Prof. Maboko kuongoza tume kupitia Bodi ya Mikopo

Na Pendo Mtibuche, Dodoma

RAIS Jakaya Kikwete ameteua tume ya wataalamu 11 itakayoongozwa na Makamu Mkuu wa Chuo (Taaluma) wa Chuo Kikuu cha
Dar es Saalam Prof. Makenya Maboko kwa ajili ya kufanya mapitio ya mfumo wa uendeshaji wa Bodi ya Mikopo kwa wanafunzi wa elimu ya juu nchini.

Kazi ya tume hiyo ni kupitia mfumo na uendeshaji wa Bodi ya Mikopo kwa wanafunzi wa elimu ya juu nchini na itafanya kazi kwa siku 60 kuanzia Februari 14 mwaka huu na kuwasilisha ripoti kwa Katibu Mkuu Kiongozi Aprili 15 mwaka huu.

Tume hiyo ilitangazwa jana na Waziri Mkuu, Bw. Mizengo Pinda wakati akizungumza na waandishi wa habari mjini Dodoma kuhusu uteuzi wa tume kutayarisha mfumo mpya wa kugharamia, kutoa mikopo kwa wanafunzi wa elimu ya juu.

Aliwataja wajumbe wengine kuwa walioteuliwa katika tume hiyo kuwa ni Bw. Masoud Mohamed Haji Ofisa Uhusiano wa Kimataifa, Wizara ya Elimu na Mafunzo ya Ufundi Zanzibar na Dkt. Eliawony Meena Mhadhiri Mwanadamizi Elimu Chuo Kikuu cha Tumaini Arusha.

Wengine ni Bw. Daniel Magwiza Naibu Katibu Tume ya Vyuo Vikuu, Bi. Sarah Baharamoka, Mkurugenzi Msaidizi Uandishi Sheria Ofisi ya Mwanasheria Mkuu wa Serikali, Prof. Penina Mlama, Mkurugenzi Mtendaji wa Tawi la Tanzania la Taasisi inayopigania Elimu kwa Wanawake.

Aliwataja wengine kuwa Deo Daudo Ofisa Taaluma Chuo cha Usimamizi wa Fedha ambaye ni Rais mstaafu wa jumuiya ya wanafunzi wa Chuo Kikuu cha Dar es Saalam (DARUSO) mwaka 2007, Bw. Kassim Almas Umba Makamu Mkuu wa Chuo  Utawala na Fedha  Chuo Kikuu cha Kiislamu Morogoro.

Wengine ni Bw. Anderson Mlambwa Mkurugenzi wa Mikopo Benki ya CRDB, Prof. Wilbert Abel, Mkurugenzi Elimu ya Juu Wizara ya Elimu na Mafunzo ya Ufundi, Bi. Rosemary Rulabuka Mkurugenzi Mkuu Mamlaka ya Elimu Tanzania.

Tume hiyo itakuwa na uwezo wa kuteua makamu mwenyekiti na katibu kutoka miongoni mwa wajumbe hao, lengo kuu likiwa ni kujadili hadidu za rejea za tume katika kuchambua kwa kina sheria namba 9 ya mwaka 2004 iliyounda bodi ya mikopo kwa wanafunzi wa elimu ya juu.

Pia alisema kuwa tume hiyo itachambua kwa kina kanuni za sheria hiyo na kubainisha vifungu vilivyohitaji marekebisho kulingana na hali halisi ya utoaji mkopo endapo vinakidhi haja na mahitaji halisi ya waombaji na taifa kulingana na makusudio ya kuundwa kwa bodi ya mikopo.

Kazi nyingine itakayofanywa na bodi hiyo ni kuangalia kwa kina muundo wa bodi na ufanisi wake katika utoaji na urejeshaji wa mikopo na utoaji mapendekezo na kuchunguza kiini cha malalamiko na uhusiano usioridhisha kati ya Bodi na Wanafunzi, Bodi na Taasisi ya Elimu ya juu na kati ya Bodi na Wizara ya Elimu na kutoa mapendekezo ya namna ya kurejesha uhusiano mzuri.

Hadidu nyingine za rejea zitakazofanywa na tume hiyo ni kuchambua mfumo mzima wa namna ya kubaini wanafunzi wanaohitaji mikopo ili kuibua upungufu na kupendekeza taratibu za kuuboresha au kuwa na mfumo mbadala na kuangalia mambo yanayosababisha mifumo mingine kama vile  wa maliasili unafanikiwa na nchi nyingine zenye mazingira  kama ya Tanzania zinavyofanikiwa kugharimia elimu ya juu kwa mfumo wa mikopo.

Kazi nyingine ni kutoa ushauri na mapendekezo yatakayowezesha mkopo utolewe kwa wanafunzi wengi wahitaji wa elimu ya juu ili kuondoa lawama zilizopo na kushughulikia mambo mengine yoyote yatakayoweza kuboresha mfumo huo kwa kadri inavyoonekana inafaa.

Wakati huo huo naye Waziri wa Elimu na Mafunzo ya Ufundi, Dkt. Shukuru Kawambwa alisema kuwa serikali haijawahi kupokea malalamiko yoyote ya madai ya wanafunzi katika Chuo Kikuu cha Dar es Saalam kuhusu ongezeko la mkopo wa posho ya chakula na malazi kutoka kiwango cha sasa ambacho ni sh. 5,000 kwa siku na kufikia sh. 10,000 kwa siku.

Akizungumza na waandishi wa habari mjini hapa Waziri Kwambwa alisema kuwa serikali imepokea mgomo na maandamano hayo ya wanafunzi wa Chuo Kikuu cha Dar es Saalam kwa masikitiko makubwa kwani kwa muda wa siku mbili Februari 3 na 4  mwaka huu baadhi ya wanafunzi wa chuo hicho walihusika na mgomo uliosababisha uvunjifu wa amani na kuhatarisha shughuli za masomo chuoni hapo.

Alisema kuwa viwango vya mikopo hiyo vimekuwa vikibadirika mara kwa  mara kutokana na tafiti zinazofanywa na serikali ili kuangalia gharama halisi ya maisha katika vyuo vikuu  nchini.

Hata hivyo alisema kuwa tayari serikali imekutana na menejimenti ya chuo hicho pamoja na viongozi wa serikali ya DARUSO kwa lengo la kuwaeleza hatua mbalimbali ambazo serikali imeanza kuchukua ili wanafunzi waweze kuacha mgomo na maandamano ambayo hayana sababu za msingi.