RPC akiri askari kushiriki ujambazi

Na Gory Mhiliwa, Arusha

JESHI la Polisi Mkoa wa Arusha limethibitisha kuwa  askari wake wa Kikosi cha Kutuliza Ghasia (FFU) mwenye namba G.6825 PC Elias Matiku ndiye
alihusika katika tukio la kumpiga risasi dereva teksi, Bw. Jamal Abdul (32) na baadaye kupora gari na fedha Januari 16, mwaka huu.

Akizungumza na waandishi wa habari ofisini kwake jana Kamanda wa Polisi mkoa wa Arusha Bw. Thobias Andengenye, alikiri askari huyo kutambuliwa na baadhi ya mashuhuda wa tukio hilo na kuweka wazi kuwa anashikiliwa kwa mahojiano zaidi.

"Kuna waliokuwepo kwenye tukio kama kule kwenye kituo cha mafuta walichopora, walitaja baadhi ya vitu na umbo lake alivyokuwa siku ya tukio. Uchunguzi wetu wa awali unatuonyesha kweli siku hiyo nguo alizokuwa amevaa na umbo walilosema ni lake," alisema Kamanda Andengenye.
 
Alisema kwa sasa wanamshikilia, na kwamba dereva teksi atakapopona naye atapelekwa kituoni hapo kwa ajili ya utambuzi zaidi.

Alisema siku ya tukio Januari 16, mwaka huu saa 11.00 alfajiri eneo la Ngarenaro Dereva teksi huyo mwenye gari namba T. 976 AJZ Toyota Mark 11 akiwa eneo la Shivaz Kaloleni alitokea mtu mmoja aliyevaa koti kubwa jeusi, na viatu vyeusi na mkononi akiwa na silaha na kuomba  kupelekwa kituo cha Polisi ngarenaro.
 
Kamanda Andengenye alisema koti hilo lilikuwa la kuzuia baridi lakini silaha aliyokuwa ameshika haikujulikana ya aina gani, ingawa dereva huyo alisema ni SMG.

Alisema baada ya makubaliano ya kumlipa sh. 3,000 waliondoka na kwamba walipofika eneo la standi ya mabasi ya Kimotco mtu huyo alimpiga risasi mkono wa kulia na kisha kupora gari hilo.
 
Alisema baada ya tukio hilo mtu huyo aliondoka na gari hadi kituo cha mafuta kinachomilikiwa na Bw. Suleman Nkya na kumkuta muhudumu aliyejulikana kwa jina la Yasri Mohamedy au Shabani na kuagiza kuwekewa mafuta. 

"Wakati anawekewa mafuta ghafla akambadilikia na kupora fedha sh. 350,000 za sarafu na kukimbia na gari hilo ambapo wakati anakimbia aligongana na gari lenye namba T.412 BMH Toyota Hiace kituoni hapo kisha akatelekeza gari hilo kituoni hapo.

Alisema baada ya tukio hilo Polisi walipoanza kufanya mahojiano walibaini katika maelezo ya awali kuwa askari huyo amehusika.

Alisema kutokana na maelezo ya awali ya Dereva huyo ni kwamba siku ya tukio saa 10 za usiku katika eneo la Shivaz mtaa wa Kaloleni akiwa ameegesha gari lake alitokea mtu mmoja akiwa amevaa mavazi ya jeshi la Polisi na kumtaka ampeleke katika kituo cha polisi cha Ngarenaro baada ya makubaliano ya kulipwa sh. 3,000.
 
Alisema mara baada ya kufika karibu na kituo hicho askari huyo alimwamuru dareva huyo kusimama na alimtaka ampatie sh. 7,000 ili ampe noti ya sh. 10,000.
 
Alisema wakati dereva huyo aliyetambulika kwa jina la Jamal Abdul (32) akijaribu kutoa chenji ya sh.7,000 ili apewe sh. 10,000 askari huyo aliyekuwa ametoka nje ya gari ghafla aliikoki silaha yake na kumfyatulia risasi moja iliyompata sehemu ya shingo na kutokeza upande wa pili na kumjeruhi pia katika bega la kushoto.

Baada ya tukio hilo, askari huyo aliondoka na teksi hiyo na kwenda kwenye tukio la uporaji wa fedha kwenye kituo cha mafuta.