Mtandao Tigo wageuka kero kwa wateja

Na Job Ndomba

WATUMIAJI wa simu za mkononi kwa mtandao wa Tigo juzi na jana walijikuta katika wakati mgumu baada ya kukosa mawasiliano kwa saa kadhaa.
Tukio hilo lilianza juzi mchana na kuzua usumbufu mkubwa miongoni mwa watumiaji wa
mtandao huo.

Wakizungumza na Majira baadhi ya wakazi wa Jiji la Dar es Salaam walisema kuwa tatizo hilo limezua usumbufu mkubwa, kwani wafanyabiashara, wafanyakazi wa maofisini na wengine wengi walishindwa kutekeleza mipango yao iliyotaka mawasiliano ya simu.

Mmoja wa wakazi hao aliyejitambulisha kwa jina la Emilian Philipo alisema tatizo hilo lilimpa usumbufu mkubwa kwani huduma zote za tigo zilikuwa hazifanyi kazi kuanzia kuuliza salio, kupiga, kutuma ujumbe na hata kupata huduma ya wateja.

"Tatizo hili si la kufumbia macho wala kulichekea kwani kwa watu kama wafanyabiashara ni hasara kubwa na huenda wakawa wamepoteza mamilioni ya fedha kwa kukosa mawasiliano, nadhani watuombe radhi," alisema Philipo

Kutokana na malalamiko hayo, Ofisa Mawasiliano wa Kampuni ya TiGO, Jackson Mmbando aliwaomba radhi wateja wao kwa usumbufu waliopata kwani ni tatizo la kiufundi.

Alisema tatizo hilo limetokea kutokana na hitilafu ndogo kwenye moja ya mitambo yao na kuwa jana walikuwa katika hatua za kuiongezea nguvu ili iweze kutoa huduma bora zaidi.

Tatizo hilo halikuwawakumba wakazi wa Jiji la Dar es Salaam pekee bali pia wa mikoa mingine kama vile Jiji la Mwanza na Arusha.

Mkazi wa Jiji la Mwanza, Bi. Zamda Ally alisema jana kwa saa tatu hakuweza kupata huduma yoyote ya TiGo kwani hata alipokuwa akituma ujumbe wa maneno (SMS) zilikuwa haziendi.

Mkazi mwingine wa Jiji la Arusha, Bw. John Ngunge alisema naye pia alikumbwa na tatizo hilo na kuwaomba wahusika kuwaomba radhi Watanzania kwa kushindwa kuwapa huduma waliyokuwa wakistahili.

"Nadhani kwa hili wanatakiwa watuombe radhi kwani tumepata usumbufu mkubwa na pengine wengi wameshindwa kupata vitu walivyokuwa wakivitarajia hasa katika sekta ya biashara," alisema Ngunge.