Sumaye akerwa uchumi kuacha kando maskini

*Asema ni hatari kwa utulivu wa nchi

Na Tumaini Makene

WAZIRI Mkuu Mstaafu, Bw. Frederick Sumaye amesema kuwa takwimu za ukuaji wa uchumi ambazo hazijidhihirishi katika hali
chanya miongoni mwa wananchi wengi maskini hauna maana, kwani unaweza kuwa unakua lakini uko mikononi mwa mtu mmoja au kikundi kidogo cha watu wachache wabinafsi.

Amesema kuwa watu maskini wanapoachwa pembeni huku ikisemwa 'shauri yao' kutokana na watu wenye mamlaka kuendekeza ubinafsi badala ya kutumikia umma wa Watanzania, ni hatari kwa utulivu wa nchi.

Bw. Sumaye, aliyasema hayo jana katika mahafali ya kuwaaga wanafunzi wa Kidato cha Sita katika Shule ya Sekondari Pungu, akiwaasa vijana hao kujiandaa kuwa watumishi wa umma wa Watanzania maskini wanaolipia masomo yao kupitia kodi.

Huku akishangiliwa na wanafunzi, waalimu, wafanyakazi na wageni waalikwa, Bw. Sumaye alisema kuwa moyo wa upendo wa watu wanaonufaika na jasho la walipa kodi maskini wa Tanzania kuutumikia umma unazidi kupotea badala yake 'unajengeka moyo wa ubinafsi'.

"Sijui wangapi wanajua umuhimu wa mahafali haya ya leo...ukiwauliza vijana watasema majibu tofauti...wapo watakaosema wanafurahi kumaliza kuachana na mwalimu fulani, wapo watakosema kuwa wameachana na somo fulani...hivi kuna mtu hata mmoja amefikiria baada ya hapa itakuwaje.

"Ni kipindi cha kuonesha mavuno baada ya shamba, tunatumaini kuwa wahitimu wa leo wanayo mavuno ya kuonesha mara fursa itakapofika...lakini ni vyema mkajua kuwa kuhitimu kwako maana yake unategemewa kuwa kioo au msaada mkubwa kwa jamii inayokuzunguka.

"Unapaswa kutambua kuwa kuna Watanzania wana maisha magumu kiasi kwamba hawana viatu vya kusitiri miguu yao, chakula chao cha siku ni shida. Wengi wakiulizwa nani kawasaidia hapo walipofika mtasema ni serikali...lakini ukweli ni kuwa ni walipa kodi maskini, wamejitoa kuwasomesha ili msaidie kutatua matatizo yao," alisema Bw. Sumaye na kuongeza.

"Watanzania wanatakiwa watoke katika umaskini, itakuwa ni kosa tukijijali wenyewe na kuisahau jamii...siku hizi moyo wa upendo wa kutumikia umma unapungua, badala yake unajengeka moyo wa ubinafsi sana, watu maskini wanaachwa pembeni ikisemwa kuwa ni shauri yao.

"Hali hii ni hatari sana kwa utulivu wa nchi yetu...hata kelele hizi zinazopigwa juu ya ufisadi, wizi, rushwa, ushirikina, mauaji ya kutisha ni matunda ya ubinafsi, moyo usiojali wengine. Ni kweli kuwa uchumi wa nchi yetu unakua vizuri, lakini ukuaji wa uchumi uonekane katika hali chanya ya wananchi walio wengi."

Bw. Sumaye ambaye ni waziri mkuu mstaafu pekee mpaka sasa aliyewahi kutumikia vipindi viwili vya miaka mitano mfululizo wakati wa serikali ya awamu ya tatu chini ya Rais Benjamin Mkapa, alisema kuwa uchumi unaweza kukua lakini ukawa mikononi mwa mtu mmoja au kikundi kidogo cha watu wachache.

Alisema kimsingi hapigi vita utajiri, wala kuwaonea wivu wenye utajiri, bali anawaonea huruma wenye maisha duni, waliojitoa maisha yao, kwa njia ya kulipa kodi, kuwasaidia baadhi ya watu, hususan wenye mamlaka hapo walipo.

Alisema Watanzania wanakabiliwa na changamoto nyingi ikiwemo ya maisha magumu, umaskini uliokithiri, ujambazi, rushwa, ufisadi unaoikumba jamii nzima na kuiathiri, hasa vijana ambao ndiyo nguvu kazi ya taifa.

"Ukuaji wa uchumi unaweza kuwepo kwa kundi la watu wachache au mtu mmoja...ni hatari...tiba ni kuwatumikia wananchi kwanza kabla ya nafsi zetu...tuwe na moyo wa upendo kutumikia binadamu wenzako kwanza...umuhimu wako utakuja tu ukijitoa kutumikia wenzako hasa wenye hali duni.

"Kuna msemo mmoja wa Kiingereza unasema it is nice to be important but it is more important to be nice (ni vizuri kuwa mtu muhimu lakini ni muhimu sana kuwa mtu mwema). Sipigi vita utajiri la hasha, siwaonei wivu wenye utajiri wao, nawaonea huruma wenye hali duni waliojitoa maisha yao," alisema Bw. Sumaye.

Akiwatakia kila la heri na yote mema ya maisha wahitimu kwa ajili ya kuwatumikia wananchi huko waendako, Bw. Sumaye aliipongeza serikali kwa kujitahidi kuboresha sekta ya elimu, ambayo alisema ndiyo nyezo ya kupambana katika ulimwengu usiokuwa na huruma wa maendeleo ya sayansi.

Aliongeza kuwa shule ni sawa na karakana ya maisha kwa mwanadamu, ikimsaidia kujichongea mitambo ya kuendesha maisha yake mwenyewe, ingawa itategemea anaamua kujichongea mtambo wa aina gani anapokuwa amepata fursa ya kuwa darasani kusoma.

"Naipongeza serikali kwa kutoa kipaumbele kwa elimu kwa mafanikio yaliyofikiwa...elimu ni tofauti kabisa na huduma zingine za jamii...ni uzima wa maisha yenye maana kwako na jamii inayokuzunguka...umuhimu wake hauna mjadala, nchi iliyo nyuma kielimu haiwezi kushindana...

"Ni muhimu tukajielekeza kutoa elimu bora badala ya bora elimu ili kushindana katika ulimwengu wa utandawazi, serikali ihakikishe kuwa elimu inayotolewa inakidhi viwango vinavyokubalika kimataifa. Tusitengeneze viwango vyetu wenyewe kujiridhisha.

"Imekuwa kawaida sasa kuona katika taarifa za habari watoto wetu wamerudia mtindo wa kukaa sakafuni, kwenye vumbi huku wakiandikia magotini au kwenye migongo ya wenzao. Hapo hatutengenezi elimu ya viwango vya kimataifa, bali vya kwetu sisi wenyewe...haya ni mambo ya kuaibisha kabisa elimu yetu, ni vyema serikali ikayafanyia kazi.

"Mtaalamu mmoja alisema kama unafikiri elimu ni ghali jaribu ujinga...walimu Nyerere alikuwa akimfananisha mtu aliyekwenda chuo kikuu sawa na mtu aliyepewa chakula chote cha kijiji ili aende akatafute chakula cha kutosha kijiji cha jirani kisha alete...msiwasaliti Watanzania," alisema Bw. Sumaye.

Mapema Mkuu wa Shule ya Sekondari Pugu, Bw. Rukonge Mweru alisema kuwa moja ya changamoto wanazokabiliana nazo ni 'uvamizi' wa mipaka ya shule, hali ambayo mbali ya kumega eneo la shule pia inatishia ufanisi katika masuala kama vile kilimo, kama ilivyokuwa enzi za nyuma na kuhatarisha usalama na mali za wanafunzi na shule.

Wanafunzi wahitimu katika risala yao walirudia kero hizo, ikiwemo hiyo ya uvamizi wa eneo la shule, tatizo la maji, vitendea kazi (kama vile vitabu, vifaa vya maabara), uchakavu wa majengo na upungufu wa dawa katika zahanati ya shule.