Tibaijuka kumekucha!

*Arudisha maeneo Palm Beach na Ocean Road Dar
*Aamuru kuta zivunjwe na zitengenezwe bustani
*Eneo la Joseph Mungai,Msasani nalo lachukuliwa
*Apiga marufuku maeneo kutumika kinyume na ramani
*Atumia usafiri wa 'daladala' kutembelea maeneo

Na Grace Michael

WAZIRI wa Ardhi, Nyumba na Maendeleo ya Makazi, Prof. Anna Tibaijuka ameagiza uongozi wa Manispaa ya Ilala kuvunja kuta
zilizojengwa katika maeneo ya wazi yaliyopo Ocean Road na Palm Beach jijini Dar es Salaam huku akiamuru maeneo kadhaa kurudishwa katika matumizi yake kama inavyoonekana kwenye ramani.

Mbali na agizo hilo, amesisitiza kuwa hakuna mwananchi atakayeruhusiwa kutumia kiwanja chochote nje ya matumizi yanayooneshwa kwenye ramani kwa kuwa ndio inayoamua eneo litumike kwa matumizi gani.

Prof. Tibaijuka alitoa maagizo hayo jana Dar es Salaam alipotembelea maeneo mbalimbali ya wazi ya jiji katika ziara aliyoambatana na wataalam mbalimbali wa Wizara hiyo, baadhi ya wabunge, wakurugenzi wa manispaa pamoja na wakuu wa wilaya.

Katika ziara hiyo, tofauti na utaratibu unaotumiwa na watendaji wengi wa ngazi kama yake kuwa na misafara ya magari mengi ya kifahari ya watendaji( mashangingi), Waziri Tibaijuka na ujumbe wake, walipanda mabasi madogo mawili 'daladala' ya kukodi kutoka kampuni ya Aurora.

Akiwa katika kiwanja namba 59 kilichopo Ocean Road, aliamuru kuvunjwa kwa ukuta uliozungushiwa eneo hilo baada ya kupata maelezo na ramani kuonesha eneo hilo kuwa la wazi.

“Nadhani hapa hakuna mjadala kinachotakiwa ni kuvunjwa kwa huu ukuta kwani haya maeneo ni ya kila mwananchi kuyatumia, ni maeneo ya wazi ambayo yanatakiwa kujengwa bustani ili kila mtu aje na kufuarahia maeneo ya nchi yake...na kama kuna kesi mahakamani ni rahisi kwa kuwa Mahakama haina mamlaka ya kupanga mipango miji,” alisema Prof. Tibaijuka.

Historia ya kiwanja hicho ilielezwa kuwa kilimilikishwa kwa Jumuiya Shree Hindu Mandal mwaka 1952 kwa matumizi ya kuchomea maiti na mwaka 1967 shughuli za kuchoma maiti zilihamishwa lakini hati haikuwahi kufutwa.

Akieleza hayo Mkurugenzi wa Mipango Miji, Bw. Albina Burra alisema kuwa katika hali ya udanganyifu wamiliki hao wa awali waliibuka na kudai mabadiliko ya matumizi ya kiwanja hicho na baadaye Rais alikubali kufutwa kwa hati hiyo na kiwanja hicho kuachwa kama eneo la wazi.

Katika eneo la Palm Beach ambalo historia yake ilionesha kuwa na mgogoro ambao ulifika na kuamriwa na mahakama, napo aliamuru pavunjwe kwa kuwa Rais mstaafu Benjamin Mkapa alishatengua umiliki wa eneo hilo kutoka kwa wamiliki wawili waliojulikana kama Shantaben Patel na G. Patel.

Kiwanja hicho namba 1006, kilibatilishwa rasmi mwaka 2002 na kufutwa umiliki wa hati ya kiwanja hicho na kuwa katika matumizi ya umma.

Hata hivyo baada ya ubatilisho huo, wamiliki hao wa awali walifungua kesi mahakamani wakishirikiana na Bw. Taher Muccadam wakiomba kutenguliwa kwa ubatilisho huo.

Akizungumzia mchakato huo, Prof. Tibaijuka alisema kuwa hakuna aliye juu ya Rais na kama Rais Mkapa alibatilisha umiliki huo basi hakuna namna na kinachotakiwa ni kuvunjwa kwa ukuta uliopo na nyumba iliyojengwa ndani yake lakini pia akatoa amri kwa Manispaa kupanda miti iliyokatwa na anayejidai mmiliki wa eneo hilo.

Sehemu nyingine aliyotembelea ni kiwanja namna 1072 kilichopo Upanga ambapo eneo hilo lilibuniwa bila kufuata utaratibu halijawahi kupimwa kwa kuwa ni kiwanja ambacho kipo katika eneo la mikoko na pia kiwanja hicho hakina sifa ya kuwa kiwanja kwa kuwa hakina barabara ya moja kwa moja.

Katika eneo la Oysterbay Beach, Prof. Tibaijuka alitoa maagizo kwa viongozi wa Manispaa ya Kinondoni kuhakikisha wanakutana na wadau wote ili kuangalia ni namna gani wanaweza kulitumia eneo hilo na wananchi nao wakanufaika na pasiwe na manung’uniko yoyote.

Eneo jingine ambalo ilionekana umiliki wake ni wa utata ni la Msasani Village kiwanja namba 586 na 587 Kitalu 'F', eneo hilo awali lilimilikishwa kwa Shia Ithnasheri na baadae kuhamishiwa miliki yake kwa Bw. Joseph Mungai ambaye alikuwa Waziri wa Kilimo, Chakula na Ushirika.

Ilielezwa kuwa taratibu za kubadilisha matumizi kutoka eneo la wazi kuwa makazi hazikufuatwa hatua iliyofanya kibali cha ujenzi kutotolewa na Manispaa.

Kutokana na maelezo hayo, Prof. Tibaijuka alisema kuwa katika hilo ni lazima watendaji wakiri kuwa walizembea katika kulishughulikia na hati ya hapo ni batili na eneo hilo linatakiwa kubaki katika matumizi yanayoonekana katika ramani ambayo ni pamoja na ujenzi wa Taasisi.

Mbali na maeneo hayo, pia alitembelea eneo ambalo makazi yake hayako kwenye mpangilio unaotakiwa katika eneo la Msasani Bonde la Mpunga ambapo alisema kuwa Serikali ni lazima iangalie namna ya kuwapa nyumba wakazi wa maeneo hayo ili eneo hilo liweze kupimwa na kuwekwa katika mpangilio unaofaa.

“Hapa ni lazima tuangalie wananchi tunawawezeshaje, kwani wapo ambao wana biashara zao hapa hivyo huwezi ukawaweka mbali au ukasema unawapa viwanja huko mbali...kinachotakiwa ni kuwapa nyumba na eneo kupimwa na hapa nataka uwe mfano,” alisema Prof. Tibaijuka.

Eneo jingine ambalo alitoa maelezo kama hayo ni la Bonde la Msimbazi ambapo alisema kuwa ni lazima wadau wote washirikishwe ili kuona wananchi wanachokihitaji kama ni nyumba au kiwanja na akatoa mwito kwa Shirika la Nyumba na mashirika mengine kujenga nyumba ili ziweze kusaidia.

Akizungumza baada ya kutembelea maeneo hayo, alisema kuwa kazi haziwezi kwenda bila kufika katika maeneo husika na kuona kama mipango iliyopo ofisini inalingana na iliyoko katika maeneo husika.

“Ni lazima utoke na uone kilichopo nje...hatuwezi kufanya kazi kama mangimeza kwa kukaa ofisini tu lakini katika mambo ya maeneo ya wazi hatuna muda wa kuleana tena...kitakachoamua ni kilichopo kwenye ramani yetu na si vingine hivyo hata wananchi wasitapeliwe ovyo ovyo waombe ramani na kuona kilichopo,” alisema.

Alisema kuwa ziara hiyo imejikita katika kushughulikia ripoti ya aliyekuwa Mkuu wa Mkoa wa Dar es Salaam, Bw. Willium Lukuvi na muda wa mwisho waliopewa wenye maeneo hayo ni mwisho wa mwaka huu na endapo watakaidi, wasitarajie kuambulia hata tofali.

Kwa upande wa Mbunge wa Ubungo Bw. John Mnyika ambaye naye alikuwa kwenye ziara hiyo, alisema kuwa mchakato huo pia unatakiwa ufanyike katika maeneo ya Ubungo kwa kuwa yapo maeneo ya wazi yanayotumika kinyume na matumizi na akaomba ripoti ya Bw. Lukuvi kuwekwa wazi ili ufuatiliaji uwe rahisi.“Mbali na haya lakini pia tungewaomba wenzetu wa Wizara kutengeneza mipango miji ya muda mrefu ili kuondokana na usumbufu,” alisema Bw. Mnyika.