Dowans yatikisa maandamano CHADEMA

*Slaa asema kuilipa ni kuiba fedha za walalahoi
*Mbowe ataka Rais Kikwete achue hatua, la sivyo...

Na Suleiman Abeid, Mwanza

CHAMA Cha Demokrasia na Maendeleo (CHADEMA) kilifanya maandamano ya amani na mkutano wa
hadhara huku kikiwataka viongozi wa serikali kushughulikia wahusika katika suala la malipo ya Dowans na ukosefu wa umeme nchini.

Moja ya maazimio yaliyotolewa jana na viongozi hao na kuungwa mkono na maelfu ya wananchi waliokuwa wamehudhuria mkutano huo uliofanyika jana katika viwanja vya Furahisha mjini Mwanza ni kumtaka Rais Jakaya Kikwete kuwawajibisha wote walioisababishia hasara nchi kwa kuingia mikataba yenye utata katika masuala ya umeme.

Akihutubia katika mkutano huo, Mwenyekiti wa Taifa wa CHADEMA, Bw. Freeman Mbowe alisema umefika wakati hivi sasa kwa Rais Kikwete kuwawajibisha watendaji wake wote ambao wamebainika kuwa ndiyo chanzo cha matatizo ya umeme katika nchi hii.

Bw. Mbowe alisema baada ya CHADEMA kuanzisha maandamano ya nchi nzima, chama hicho kinataka mara baada ya kumalizika kwa mzunguko huo katika mikoa yote, Rais Kikwete naye awe amechukua hatua dhidi ya wahusika wote vinginevyo wananchi watahamasishwa ili wamchukulie hatua yeye.

Bw. Mbowe alimtaka Waziri wa Nishati na Madini, Bw. William Ngeleja kujiuzulu mara moja katika wadhifa wake kutokana na kushindwa kuisimamia vyema wizara hiyo na kwamba amekuwa akitoa maelezo tofauti kuhusiana na suala zima la umeme hapa nchini.

“Watanzania tunasema tumechoka sasa, tunahitaji ukombozi wa mara ya pili haraka, tatizo la umeme hapa nchini limegeuka kuwa ‘dili’ la kuvuta fedha kwa viongozi wetu, hapana Watanzania tunasema tumechoka, hatuwezi kukubali kuendelea na mateso tunayoyapata hivi sasa ya mgao wa umeme.

“Rais Kikwete na mawaziri wake wote hawajawahi kuonja makali ya mgao wa umeme kwa vile wao wana majenereta majumbani kwao ambayo yanalipiwa mafuta kwa kodi za wananchi, sasa tunasema awashughulike wale wote waliohusika na matatizo haya, vinginevyo tutawaaambia wananchi na yeye wamwajibishe,” alieleza.

Akizungumza suala la milipuko ya mabomu yaliyolipuka hivi karibuni kule Gongolamboto alisema tukio hilo siyo la bahati mbaya kama ilivyoelezwa na Rais Kikwete alipowatembelea wahanga wa mabomu hayo hivi karibuni na kwamba limesababishwa na uzembe.

Alisema jambo la ajabu, Rais Kikwete alidai kuwa tukio hilo limetokana na mapenzi ya Mwenyezi Mungu, lakini siku ya pili yake badala ya kushiriki mazishi ya watu waliopoteza maisha kutokana na mabomu hayo alipanda ndege na kwenda Mauritania kusuluhisha mgogoro wa Ivory Cost.

“Kwa kweli Rais wetu ametushangaza sana, anadai kuwa tukio la milipuko ya mabomu kule Gongolamboto ni tukio lilitokana na mapenzi ya Mwenyezi Mungu, na kwamba halitatokea tena, lakini cha kusikitisha, rais anaacha kuzika watu wake anapanda ndege kwenda Mauritania, inasikitisha,” alieleza Bw. Mbowe.

Katika hali isiyokuwa ya kawaida Bw. Mbowe alisema iwapo serikali haitokubali kujirekebisha na kuwasikiliza wananchi kwa kutekeleza yale wanayoyasema, Rais Kikwete asishangae kuona yanatokea maandamano makubwa mengine ya nchi nzima ya kumuondoa katika madaraka kama ilivyotokea katika nchi za Tunisia na Misri.

Awali akizungumza katika mkutano huo katibu mkuu wa CHADEMA Taifa, Dkt. Willibrod Slaa aliwashukuru wakazi wa jiji la Mwanza kukipigua kura chama hicho na kuwachagua wabunge wanaotokana na CHADEMA pamoja na madiwani wengi na hivyo kuweza kuunda serikali.

Dkt. Slaa alikemea kitendo cha kunyanyaswa kwa machinga waliokuwa wakifanya biashara zao mitaani ambapo aliutaka uongozi wa Jiji la Mwanza kuwashirikisha machinga hao katika kupanga na kuona ni maeneo yapi yanayowastahili wao kuendeshea biashara zao.

Hatua hiyo ilitokana na kelele za wananchi waliokuwa wamehudhuria mkutano huo kumkataa kwa nguvu Meya wa Jiji la Mwanza, Bw. Josephat Kanyonyi Manyerere kwa madai aliwasaliti baada ya uchaguzi .

Kutokana na hali hiyo, Dkt. Slaa aliwaagiza madiwani wote katika halmashauri zote nchini zinazoongozwa na CHADEMA kuwa wahakikishe machinga hawanyanyaswi, na badala ya kufukuzana nao mitaani wakae pamoja na kupanga maeneo muafaka kwa ajili ya kuendeshea biashara zao.

“Ndugu zangu naomba muwe na subira, nimewasikia kilio chenu cha kumkataa meya wenu, na yeye nafikiri amesikia, lakini la muhimu ambalo napenda nilitolee agizo ni kwamba tangu sasa viongozi wa halmashauri acheni kuwasumbua ndugu zetu hawa wamachinga, walalahoi, hawa ndiyo wenye nchi.

“Ninasikitishwa sana ninaposikia viongozi wa serikali kuu wanapoingia mitaani kukimbizana na machinga, akiwemo Mkuu wa Mkoa ndugu yangu Bw. Abbas Kandoro, hii siyo kazi yako, wewe siyo mtawala, wewe ni ‘facilitator (mwezeshaji)’ siyo mtawala, hatutaki mkuu wa mkoa aingilie mambo ya jiji,” alisema.

Akizungumza suala la malipo ya Dowans alisema serikali haipaswi kulipa na kwamba kama ni lazima kulipwa, basi watakaopaswa kutoa fedha zao mfukoni ni Rais Kikwete na waziri wake Ngeleja.

Dkt. Slaa alisema tangu awali alikwisha sema suala la Dowans ni kiini macho, na mhusika mkuu ni mbunge wa Igunga, Bw. Rostam Aziz na kwamba hata huyo Brigedia aliyekuja nchini juzi, Brigedia Sulaiman Al- Adawi ni wa kuchongwa si muhusika mkuu.

Alisema Bw. Rostam anaelewa kila kitu, hivyo kulipa fedha hizo ni kuiba fedha za walalahoi wa Tanzania waziwazi na kwamba hata kamati ya Bw. Harrison Mwakyembe ilibaini kuwa kampuni ya Richmond ilikuwa kampuni ya kitapeli, hivyo hata Dowans aliyerithi naye ni tapeli.

“Sisi CHADEMA tunasema serikali ya CCM haipaswi kulipa fedha hizi kwa kampuni hii ya kitapeli, ushahidi wote unaonesha kuwa ni mchezo wa kuigiza lakini bado wanang’ang’ania kutaka kulipa, hata kamati ya bunge ilibaini hilo , tuelezwe iwapo akina Mwakyembe (Harrison) walisema uongo, basi tuwawajibishe wao,” alieleza Dkt. Slaa.

Viongozi hao wa CHADEMA leo wanatarajiwa kufanya mikutano katika wilaya zote za mkoa wa Mwanza ambapo kesho watakuwa mkoani Mara kabla ya kuelekea mkoani Shinyanga Jumatatu ijayo.

Amani yatawala maandamano

Kabla ya mkutano huo chama hicho kilifanya maandamano makubwa ya amani nchini yaliyoanzia katika viwanja vya Shule ya Msingi Buzuruga nje kidogo ya Jiji la Mwanza na kuishia katika viwanja vya Furahisha katikati ya mji yaliongozwa na viongozi wakuu wa kitaifa wa CHADEMA wakiwemo Mwenyekiti, Bw. Freeman Mbowe na Katibu Mkuu, Dkt. Willibrod Slaa na wabunge kadhaa wa chama hicho.

Wananchi wengi waliohudhuria maandamano hayo walionesha utulivu wa hali ya juu kwa kuandamana kwa amani huku wakiimba nyimbo mbalimbali za hamasa kwa kuzunguka mitaa mbalimbali kabla ya kuingia katika viwanja vya Furahisha.

Nyimbo nyingi zilikuwa zikipinga uamuzi wa serikali kutaka kuilipa kampuni ya Dowans, kupanda kwa gharama za umeme, kulaani mauaji ya wananchi mkoani Arusha na milipuko ya mabomu ya Gongolamboto jijini Dar es Salaam iliyotokea hivi karibuni.

Baadhi ya nyimbo hizo pia zilikuwa zikidai kuwa wananchi wamechoshwa na serikali ya CCM iliyopo madarakani ambayo walisema kila siku zinavyozidi kwenda mbele ndivyo maisha yanavyozidi kuwa magumu kwa wananchi wengi wenye vipato vya chini.

Mbali ya hali ya utulivu katika maandamano hayo pia wananchi wengi walifunga shughuli zao za biashara na kujipanga kando kando ya barabara kutoka eneo la Buzuruga hadi viwanja vya Furahisha hali iliyosababishwa kufungwa kwa muda kwa baadhi ya barabara zikiwemo za Nyerere na Pamba.

CHADEMA imeamua kuendesha maandamano ya amani kwa nchi nzima kupinga mambo manne makuu ambayo ni fujo zilizotokea mkoani Arusha na kusababisha vifo vya Watanzania wawili na raia moja wa Kenya ambapo serikali ya CCM imekuwa ikidai fujo hizo zilisababishwa na wana CHADEMA wenyewe madai ambayo viongozi wa CHADEMA wanayakanusha, wakisema zilisababishwa na polisi.

Pili kupinga kitendo cha serikali ya CCM cha kutaka kuilipa kampuni ya Dowans, ambapo CHADEMA inataka fedha hizo kama zipo zielekezwe katika huduma nyingine muhimu za kijamii ikiwemo elimu na afya.

Tatu, maandamano hayo yana lengo la kuwahamasisha wananchi kupinga kwa nguvu zote ongezeko la bei ya umeme nchini ambao umeongezwa kuanzia Januari Mosi mwaka huu kwa kiwango cha asilimia 18.5 hali ambayo CHADEMA wanadai ni kuwaongezea mzigo wa maisha magumu Watanzania, na kusababisha mfumuko wa bei kwa bidhaa zote muhimu.

Na mwisho maandamano hayo yatatumika kushinikiza kumtaka Waziri wa Ulinzi na jeshi la kujenga Taifa nchini, Dkt. Hussein Mwinyi kujiuzulu katika wadhifa wake kutokana na tukio la milipuko ya mabomu huko Gongolamboto jijini Dar es Salaam, na kwamba ni tukio la pili kutokea nchini akiwa waziri wa wizara hiyo.

Baadhi ya wananchi waliozungumza na Majira jana katika eneo la Buzuruga muda mfupi kabla ya kuanza kwa maandamano hayo, walisema pamoja na kwamba viongozi wa CCM wamekuwa wakidai chama hicho hakiwezi kuondolewa madarakani hivi sasa, lakini muda wao wa kuondoka umefika.

“Kwa hali hii kwa kweli siku za CCM kuendelea kubaki madarakani zinahesabika, wananchi tumechoshwa na hali ya ugumu wa maisha, na serikali haioneshi harakati zozote za kutaka kuwasaidia wananchi wake kuondokana na hali hiyo.

Mapema, Mkurugenzi wa Habari na Uenezi, Bw. Erasto Tumbo aliwaeleza waandishi wa habari kuwa maandamano kama hayo yataendelea kufanyika leo (Ijumaa) katika wilaya zote za mkoa wa Mwanza, ambapo Februari 26, yatahamia Mara na wilaya zake zote kabla ya kuelekea mkoani Shinyanga Februari, 28 na Machi Mosi mwaka huu.

Bw. Tumbo alisema Februari 2, mwaka huu maandamano hayo yatafanyika  mkoani Kagera na siku ya pili yake yatafanyika katika wilaya zote za mkoa huo ambapo itakuwa ndiyo mwisho wa maandamano hayo katika mikoa ya Kanda ya Ziwa.