Mbivu, mbichi za Dowans wiki ijayo

*Mwanasheria mkuu amaliza kupitia hukumu
*Waziri Ngeleja ajiandaa kutoa taarifa rasmi

John Daniel na Grace Michael
SIKU moja baada ya wananchi kuja juu na kumtaka Rais Jakaya Kikwete kumtaja kwanza mmiliki wa Kampuni ya Dowans kabla ya kulipwa mabilioni ya walipa kodi, serikali imeahidi kutoa taarifa rasmi juu ya
sakata hilo wiki ijayo.

Kutolewa kwa taarifa hiyo wiki ijayo inatokana na Mwanasheria Mkuu wa Serikali Jaji Fredereck Werema, kukamilisha kupitia jalada la maamuzi ya Mahakama ya Kimataifa ya usuluhishi wa migogoro ya kibiashara (ICC) na kuwasilisha mapendekezo yake Wizara ya Nishati na Madini.

Nimefanya kazi hiyo na nimeimaliza. Nimetoa maamuzi kuhusiana na kilichokuwemo humo ndani na nimewasilisha kwa Waziri wa Nishati na Madini, hivyo nendeni huko atawaeleza,” Jaji Werema aliwaeleza waandishi wa habari, Ikulu baada ya kuapishwa kwa Jaji Mkuu Mohamed Othamn Chande.

Alipohojiwa zaidi kuhusu alichoshauri na 'kiu' ya wananchi kuhusu wamiliki wa Dowans, Jaji Werema alisema: Jamani msiwe mnaongea kama bata ebu itafuteni hiyo hukumu inaonesha kila kitu na wamiliki wa kampuni hiyo mtawajua humo hivyo katafuteni hukumu.

Akizungumza na Majira kwa njia ya simu, Waziri wa Nishati na Madini, Bw. William Ngeleja alikiri ofisi yake kupokea jalada la ushauri kutoka kwa Jaji Werema kuhusu Dowans.

"Ninachoweza kukuhakikishia ni kuwa nimetaarifiwa kuwa Mwanasheria Mkuu wa Serikali ameleta taarifa hiyo baada ya kupitia jalada husika.
"Ninawaahidi Watanzania kuwa serikali itatoa taarifa kamili juu ya suala hilo wiki ijayo, siwezi kusema zaidi kwa sasa kwa kuwa hata mimi sijapitia hiyo taarifa," alisema Bw. Ngeleja.

Alipoulizwa kuhusu uhalali wa madai ya sh. bilioni 185 za Dowans, Bw. Ngeleja alisema hawezi kuzungumza suala hilo kwa sasa kwa kuwa hajapitia jalada husika ili kujiridhisha.

"Nakuomba vuta tu subira, serikali itatoa taarifa kamili juu ya suala hilo wiki ijayo kama nilivyokwambia. Kila kitu kitajulikana wazi hakuna kitu cha kuficha, nipe tu muda," alisisitiza Bw. Ngeleja.Awali vyanzo vya vya Majira ndani ya Serikali na nje vilieleza kuwa malipo halisi ya Dowans si sh. bilioni 185 kama ilivyotangazwa awali na kwamba kiwango hicho kilipandishwa na wapambe wa kampuni hiyo kinyume na hali halisi.

Habari hizo zilieleza kuwa Jaji Werema ametoa ushauri mzito kwa serikali, ikiwemo kuwa makini zaidi katika mikataba na uvunjaji wake ili kuepusha nchi kuingia gharama kubwa kulipa fidia ya mabilioni ya fedha bila sababu.

Hata hivyo, Jaji Werema hakuwa tayari kuzungumzia kwa undani kwa maelezo kuwa yeye si msemaji bali mwanasheria na maadili yake hayamruhusu kusema lolote kwa kuwa hakutumwa kufanya hivyo.

Habari kutoka vyanzo vyetu ndani ya Serikali vilieleza kuwa malipo halisi ya Dowans kwa mujibu wa hukumu ya mahakama hiyo ni dola milioni 64 karibu sawa na sh. bilioni 90 za Tanzania.

"Katika hali inayotia mashaka taarifa ya ICC inasema madai ya malipo ya bilioni 185 kwa Dowans ni feki na yamepikwa na wapiga debe wa kampuni hiyo nje na ndani ya nchi kwa malengo wanayojua wao.

Malipo halisi yanatajwa kwa ni tuzo ya dola milioni 64.2, lakini wanasheria wa masuala ya usuluhishi wanasema hata hiyo tuzo ya milioni 64.2 si mwisho, bado TANESCO wanaweza kuirekebisha kupitia Judiciary Review katika Mahakama Kuu ya Tanzania," alisema Chanzo chetu.
Chanzo hicho kilisema wakati shauri hilo likiendelea katika mahakama hiyo jina la mbunge mmoja lilitajwa kama mwakilishi wa kampuni hiyo hapa nchini.

"Majina ya wamiliki wa Dowans haikutajwa, lakini aliyekuwa anaiwakilisha kampuni kortini alimtaja mbunge huyo kuwa ndiye mwakilishi wa Dowand nchini, ni jambo la kawaida katika biashara," kilisema chanzo chetu.Chanzo hicho kilidai kuwa tatizo kubwa iliyosababisha Tanzania kushindwa katika ushauri huo ni maandalizi hafifu ya mwanasheria aliyewakilisha TANESCO.

Ilielezwa kuwa mwanasheria huyo alienda katika shauri hilo akiwa na hoja moja tu ya 'mkataba wa kampuni ya Richmond iliyouzwa kwa Dowans usivyo halali' na baada ya kushindwa na upande wa utetezi hakuwa na njia nyingine.

"Katika mazingira haya ya sasa ni ngumu sana Tanzania kukwepa kulipa japo kiasi halisi kitakacholipwa si bilioni 185 kama ilivyotangzwa," kilisema chanzo chetu.