaba ya Bw Sharif,katibu wa Chadema mkoani Kilimanjaro,Bw Basil Lema alisema chama hicho kiliwaahidi wananchi kwamba mali hizo zitarejeshwa na ndicho kitakachofanyika Machi 31, mwaka huu.

Mkurugenzi Mtedaji wa Manispaa ya Moshi, Bi. Bernadette Kinabo alisema viwanja na majengo yanayozunumziwa na madiwani wa CHADEMA ni mali ya CCM na kwamba walipewa kihalali na Baraza la Madiwani lililopita.

Hata hivyo, kutokana na hali tete ya kikao hicho, Bi. Kinabo alisema kulingana na taarifa zilizofika ofisini kwake, kuwa madiwani CHADEMA wamewaalika wafuasi wao kwenye kikao hicho, amelazimika kuahirisha kikao cha Baraza la Madiwani kesho, kwa hofu kwamba kutatokea vurugu na umwagaji wa damu baina ya pande hizo mbili.

Alisema kwa mujibu wa Sheria ya Tawala za Mikoa na Serikali za Mitaa ya mwaka 1982 na marekebiso yake ya mwaka 2002, mkurugenzi amepewa mamlaka ya kuahirisha na kuitisha kikao cha Baraza la Madiwani.