Kikwete, Hoseah watajwa WikiLeaks

*Hoseah adaiwa kumchongea Kikwete Marekani
*Ni kuwa anakwepa kushtaki mapapa wa rushwa

Na Mwandishi Wetu

SIRI ya Taasisi ya Kuzuia na Kupambana na Rushwa nchini (TAKUKURU) kushindwa kuwaburuza mahakamani mapapa wa
rushwa imefichuka kuwa ni kutokana na Rais Jakaya Kikwete kukosa nia ya dhati ya kuwachukulia hatua kutokana na tabia ya kulindana, mtandao wa WikiLeaks umeeleza.

Kwa mujibu wa taarifa kutoka Mtandao huo unaovujisha siri za Marekani na kukaririwa na Gazeti la The Guardian la Uingereza jana, Mkurugenzi Mkuu wa TAKUKURU, Dkt. Edward Hoseah alisema hayo alipokutana na Mwanadiplomasia wa Marekani, Purnell Delly Julai, 2007 jijini Dar es Salaam.

Kwa mujibu wa WikiLeaks Dkt. Hoseah aliweka wazi kuwa ili kutekeleza wajibu wake, tuhuma za rushwa zinazomhusu Waziri Mkuu na Rais haziwezi kuwekwa wazi.Anadaiwa kusema pia kuwa viongozi waliopata na watu waliokaribu na kiongozi huyo hawashikiki.

"Rais Kikwete hana nia ya wazi kuacha sheria ifuate mkondo kuendesha kesi za watuhumiwa wa rushwa ambao ni vigogo serikalini," ilisema sehemu ya taarifa hiyo na kuongeza kuwa "Hataki kuonesha mfano mbaya kwa viongozi wastaafu."

Katika mazungumzo hayo, inaelezwa kuwa Dkt. Hoseah alionesha kuhofia maisha yake na kuomba ulinzi wa Marekeni kutokana na ujumbe mfupi wa simu za mkononi na barua alizopokea zikitishia maisha.

"Alisema (Dkt Hoseah) maisha yake yalikuwa hatarini," ilisema sehemu ya taarifa hiyo ya mtandao na kuongeza kuwa "vigogo wa kisiasa katika nchi za kiafrika hawaguswi".

Hata hivyo, tayari Dkt. Hoseah amekanusha kutamka maneno hayo, akidai ofisa huyo wa ubalozi alimnukuu vibaya.Kwa mujibu wa mtandao huo, Dkt. Hoseah alizungumza kwa woga kuhusu uwezekano wa yeye kutekeleza nia yake ya kweli dhidi ya vita vya rushwa nchini na kuweka wazi kuwa kuwashughulikia mapapa wa rushwa ni kazi ngumu na kwamba hawatakiwi kuguswa wao na watu walio karibu nao.

Taarifa hiyo ya siri ilisema Dkt. Hoseah aliweka wazi kuwa kulikuwa na kila dalili ya rushwa Benki Kuu ya Tanzania (BoT) na kwamba tatizo hilo ni kubwa pia kwa upande wa Tanzania visiwani.

"Kuna fununu kwamba rushwa iko katika Benki Kuu ya Tanzania na visiwa vya Zanzibar navyo vinanuka rushwa," ilisema sehemu ya taarifa hiyo iliyonukuu Dkt. Hoseah.

Taarifa hiyo ilibainisha kuwa viongozi wa Zanzibar, ambao baadhi yao walikuwa wakilipwa mishahara na wawekezaji, pia walikuwa wameanza kujiingiza kwenye ufisadi wa kujilimbikizia ardhi.

Taarifa hiyo pia ilizungumzia kesi ya rushwa ya rada ya Tanzania iliyosikilizwa jana katika mahakama moja mjini London nchini Uingereza ikihusisha kampuni ya BAE na aliyekuwa Mwanasheria Mkuu wa Serikali Bw. Andrew Chenge.

"Kila aliyehusika na tuhuma hii na BAE nchini Uingereza amewajibika lakini Tanzania wanakwepa kwa sababu kwenye uchunguzi huo halikujitokeza neno rushwa," ilisema sehemu ya taarifa hiyo.Taarifa hiyo ilisema Kampuni ya BAE ilitozwa faini ya dola za Marekani milioni 30 na Taasisi ya Upelelezi wa Makosa ya Jinai nchini Uingereza (SFO).

"Kuna wakati aliyekuwa Waziri wa Uingereza anayeshughulikia masuala ya Maendeleo ya Afrika, Bi. Clare Short alisema "ni wazi ilikuwa ni mradi wa kipumbavu wa rushwa," ilisema taarifa hiyo.Taarifa hiyo pia ilieleza kuwa tuhuma za rada zingeweza kushughulikiwa na TAKUKURU pia kwa upande wa Tanzania kwa kuwa Dkt. Hoseah alikaririwa akisema kuwa zilihusisha maofisa kutoka Wizara ya Ulinzi wakiwemo maofisa wa Jeshi.

Taarifa hiyo ilieleza kuwa Dkt. Hoseah anapokutana na wafanyakazi wa Taasisi anayoongoza katika vikao vya ndani anakuwa na wakati mgumu kwa kuwa wanamuona kama wamemweka wao.Aliyekuwa Waziri Mkuu wa Uingereza, Bw. Tony Blair, mwaka 2006 aliagiza SFO kufanya uchunguzi kuhusu malipo yaliyofanywa na BAE kwa familia ya Mfalme wa Saudia.Taarifa hiyo ilisema Wizara ta Sheria ilienda mbali zaidi na kuagiza Kampuni ya BAE kulipa faini ya dola milioni 400 sawa na Euro 260 chini ya Sheria ya rushwa ya kimataifa ya US.

Tanzania ilinunua rada ya kijeshi kutoka Kampuni ya BAE kwa garama ya Ero milioni 28 mwaka 2001 kwa ajili ya ulinzi pamoja na kusaidia masuala ya anga.

Baadhi ya washirika wa misaada kama Benki ya Dunia waliweka wazi kuwa gharama za kununua chombo hicho ilikuwa kubwa zaidi kuliko ilivyotakiwa.Hata hivyo, taarifa iliyotolewa na Dkt. Hoseah jana mchana licha ya kukiri kufanya mazungumzo na ofisa balozi huyo ilipingana na taarifa za Wikileaks na kueleza kuwa Ofisa huyo alimkariri vibaya kwa sababu znazozijua mwenyewe.

"Kwa mfano sikusema kuwa Rais Kikwete ananikwamisha, nilichosema ni kuwa Rais hataki kigogo wa Serikali au mtu yeyote ashtakiwe kwa majungu au bila ushahidi wa kutosha, kwani kwa kufanya hivyo serikali itakuwa hatarini kulipa fidia ya fedha nyingi iwapo mtuhumiwa atashinda kesi mahakamani,” alisema Dkt. Hoseah katika taarifa yake.

Kuhusu kudai maisha yake kuwa hatarini kutokana na mapambano ya rushwa kuhusishwa vigogo na matajiri Mkurugenzi huyo, alikiri hilo na kuongeza kuwa hilo ni jambo la kawaida kwa kazi yake kama Mkuu wa TAKUKURU anayepambana na vigogo na matajiri.
Nakumbuka ofisa huyo aliniuliza kama ninahofia maisha yangu kama Mkuu wa TAKUKURU au siyo, jibu langu lilikuwa rahisi na wazi kuwa ndiyo. Unapowashughulikia watu maarufu na matajiri ni lazima uwe makini na maisha yako,” alisema Dkt. Hoseah katika taarifa hiyo.

Hata hivyo taarifa hiyo ilikanusha Dkt. Hoseah kutaka kukimbia nchi kwa sababu maisha yake yapo hatarini na kuongeza kuwa anashangaa jinsi alivyonukuliwa vibaya na ofisa huyo wa ubalozi.

Alisema usaliti na kupigwa vita ni sehemu ya maisha yake kwa kuwa anashughulika na watu wenye nguvu na kuongeza kuwa hana wasiwasi kwa kuwa anafanya kazi kwa mujibu wa sheria zilizotungwa na bunge na kwamba hakuna aliye juu ya sheria.