'Katiba isiharakishwe kama zimamoto'

Na Grace Michael

ASASI za Kiraia zilizoungana na kuunda Jukwaa la Katiba Tanzania limesema kuwa hakuna sababu yoyote ya kukimbiza mchakato wa uandikwaji wa
katiba mpya kama zima moto kwa kuwa  unatakiwa kufuata ngazi za kitaalamu huku ukiwahusisha wananchi wote ambao ndio wenye katiba.

Mbali na hiyo jukwaa hilo limetoa mwito kwa Ofisi ya Mwanasheria Mkuu wa Serikali kuandaa na kupeleka haraka muswada bungeni ambao utatoa mwongozo au taratubu za kufuatwa katika uandikwaji wa katiba mpya ambao utazingatia hatua sita za kitaalamu ili kukidhi mahitaji yaliyopo kwa sasa.

“Tusiwe na haraka ya zima moto katika uandikaji wa katiba, bali twende hatua kwa hatua, na mchakato usitekwe na chama chochote cha kisiasa kwa kuwa katiba ni mali ya wananchi.


"Kinachotakiwa ni kuhakikisha wananchi wanashirikishwa katika hatua zote ili hatimaye waamue nini kiwemo na nini kisiwemo katika katiba mpya,” alisema Mwenyekiti wa Jukwaa hilo, Bw. Deus Kibamba.

Alisema kuwa wao kama jukwaa la Katiba Tanzania wana jukumu kubwa la kuwezesha uelewa na ushiriki wa wananchi katika mchakato wa kuandaa katiba mpya, hivyo watahamasisha wananchi ili waweze kushiriki kikamilifu katika mchakato wa kuandaa katiba mpya.

Alizitaja taratibu ambazo wangependa zifuatwe katika mchakato huo kuwa ni pamoja na kuwepo kwa mijadala ya awali ya wananchi ambayo itawawezesha kuibua, kujadili na kukubaliana mambo yanayotakiwa kuzingatiwa katika kuandika katiba hiyo.

Hatua ya pili alisema kuwepo kwa mkutano mkuu wa kitaifa wa katiba kwa ajili ya kuchambua mambo yaliyoibuliwa na wananchi na kupangwa katika makundi yanayoweza kujadilika kimafungu na baada ya hapo iwepo tume ya wataalamu ya katiba ambayo itaratibu maoni ya wananchi na kuyaweka katika waraka maalumu na tume hii itapaswa kuwajibika bungeni na jukwaa litashiriki kufuatilia uundwaji na ufanisi wa utendaji wake.

Bw. Kibamba aliendelea kueleza kuwa hatua inayotakiwa kufuatwa ni kuandaliwa kwa rasimu ya katiba na kuwasilishwa mbele ya bunge maalumu la katiba ambalo litaundwa kwa utaratibu maalumu ambalo litakuwa tofauti na bunge la kawaida na litashirikisha wawakilishi kutoka makundi ya kijamii mijini na vijijini Tanzania Bara na Visiwani.

Hatua ya mwisho ni kura ya maoni ya katiba ambayo itapigwa nchi nzima na wananchi wote wenye sifa ya kupiga kura na jukwaa litahamasisha wapiga kura kushiriki kikamilifu katika kura ya maamuzi na vigezo vya kura hiyo vitazingatiwa.

Kutokana na hayo, jukwaa hilo lilisisitiza kila mmoja kwa nafasi yake kuhakikisha anashiriki kikamilifu katika mchakato huo ili suala hilo liweze kufanikiwa na hatimaye kuondokana na matatizo yanayosababishwa na mapungufu ya katiba ya sasa.

Akizungumzia baadhi ya mapungufu ya katiba ya sasa alisema kuwa haitoi mwelekeo wa maendeleo ya nchi, inatumika zaidi kama nyenzo ya dola kudhibiti wananchi kujiletea maendeleo, haibainishi makubaliano ya kisiasa baina ya wananchi na viongozi wa dola lakini pia inamilikisha mamlaka makubwa kupita kiasi kwa rais badala ya kutoa mgawanyo sawa wa mamlaka kwa mihimi mitatu ya dola.

Asasi hizo ni pamoja na Kituo cha Sheria na Haki za Binadamu, Chama cha waandishi wa habari wanawake, SAHRINGON, Haki Ardhi, TCIB, TCDD, TANLAP, TANEPHA, EHE, TANGO, YPC na TLF.